ۇكىمەت ۇيىندە قر پرەمەر-ءمينيسترى باقىتجان ساعىنتاەۆ استانادا وتەتىن ەكسپو-2017 حالىقارالىق مامانداندىرىلعان كورمەسىندە قازاقستاننىڭ ۇلتتىق پاۆيلونىنا قويىلاتىن وتاندىق عالىمدار مەن ۇيىمداردىڭ عىلىمي-تەحنيكالىق جوبالارىن قاراستىرۋ بويىنشا جۇمىس كەڭەسىن وتكىزدى.
قر ەنەرگەتيكا مينيسترلىگى جانىنداعى عىلىمي-تەحنيكالىق كەڭەس 139 يننوۆاتسيالىق جوبانىڭ 27-ءسىن ىرىكتەپ الدى. ازىرلەمەلەردىڭ تاقىرىبى ەنەرگيانىڭ جاڭا جاڭعىرتپالى كوزدەرىن دامىتۋ, ەنەرگيا ۇنەمدەۋ جانە ەنەرگيا تيىمدىلىگى, قورشاعان ورتاعا جاعىمسىز ىقپالدى تومەندەتۋ تەحنولوگيالارىمەن بايلانىستى.
سونىمەن قاتار, دەربەس كۇن قوندىرعىسىن, كىشى دەريۆاتسيالىق سەس, قۋاتتىلىعى 200 كۆت-قا دەيىنگى گيبريدتى جەل ەلەكتر ستانتسياسى, كومىرى بار قالدىقتاردى پلازما حيميالىق قايتا وڭدەۋ تەحنولوگيالارىن قۇرۋ جوبالارى دا قاراستىرىلدى.
ايتا كەتۋ كەرەك, اتالعان جوبالاردىڭ كەيبىرەۋى بۇگىنگى تاڭدا ىشكى نارىقتا سۇرانىسقا يە جانە ەنەرگەتيكا, تۇرعىن ءۇي-كوممۋنالدىق شارۋاشىلىعى سالالارىندا ءساتتى قولدانىستا.
باقىتجان ساعىنتاەۆ ازىرلەمەلەردىڭ اۆتورلارىمەن جوبالارعا قولداۋ كورسەتۋ جانە كوممەرتسيالاندىرۋ, جاڭا يندۋستريالاردى قۇرۋ جانە يننوۆاتسيالار سالاسىن دامىتۋ ماسەلەلەرىن تالقىلادى.
ەسكە سالا كەتەيىك, مەملەكەت باسشىسى ءوزىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىندا يننوۆاتسيالارعا قولداۋ كورسەتۋ, ولاردى وندىرىسكە جىلدام ەنگىزۋ, جوو-لار, نازارباەۆ ۋنيۆەرسيتەتى جانە «الاتاۋ» يتپ بازاسىندا عىلىمي جانە يننوۆاتسيالىق الەۋەتتى ارتتىرۋ ماسەلەلەرىنە باسا نازار اۋدارعان.