استانادا قالالىق فۋتبول فەدەراتسياسىنىڭ ۇيىمداستىرۋىمەن بۇقارالىق اقپارات قۇرالدارى وكىلدەرى اراسىنداعى فۋتبول بىرىنشىلىگىنىڭ العاشقى ماۋسىمى اياقتالدى. جارىسقا بارلىعى 11 كوماندا قاتىستى.
باق ليگانىڭ العاشقى ماۋسىمىندا ەشكىمگە ەسە جىبەرمەگەن «حابار» ارناسىنىڭ جىگىتتەرى 26 ۇپايمەن چەمپيون اتانسا, سوڭعى تۋرعا دەيىن بۇل اتاقتان ۇمىتكەر بولعان «قازاق راديوسى» 23 ۇپاي ەنشىلەپ, ەكىنشى ورىنعا يە بولدى. ال ۇزدىك ۇشتىكتى 19 ۇپايمەن «Sportsffa.kz» كومانداسى تۇيىندەدى.
«جۋرناليستەر اراسىنداعى بىرىنشىلىك مىنە, ءوز مارەسىنە جەتتى. بۇل الداعى ۋاقىتتا ءوز جالعاسىن تابادى. كەلەسى چەمپيونات وسى جىلدىڭ مامىر ايىندا باستالادى. ازداعان وزگەرىستەر دە بولادى. جارىسقا قاتىسىپ, قىزىقتى وتۋىنە اتسالىسقاندارىڭىزعا العىس بىلدىرەمىن. ولاي بولسا, مامىر ايىنا دەيىن كەزدەسكەنشە», - دەدى استانا قالاسى فۋتبول فەدەراتسياسىنىڭ باس مەنەدجەرى عالىم كەنجالينوۆ.
ءۇش ايعا جۋىق ۋاقىتقا سوزىلعان بىرىنشىلىكتە بارلىعى 24 گول سوققان «سپورت 59» ۇجىمىنىڭ شابۋىلشىسى ساپارعالي قانات ۇزدىك سۇرمەرگەن اتانىپ, «التىن بۋتسا» سىيلىعى مەن ۇزدىك شابۋىلشى نوميناتسياسىن جەڭىپ الدى. سونىمەن قاتار, «ۇزدىك قاقپاشى» «حابار» كومانداسىنىڭ نامىسىن قورعاعان ايبەك قابىلشاعا بەرىلسە, «ۇزدىك قورعاۋشى» اتاعىنا «Sportsffa.kz» ويىنشىسى اراي ءىزباي يە بولدى. ال جۋرناليستەر اراسىندا ەرەكشە ويىنىمەن كوزگە تۇسكەن «حابار» ۇجىمىنىڭ كاپيتانى نۇرسۇلتان قۇرمان «ۇزدىك ويىنشى» اتاندى.
«كوزدى اشىپ-جۇمعانشا وتە شىقتى. ارىپتەستەرىمىز جىلى پىكىرلەرىن ءبىلدىرىپ جاتىر. كەلەسى ماۋسىم بۇدان دا قىزىقتى ءارى تارتىستى وتەدى دەپ سەنەمىن. الداعى ۋاقىتتا قازاق سپورت جۋرناليستيكاسىنا ەڭبەگى سىڭگەن تۇلعالاردىڭ ەسىمىنە ارنالعان جۇلدىزدار ماتچىن وتكىزۋدى جوسپارلاپ وتىرمىز», - دەدى باق ليگانى ۇيىمداستىرۋشىلاردىڭ ءبىرى ءازيز ءجۇمادىل.