سىرتقى ىستەر مينيسترلىگىندە قازاقستاننىڭ مالايزياداعى توتەنشە جانە وكىلەتتى ەلشىسى دانيار سارەكەنوۆتىڭ قاتىسۋىمەن جۋرناليستەرگە ارنالعان بريفينگ ءوتتى. ەكى ەل اراسىنداعى ديپلوماتيالىق قارىم-قاتىناس ورناۋىنىڭ 25 جىلدىعىنا وراي ۇيىمداستىرىلعان شارا اياسىندا ساياسي-ەكونوميكالىق ارىپتەستىكتىڭ جاي-كۇيى باياندالدى.
ەلشىنىڭ ايتۋىنشا, قازاقستان مەن مالايزيا – ءبىر-بىرىنەن قاشىق ورنالاسقان ەلدەر. سوندىقتان الىس-بەرىس پەن بارىس-كەلىستىڭ كورسەتكىشتەرى كەرەمەت دەپ ايتۋعا كەلمەيدى. دەگەنمەن, اۋىزدى قۇر ءشوپپەن سۇرتۋگە دە بولمايدى ەكەن. «وتكەن جىلى ەكى ەل اراسىنداعى ساۋدا اينالىمى 300 ملن اقش دوللارى شاماسىندا بولسا, ونىڭ 155,7 ملن-ىن ەكسپورت, 138,69 ملن دوللارىن يمپورت قۇراعان. ال ءبىزدىڭ ەلدەن قارا مەتالل ونىمدەرى مەن ودان جاسالعان بۇيىمدار, گەودەزيكالىق ءجانە ولشەۋ قۇرالدارى, ءتۇرلى ولشەمدى قۇبىرلارعا ارنالعان فيتينگىلەر شىعارىلسا, مالايزيادان كەلەتىن تاۋارلاردىڭ ىشىندە جەڭىل ونەركاسىپ ونىمدەرى مەن ەلەكترونيكا, قۇرال-سايماندار مەن بولشەك بۇيىمدار بار. ەكسپو كورمەسى ارقىلى الەم ەلدەرىن «جاسىل ەكونوميكاعا» كوشۋدى ۇسىنعان قازاقستاننىڭ باستاماسىن قولدايتىن مالايزيا سوڭعى ۇلگىدەگى تەحنولوگيالىق ءتاجىريبەلەرىمەن دە بولىسۋگە دايىن ءارى وسى باعىتتا ءوزارا ىنتىماقتاستىق ورناعان», – دەدى د.سارەكەنوۆ.
شيرەك عاسىر ىشىندە قازاقستان مەن مالايزيا اراسىندا مادەني-گۋمانيتارلىق ارىپتەستىك تە ورناپ ۇلگەرگەن. اسىرەسە, قازاقستان-مالايزيا ءبىرلەسكەن جۇمىس توبى قۇرىلۋىنىڭ ناتيجەسىندە بۇگىنگى تاڭدا مالايزيادا 1,5 مىڭعا جۋىق ستۋدەنت ءتۇرلى سالا بويىنشا ءبىلىم الۋدا. سونداي-اق, 2012 جىلدان بەرى اتالعان ەلدە قازاق ادەبي ورتالىعى دا جۇمىس ىستەيتىندىگىن قاپەرلەرىڭىزگە سالا كەتەيىك.
بريفينگ بارىسىندا ەلشى ايرىقشا اتاپ وتكەن دەرەكتىڭ ءبىرى – ينۆەستيتسيالىق ساياسات پەن عىلىمي-تەحنيكالىق جانە يننوۆاتسيالىق باعىتتاعى بايلانىستاردىڭ دا نىعايىپ كەلە جاتقانى بولدى. بۇگىنگى تاڭدا ەلىمىزدىڭ اۋىل شارۋاشىلىعى مەن قۇرىلىس سالاسى جانە مۇناي-گاز جوبالارىن جۇزەگە اسىرۋ بويىنشا كوپتەگەن مالايزيالىق بىرلەسكەن كومپانيالار قىزمەت كورسەتەدى. ولار وتكەن جىلدىڭ وزىندە قازاقستانعا ينۆەستيتسيا رەتىندە ايتارلىقتاي قارجى قۇيعان بولسا, سونىڭ ىشىندە سونى تەحنولوگيالار مەن يننوۆاتسيالىق جاڭاشىلدىقتاردىڭ وندىرىسكە ەنگىزىلۋىنە باسىمدىقتار بەرىلىپتى.
نۇرلىبەك دوسىباي,
«ەگەمەن قازاقستان»