وڭتۇستىك قازاقستان وبلىسىنىڭ اكىمى جانسەيىت تۇيمەباەۆ كوكتەمگى سۋ تاسقىنىنىڭ الدىن الۋ جۇمىستارىمەن تانىسۋ ماقساتىندا سىرداريا وزەنى جانە شاردارا سۋ قويماسى مەن كوكساراي سۋ رەتتەگىشىن تىكۇشاقتان شولىپ ءوتىپ, ماقتاارال اۋدانىندا تاسقىن زارداپتارىن جويۋ جونىندەگى قۇرىلعان شتابتىڭ ەسەبىن تىڭدادى.
ايتا كەتيىك, 16-19 اقپان كۇندەرى وبلىستا جاۋعان نوسەرلى جاۋىننىڭ سالدارىنان ماقتاارال اۋدانى تۇرعىندارىنىڭ ءۇي اۋلالارىن سۋ باسقان بولاتىن. وسىعان بايلانىستى اۋداندا توتەنشە جاعدايلاردىڭ الدىن الۋ بويىنشا ارنايى شتاب قۇرىلىپ, تاۋلىك بويىنا ۇزدىكسىز جۇمىستار جۇرگىزدى.شۇعىل اتقارىلعان جۇمىستاردىڭ ناتيجەسىندە اۋدان بويىنشا 90696 تەكشە مەتر سۋ سورىلدى. ال سۋلاردى كەتىرۋ ءۇشىن 715 مەتر ور قازىلىپ, ۇزىندىعى 30 مەتر جاعالاۋلاردا نىعايتۋ جۇمىستارى جۇرگىزىلدى.
اۋدانعا جاساعان ساپارى بارىسىندا وبلىس اكىمىنە تولاسسىز جاۋعان جاۋىننىڭ سالدارىنان اتاكەنت كەنتىنىڭ قاجىمۇقان, س.مۇقانوۆ, سەيفۋللين كوشەلەرى بويىندا ورنالاسقانسۋ باسقان ۇيلەردىڭ اۋلالارىن تازارتۋ بويىنشا اتقارىلعان جۇمىستاردى ماقتاارال اۋدانىنىڭ اكىمى ع.يسمايلوۆ باياندادى. ونىڭ ايتۋىنشا, سۋ باسۋ نەگىزىنەن اتاكەنت كەنتىنە جاقىن ورنالاسقان ماقتالىق القاپتاردا جاپپاي سور شايۋ جۇمىستارىنىڭ جۇرگىزىلۋى مەن جەر استى سۋلارىنىڭ كوتەرىلۋى جانە يەسىز قالعان سۋ ارنالارىنىڭ تازارتىلماۋىنان ورىن العان.
«تولاسسىز جاۋىن-شاشىن سالدارىنان كانالدار تولىپ, اعىن سۋ تۇرعىن ۇيلەرگە تاسىعان. بۇعان ءبىر سەبەپ رەتىندە سۋ ارنالارىنىڭ ءىشىن قامىس باسىپ, ساز بالشىقتىڭ تازالانباۋىن ايتۋعا بولادى. كانالدىڭ قورعانىس بوگەتتەرىندەگى جاعالاۋلاردىڭ 1-2 شاقىرىم كولەمىندەگى توپىراعىن جەرگىلىكتى تۇرعىندار الىپ, قۇرىلىس جۇمىستارىنا پايدالانعان»,-دەدى اۋدان اكىمى.
وسى رەتتە, ايماق باسشىسى سۋ تاسۋ قاۋىپسىزدىك شارالارىن ساقتاماعان سۋ ارنالارىنىڭ مەنشىك يەلەرىنە ەسكەرتۋ بەرۋدى جانە يەسىز قالعان سۋ ارنالارىن مەملەكەت مەنشىگىنە ياعني, «قازسۋشار» مەكەمەسىنىڭ قۇزىرىنا بەرۋدى, ونى تازالاۋ, رەتتەۋ جۇمىستارىن جۇرگىزۋدى تاپسىردى. سونداي-اق, جەر استى سۋلاردى رەتتەۋ ماقساتىندا بارلىق درەناجداردىڭ جۇمىس ىستەۋ قابىلەتىن قايتا قالپىنا كەلتىرىپ, ولاردىڭ دۇرىس دەڭگەيدە كۇتىپ ۇستالۋىن جانە پايدالانۋىن قامتاماسىز ەتۋدى جۇكتەدى.
مۇنان سوڭ, اكىم شاردارا سۋ قويماسى مەن كوكساراي سۋ رەتتەگىشىنىڭ بۇگىنگى جاي كۇيىمەن تانىسىپ, جاۋاپتى سالا ماماندارىنا اياق استى بولۋى مۇمكىن تاسقىن سۋعا ساقاداي ساي بولۋ قاجەتتىگىن ەسكەرتتى.
«قازگيدرومەت» اۋا-رايىن بولجاۋ ورتالىعىنىڭ مالىمەتىنە سۇيەنسەك, كوكتەمدە كوپ مولشەردە جاۋىن-شاشىن كۇتىلۋدە. بۇگىنگى ارالاۋدىڭ ماقساتى دا وسى تابيعي قاۋىپتىڭ الدىن الۋ بولىپ تابىلادى. ياعني, توتەنشە جاعدايلاردىڭ الدىن الۋ مەن ولاردى جويۋ شارالارى سالا جەتەكشىلەرىنىڭ نازارىندا.
«بۇگىن كوكتەمدە كوپ مولشەردە جاۋاتىن جاڭبىرعا بايلانىستى سۋ تاسقىنى بولۋى مۇمكىن وزەندەرگە باسا نازار اۋدارىپ وتىرمىز. سوندىقتان, اۋدان اكىمدەرى مەن ءتيىستى سالا باسشىلارىنا تۇراقتى مونيتورينگ جۇمىستارىن جۇرگىزىپ وتىرۋدى تاپسىرامىن. كەيدە سينوپتيكتەر بولجاماعان جايتتار ورىن الىپ جاتادى. سوندىقتان, سىزدەر, ءاردايىم دايىن بولۋلارىڭىز قاجەت», - دەدى ءوڭىر باسشىسى ج.تۇيمەباەۆ سۋ قويمالارىنىڭ جاعدايىمەن تانىسۋ بارىسىندا.
«قازسۋشار» مەملەكەتتىك مەكەمەسىنىڭ مالىمدەۋىنشە, سىرداريا وزەنىنەن سۋ تاسۋ قاۋپى جوق. جاعداي تۇراقتى.
«بۇگىنگى تاڭدا شاردارا سۋ قويماسىنا تاۋلىگىنە 1500 تەكشە مەتر سۋ كەلۋدە. ودان 1200 تەكشە مەتر سۋ شىعىپ جاتىر. ال 250 تەكشە مەتر سۋ جينالۋدا. ياعني, سۋ قويمانىڭ دەڭگەيى تاۋلىگىنە 3 سم كوتەرىلۋدە. بۇل قالىپتى جاعداي. جالپى سۋ قويماعا جينالعان سۋدىڭ كولەمى 4 ملرد. 293 ملن. تەكشە مەتردى قۇراپ وتىر. جينالعان سۋدىڭ 400 تەكشە مەترى ارناساي سۋ قويماسىنا تاستالىنۋدا. سونىمەن قاتار, شاردارا سۋ قويماسىنان 500 ت.م. سۋ كوكسارايعا, ال 350 ت.م. سۋ سىرداريا ارقىلى قىزىلورداعا جىبەرىلۋدە»,-دەدى «قازسۋشار» رمك وقو فيليالىنىڭ باس ينجەنەرى ت.بالتيكوۆ.
كوكساراي سۋ رەتتەگىشى سىرداريا ساعاسىمەن جوعارىدان اعىپ كەلەتىن سۋدى قانشا بولسا دا قابىلداپ الۋعا دايىن. ويتكەنى, سىيىمدىلىعى 3 ملرد. تەكشە مەتردەن اساتىن نىساندا جينالعان سۋ بۇگىندە 75 پايىزدى قۇرايدى.
بۇگىندە كورشى وزبەكستان مەملەكەتىنەن تاۋلىگىنە 1500 تەكشە مەتر سۋ كەلىپ جاتسا, 1 ناۋرىزدان كەيىن بۇنىڭ كولەمى تومەندەيتىن بولادى. ياعني, وڭتۇستىك قازاقستان وبلىسىنداعى ەلدى مەكەندەرگە سۋدان كەلەر قاۋىپ جوق.