بۇگىن جاپونيانىڭ ساپپورو قالاسىندا ءوتىپ جاتقان VIII قىسقى ازيادا ويىندارى ءوز مارەسىنە جەتتى, دەپ حابارلايدى قازاقپارات.
قازاقستان سپورتشىلارى ءۇشىن ازيادانىڭ سوڭعى جارىس كۇنى وتە تارتىستى جانە تابىستى ءوتتى. بۇل كۇنى قورجىنىمىزعا شاڭعىشىلار سەرگەي چەرەپانوۆ - كۇمىس جانە نيكولاي چەبوتكو - قولا جۇلدە سىيلاسا, بياتلونشىلار يان ساۆيتسكي - التىن, گالينا ۆيشنەۆسكايا - التىن جانە الينا رايكوۆ كۇمىس ەنشىلەدى. يۋليا گالشەۆا - كۇمىس جانە دميتري رايحەرد- قولا جۇلدە سىيلاسا, ەرلەر حوككەي كومانداسى ەل قورجىنىنا توعىزىنشى التىن مەدالدى سىيعا تارتتى.
سونىمەن قازاقستان ۇلتتىق قۇراماسى جالپى ەسەپتە 32 مەدال ەنشىلەپ, (9 التىن, 11 كۇمىس, 12 قول) ازيادا ويىندارىن ءتورتىنشى ورىنمەن اياقتادى. بۇل, ارينە جامان كورسەتكىش ەمەس.
جالپى ەسەپتە ءبىرىنشى ورىندى ازيادا ويىندارىن ۇيىمداستىرعان جاپونيا ەلىنىڭ وكىلدەرى جەڭىپ الدى. ولاردىڭ ەنشىسىندە 73 مەدال (26 التىن 22 كۇمىس, 25 قولا) بار. ەكىنشى ورىندى وڭتۇستىك كورەيا سپورتشىلارى قانجىعاسىنا بايلادى. ولاردىڭ قورجىنىندا 49 مەدال (16 التىن, 17 كۇمىس, 16 قولا) بار.
ال ۇزدىك ۇشتىكتەن كورىنگەن قىتاي ەلىنىڭ قورجىنىندا جالپى 33 مەدال (12 التىن, 13 كۇمىس, 8 قولا) بار. ال مەدال العان ەلدەر اراسىندا جاپونيا, وڭتۇستىك كورەيا, قىتاي جانە قازاقستاننان بولەك ءبىر مەملەكەت بار. ول سولتۇستىك كورەيا. ولاردىڭ ەنشىسىندە جالعىز قولا مەدال ءتۇستى.
جالپى VIII قىسقى ازيادا ويىندارىنا 29 مەملەكەت قاتىسقان بولاتىن. سونىڭ 24 مەملەكەتى ءوز اۋىلدارىنا جۇلدەسىز قايتتى.
ەستەرىڭىزگە سالا كەتەيىك, VIII قىسقى ازيادا ويىندارى جاپونيانىڭ ساپپورو قالاسىندا 19-26 اقپان ارالىعىندا ءوتتى. جارىستا 29 ەلدىڭ سپورتشىلارى 11 سپورت تۇرىنەن 64 مەدال جيىنتىعىن ساراپقا سالادى. بۇل ءباسى بيىك دوداعا ەلىمىزدىڭ نامىسىن 153 سپورتشى قورعادى.
وسى ورايدا ايتا كەتەيىك, ازيادا ويىندارىنىڭ تاريحى 1952 جىلدان باستالادى. ال 1986 جىلى العاش رەت قىسقى ازيادا ويىندارى ۇيىمداستىرىلدى. اۋقىمدى جارىس ءتورت جىلدا ءبىر رەت وتكىزىلىپ تۇرادى. ازيادا ويىندارى ازيانىڭ وليمپيادالىق كەڭەسىنىڭ باسشىلىعىمەن جۇزەگە اسىرىلادى. قىسقى ازيادا ويىندارىنىڭ تاريحىنا ۇڭىلەتىن بولساق, العاشقى جارىس وسى ساپپورو (جاپونيا) قالاسىندا 1986 جىلى 1-8 ناۋرىز ارالىعىندا وتكەن ەدى. مۇندا سپورتتىڭ 8 ءتۇرى بويىنشا جۇلدەلەر ساراپقا سالىنعان. اتالمىش جارىسقا 7 ەلدىڭ سپورتشىلارى قاتىسىپ, تەك 4 ەلدىڭ سپورتشىلارى عانا جۇلدەلى ورىندارعا يە بولعان. ەكىنشى قىسقى ازيادا ويىندارى 1990 جىلدىڭ 9-14 ناۋرىز ارالىعىندا تاعى دا ساپپورو قالاسىندا ءوتتى. مۇندا سپورتشىلار سپورتتىڭ 6 ءتۇرى بويىنشا باق سىناستى. 10 ەلدىڭ سپورتشىلارى قاتىسقان ەكىنشى قىسقى ازيادا ويىندارىنان 5 ەلدىڭ سپورتشىلارى عانا ەلدەرىنە جۇلدەمەن ورالعان.
قازاقستان رەسپۋبليكاسى 1996 جىلى 4-11 اقپاندا حاربين (قىتاي) قالاسىندا وتكەن ءۇشىنشى قىسقى ازيادا ويىندارىنا العاش رەت قاتىستى. بۇل جولى سپورتتىڭ 7 ءتۇرى بويىنشا مەدالدار ساراپقا سالىنعان. قىتاي جەرىندە وتكەن جارىسقا 17 ەلدىڭ سپورتشىلارى قاتىسىپ, 5 ەلدىڭ سپورتشىلارى جۇلدەلى ورىنداردى ءوزارا بولىسكەن. بايراقتى باسەكەدە قازاقستاندىق سپورتشىلار 14 التىن مەدال ەنشىلەپ, جالپى كوماندالىق ەسەپتە 2 ورىنعا تۇراقتادى.
1999 جىلى كانگۆون (كورەيا) قالاسىندا وتكەن 4-ءشى قىسقى ازيادا ويىندارىندا دا قازاقستان سپورتشىلارى جاقسى ونەر كورسەتتى. ولار 10 التىن, 8 كۇمىس جانە 7 قولا جۇلدەنى قانجىعالارىنا بايلادى. 2003 جىلى اوموري (جاپونيا) قالاسىندا وتكەن جارىستا دا قازاقستاندىقتار تاماشا ويىن ورنەگىن كورسەتە ءبىلدى. جاپون جەرىندە وتانداستارىمىز 7 التىن, 7 كۇمىس جانە 6 قولا مەدالعا يە بولعان. ال 2007 جىلى چانگۋين (قىتاي) قالاسىندا وتكەن 6-شى قىسقى ازيادا ويىندارىندا قازاقستاندىق سپورتشىلار 6 التىن, 6 كۇمىس جانە 6 قولا مەدالدى قاناعات تۇتتى. 2011 جىلعا دەيىن قىسقى ازيادا ويىندارى تەك جاپونيا, قىتاي, كورەيا ەلدەرىندە عانا وتكىزىلىپ كەلگەن. ال VII قىسقى ازيادا ويىندارى تۇڭعىش رەت تمد ەلدەرى اراسىندا قازاق ەلىندە بايراعىن جەلبىرەتتى. وندا وتانداستارىمىز 32 التىن, 21 كۇمىس, 17 قولا مەدال ەنشىلەپ, جالپى ەسەپتە ءبىرىنشى ورىندى جەڭىپ العان بولاتىن.
wمىنە, بۇگىن ساپپورودا وتكەن ازيادا ويىندارىندا جالپى ەسەپتە ءتورتىنشى ورىننان كورىندى.