بۇگىن ورتالىق كوممۋنيكاتسيالار قىزمەتىنىڭ بريفينگىنە قاتىسقان ينۆەستيتسيالار جانە دامۋ مينيسترلىگى قۇرىلىس جəنە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ توراعاسى مارحابات جايىمبەتوۆ قازاقستاندىقتارعا ارزان يپوتەكا بەرۋدىڭ امالىن ايتتى, دەپ حابارلايدى قازاقپارات.
«مەملەكەت يپوتەكانىڭ قۇنىن ازايتۋ ءۇشىن جاڭادان سالىنعان ۇيلەردەن پاتەر ساتىپ الامىن دەگەن كىسىلەرگە 10 پايىزبەن, ال جەكە ءۇي سالامىن دەگەن ازاماتتارعا 5 پايىزبەن يپوتەكا بەرەدى. بۇل يپوتەكالار «قازاقستان يپوتەكالىق كومپانياسى» اق ارقىلى سۋبسيديالانادى», - دەدى مارحابات جايىمبەتوۆ.
تۇسىندىرە كەتسەك, «قازاقستان يپوتەكالىق كومپانياسى» قازىر ەلىمىزدەگى ەكىنشى دەڭگەيلى بانكتەرمەن كەلىسسوز جۇرگىزىپ جاتىر.
مارحابات جايىمبەتوۆتىڭ ايتۋىنشا, ولار (قۇرىلىس كوميتەتى مەن «قازاقستان يپوتەكالىق كومپانياسى - اگەنتتىك) ەكىنشى دەڭگەيلى بانكتەردى 17 پايىزبەن يپوتەكا بەرۋگە كوندىرىپ جاتىر. بۇعان كەلىسكەن بانكتەردىڭ بەرگەن 17 پايىزدىق يپوتەكاسىنىڭ 7 پايىزىن مەملەكەت سۋبسيديالايدى دا, ازاماتقا قالعان 10 پايىزى قالادى. جەكە تۇرعىن ءۇي سالامىن دەگەن ازاماتتارعا دا تۋرا وسى مەحانيزمنەن ءوتۋ كەرەك. جەكە ءۇي سالامىن دەگەن ازاماتتار ءۇشىن بۇدان دا از پايىز, ياعني, 5 پايىز كوزدەلگەن.
«وسى يپوتەكانى سۋبسيديالاۋ ءۇشىن 10 ملرد تەڭگە كوزدەلىپ وتىر. وسىنداي سۋبسيديالاۋدىڭ ارقاسىندا 600 مىڭ شارشى مەتر تۇرعىن ءۇي سالۋ جوسپارلانىپ وتىر», - دەدى جايىمبەتوۆ.
بۇل جەڭىلدىككە تۇرعىن ءۇي قۇرىلىس جيناق بانكىنىڭ سالىمشىلارى عانا يە بولا الادى.