الماتىنىڭ «كوك بازارىندا» جاڭادان ساۋدا ورتالىعى اشىلدى, دەپ حابارلايدى قازاقپارات.
بۇل ساۋدا ورتالىعى سالىنعانعا دەيىن جىلۋ بەرىلمەگەن دۇڭگىرشەكتەردە ساۋدا جۇرگىزىلىپ, ەشقانداي جاعداي جاسالماعان بولاتىن. 2015 جىلى اتالعان ورىنعا ساۋدا ورتالىعىن سالۋ تۋرالى شەشىم شىعارىلدى. نىساننىڭ جالپى كولەمى 19 مىڭ شارشى مەتر.
«كوك بازاردىڭ» ديرەكتورى ەرلان قاليەۆ جوبا قۇرىلىسىن جۇزەگە اسىرۋعا 2,5 ملرد تەڭگە ءبولىنىپ, 500 جاڭا جۇمىس ورنى اشىلعانىن ايتتى. جاڭا ساۋدا ورنىندا 400 كولىككە ارنالعان جەراستى پاركينگ تە بار. ساۋدا كەشەنىندە ءورت قاۋىپسىزدىگى, سالقىنداتۋ جۇيەسى جاسالعان.
«ءبىزدىڭ بازاردى جاڭعىرتۋدىڭ ءبىر كەزەڭى اياقتالدى. جۇمىس ءارى قاراي جالعاسا بەرەتىن بولادى. قازىرگى ەسكي بازار عيماراتىنا كۇردەلى جوندەۋ جۇمىستارىن جۇرگىزۋدى جوسپارلاپ وتىرمىز, سونىمەن قاتار, جىبەك جولى كوشەسىنەن كىرەتىن كىرەبەرىستەردى جاڭعىرتپاقپىز. بارلىعى اقىرىنداپ جۇزەگە اسادى, ۋاقىت مولشەرىن ناقتى ايتا المايمىن», - دەدى ە.قاليەۆ.
جۋرناليستەر اراسىنان بازارداعى باعا بۇگىنگى اشىلۋ سالتاناتىنا وراي, ادەيى تومەندەتىلىپ وتىرعان بولۋى مۇمكىن دەگەن ساۋال قويىلدى.
«باعانى كورسەتۋ ءۇشىن وتىرىك تومەندەتىپ وتىرعانىمىز جوق. بۇرىن قانداي باعا بولدى, سول باعامەن قازىر دە ساتىپ وتىرمىز. مۇندا قىمبات ەمەس, ەشتەڭە قىمباتتاعان دا جوق», - دەدى بازار باسشىسى بۇل سۇراققا.
بازاردا ساۋدا جاساۋشى ەلەنا كليموۆا مەن سۆەتلانا كوزىرەۆا بۇگىن بازاردىڭ اشىلۋىندا كوزبوياۋشىلىقپەن جالعان تومەن باعا قويماعانىن ايتتى.
«ءبىزدىڭ تاۋارلاردىڭ باعاسى وزگەرگەن جوق. سەبەبى, جاڭادان اشىلعاندىقتان, ساتىپ الۋشىلار كوپ كەلىپ جاتقان جوق. ساۋدا ورنىمىزدىڭ 1 شارشى مەترىن 7 مىڭ تەڭگەدەن جالداپ وتىرمىز. ەگەر كولىكتى كىرگىزەتىن بولسا, بۇرىنعىداي, وندا ءتىپتى جاقسى بولار ەدى», - دەدى ساۋداگەرلەر «قازاقپارات» تىلشىسىمەن بولعان اڭگىمەدە.