سەنات توراعاسى بيزنەستىڭ ءوزىن-ءوزى رەتتەۋىنە جاعداي جاساۋ كەرەكتىگىنە نازار اۋداردى, دەپ جازادى palata.kz.
قر پارلامەنتى سەناتىندا «بيزنەستىڭ قۇقىعى مەن زاڭدى مۇددەسىن قورعاۋدى قامتاماسىز ەتۋ جانە «اتامەكەن» ۇلتتىق كاسىپكەرلەر پالاتاسى مەن مەملەكەتتىڭ وسى سالاداعى بايلانىسى» تاقىرىبىندا تىڭدالىم ءوتتى.
جيىندا قر پارلامەنتى سەناتىنىڭ توراعاسى قاسىم-جومارت توقاەۆ ەلىمىزدە بيزنەس احۋال جاقسارعانىنا, Dooing Bussiness دۇنيەجۇزىلىك بانك جۇرگىزگەن رەيتينگ بويىنشا قازاقستان 190 ەلدىڭ ىشىندە 35 ورىندى يەلەنگەنىن جەتكىزىپ, كاسىپكەرلىكتى قولداۋدا بىرقاتار زاڭنامالارعا وزگەرىستەر ەنگىزىلگەنىن بايانداپ, «اتامەكەن» ۇلتتىق كاسىپكەرلەر پالاتاسى مەن «دامۋ» قورى بيزنەستى قولداۋدا ايتارلىقتاي ۇلەس قوسىپ وتىرعانىنا توقتالدى.
«ءبىزدىڭ باستى ماقساتىمىز – بيزنەستى دامىتۋ ءۇشىن مەملەكەتتىڭ دە, كاسىپكەرلەردىڭ دا مۇددەسىن بايلانىستىراتىن ءتيىمدى ءارى قولايلى ورتانى قالىپتاستىرۋ. ىسكەرلىك احۋالدى جاقسارتۋدا جاسالىپ جاتقان ءىستىڭ جەتكىلىكسىز ەكەنىن كورۋگە بولادى. سەبەبى, ءبىزدىڭ ەكونوميكامىزدا ءىرى بيزنەس باسىمدىق تانىتىپ وتىر. ەكونوميكانىڭ ءارتاراپتاندىرىلۋى تۋرالى ءالى دە ايتا المايمىز. شاعىن جانە ورتا كاسىپكەرلىكتىڭ ءجىو ۇلەسى 25%-دان اسپايدى. ال دامىعان ەلدەردە بۇل كورسەتكىش 50%-دان اسادى. قازاقستان بيزنەسىنىڭ يننوۆاتسيانى قولدانۋى تومەن. 2015 جىلدىڭ قورىتىندىسى بويىنشا ءجىو-دەگى يننوۆاتسيالىق ءونىم ۇلەسى شامامەن 1%. بۇل ماسەلەنى ەگجەي-تەگجەيلى قاراپ, سەبەبىن انىقتاۋىمىز كەرەك», – دەيدى قاسىم-جومارت توقاەۆ.
سەنات توراعاسى ءوزىن-ءوزى جۇمىسپەن قامتىپ وتىرعان ازاماتتارعا, جەكە كاسىبىن اشۋعا نيەتتەنگەن جاندارعا بارىنشا قولداۋ كورسەتىپ, جاستارعا كاسىپكەرلىك نەگىزدەرىن وقىتۋدى, ولاردىڭ جەكە بيزنەستە جۇمىس ىستەۋىنە جاعداي جاساۋ كەرەكتىگىنە باسا نازار اۋداردى. سونىمەن قاتار ق.توقاەۆ شەتەلدىك ينۆەستورلارعا, سونداي-اق وتاندىق كاسىپكەرلەرگە «ءبىر تەرەزە» قاعيداسىمەن قىزمەت كورسەتۋ ماسەلەسى وزەكتى, بۇل باعىتتا كەمشىلىكتەر بار ەكەنىن جەتكىزدى. ءالى دە «ءبىر تەرەزەنىڭ» جانىنان قوسىمشا «تەرەزەلەر» اشىلىپ, منيسترلىكتەر اراسىنداعى اۋرە-سارساڭنىڭ شەشىلمەگەنىن اتاپ ءوتتى.
قاسىم-جومارت توقاەۆ: «ەلباسى اتاپ وتكەندەي, «اتامەكەن» ۇلتتىق كاسىپكەرلەر پالاتاسى ەلىمىزدە كاسىپكەرلىكتى قولداۋدا پايدالى ءىس اتقارىپ كەلەدى. وسى پارلامەنتتىك تىڭدالىم ۇلتتىق كاسىپكەرلەر پالاتاسىنىڭ بيزنەس احۋالدى جاقسارتۋداعى قىزمەتىنە دەمەۋ بولادى دەپ ويلايمىن. الداعى ۋاقىتتا سەنات تاراپى قازاقستاندا كاسىپكەرلىكتى ءساتتى دامىتۋ ءۇشىن زاڭنامالىق بازانى جەتىلدىرۋ جۇمىسىنا قاتىسۋعا دايىن», – دەپ, «اتامەكەننىڭ» جۇمىسىنا جان-جاقتى قولداۋ بولاتىنىن جەتكىزدى.
سەنات توراعاسى, مەملەكەتتىك باقىلاۋ «انىقتاۋ مەن جازا بەرۋدەن» «الدىن الۋ مەن ەسكەرتۋگە» اۋىستىرىلىپ, بيزنەستىڭ ءوزىن-ءوزى رەتتەۋىنە جاعداي جاساۋ كەرەكتىگىنە نازار اۋداردى. سونداي-اق قر ۇكىمەتىنىڭ سالىق كودەكسىن جەڭىلدەتىپ, ونى كاسىپكەرلەر ءۇشىن وڭتايلى ەتۋگە باعىتتالعان جۇمىسىنا قۋاتتاپ, زاڭنامالىق تۇرعىدا سەنات قولداۋ بىلدىرەتىنىن جەتكىزدى.
«كاسىپكەرلىگىن جۇرگىزىپ وتىرعان بيزنەستىڭ باسەكەگە قابىلەتتى بولۋىنا جان-جاقتى كومەك كورسەتۋىمىز كەرەك. ەلىمىزدىڭ كەز كەلگەن وڭىرىندە جەكە كاسىبىن باستاعىسى كەلگەن ازاماتتار قاجەتتى اقپاراتتاردى تولىق ءارى تەگىن الۋى ءتيىس. ياعني قانداي سالادا بيزنەس اشقان قولايلى, قانداي قىزمەتتەر سۇرانىستا, قانداي قولداۋ شارالارى بار ەكەندىگى, بيزنەستى تەز ارادا قالاي اشۋ كەرەكتىگى جايىندا ماعلۇمات قولجەتىمدى بولۋى كەرەك. «اتامەكەن» اتالعان جۇمىستى جۇرگىزۋدە, قاجەتتى اقپارات دايىندالعان. ەندى جەرگىلىكتى اكىمدىكتەر وسى باعىتتا بىرلەسە جۇمىس اتقارۋى كەرەك», – دەدى قاسىم-جومارت توقاەۆ.