كەشە ۇكىمەتتە «ۇلت ساۋلىعى – مەملەكەت باسەكەلەستىگىنىڭ كەپىلى» تاقىرىبىندا ءباسپاسوز ءماسليحاتى ءوتتى. جيىنعا دەنساۋلىق ساقتاۋ ءمينيسترى ەلجان ءبىرتانوۆ, مەديتسينالىق جانە فارماتسەۆتيكالىق قىزمەتتى باقىلاۋ كوميتەتى توراعاسىنىڭ ورىنباسارى لاريسا پاك, «الەۋمەتتىك مەديتسينالىق ساقتاندىرۋ قورى» كوممەرتسيالىق ەمەس اكتسيونەرلىك قوعامىنىڭ ءتورايىمى ەلەنا باحمۋتوۆا, رەسپۋبليكالىق ەلەكتروندى دەنساۋلىق ساقتاۋ ورتالىعىنىڭ باس ديرەكتورى ولجاس ابىشەۆ قاتىستى.
دەنساۋلىق ساقتاۋ ءمينيسترى ەلجان ءبىرتانوۆ ءوز سوزىندە ەلباسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى حالىققا جولداۋىندا دەنساۋلىق ساقتاۋ جۇيەسىنىڭ الدىنا مىندەتتى الەۋمەتتىك مەديتسينالىق ساقتاندىرۋدى ء(مامس) ەنگىزۋ, جەكە مەديتسينالىق ۇيىمدارعا ساقتاندىرۋ جۇيەسىندە تەڭ جاعداي جاساۋ, دەنساۋلىق ساقتاۋ سالاسىن ءتيىستى دەڭگەيدە اقپاراتتاندىرۋ, بارلىق ءدارى-دارمەكتەرگە باعانى مەملەكەتتىك دەڭگەيدە رەتتەۋ تۋرالى ناقتى تاپسىرما بەرگەنىن اتاپ ءوتتى.
«بيىل اقپان ايىندا مەديتسينالىق قاۋىمداستىق, جۇمىس بەرۋشىلەر مەن حالىقتىڭ اراسىندا مىندەتتى الەۋمەتتىك مەديتسينالىق ساقتاندىرۋ جۇيەسىنە بايلانىستى اقپاراتتىق-ءتۇسىندىرۋ جۇمىستارىنىڭ ءۇشىنشى كەزەڭى باستالدى. بۇل شارانى جۇرگىزۋ ءۇشىن ءاربىر وبلىستا, الماتى, استانا قالالارىندا اكىمدەر مەن ولاردىڭ ورىنباسارلارىنىڭ باسشىلىعىمەن ايماقتىق شتابتار جۇمىس ءىستەۋدە. اقپاراتتىق-ءتۇسىندىرۋ جۇمىستارىنا رەسپۋبليكالىق شتاب قۇرامىنىڭ بەلگىلى دارىگەرلەرى, قوعام قايراتكەرلەرى, مەديتسينالىق وقۋ ورىندارىنىڭ وقىتۋشىلارى, قۇرىلىمدىق بولىمدەردىڭ باسشىلارى شاقىرىلدى. جالپى العاندا, ءمامس-ءتى ەنگىزۋ قازاقستاندىقتاردىڭ دەنساۋلىعىن جاقسارتۋعا, ءومىر ءسۇرۋ ۇزاقتىعىن ارتتىرۋعا, ساپالى مەديتسينالىق كومەكتى قولجەتىمدى جانە حالىقتىڭ سۇرانىسىنا ساي ەتۋگە, امبۋلاتورلىق دەڭگەيدە دارىمەن قامتاماسىز ەتۋدىڭ اياسىن كەڭەيتۋگە, دەنساۋلىق ساقتاۋ جۇيەسىندەگى بەيرەسمي تولەمدەر كولەمىن ازايتۋعا مۇمكىندىك بەرەدى», دەدى مينيستر.
دەنساۋلىق ساقتاۋ مينيسترلىگى مەن دۇنيەجۇزىلىك بانك ساراپشىلارى 57 ەلدىڭ تاجىريبەسى ەسكەرىلگەن زاڭ جوباسىن 3 جىل كولەمىندە دايىنداپ, ءتيىمدى مودەل ۇسىنعاندارىن ايتىپ وتكەن بولاتىنبىز. ال اتالمىش مەديتسينالىق ساقتاندىرۋ قورىنا تولەم جاساۋ جونىنەن حالىقتىڭ ءالى دە كوپ بولىگى حابارسىز. وسى توڭىرەگىندە «الەۋمەتتىك مەديتسينالىق ساقتاندىرۋ قورى» اق توراعاسى ەلەنا باحمۋتوۆا مەديتسينالىق ساقتاندىرۋ قورىنا تولەم جاساۋشىلاردىڭ جىلدىق قاراجاتىن تىلگە تيەك ەتتى. «جالپى العاندا, جۇمىس بەرۋشى جىلىنا ءبىر قىزمەتكەرگە 30 550 تەڭگە تولەسە, قىزمەتكەردىڭ ءوزى 20 470 تەڭگە كولەمىندە, جەكە كاسىپكەر 35 560 تەڭگە جانە جۇمىسسىز توپ 17 818 تەڭگە, ال مەملەكەت زەينەتكەرلەر مەن مۇگەدەكتەرگە, وزگە دە الەۋمەتتىك جەڭىلدىگى بار جاندار ءۇشىن 71 160 تەڭگە تولەيتىن بولادى», دەدى ول.
جيىنعا قاتىسۋشىلار كەزەڭ-كەزەڭمەن پاتسيەنتتەردىڭ مەديتسينالىق قىزمەتكەرلەرگە وزدىگىنەن ونلاين جازىلۋ, ونلاين تارتىپتە ەلەكتروندى دەنساۋلىق پاسپورتىندا جيناقتالعان تەحنولوگياسىنىڭ كومەگىمەن پاتسيەنتتەرگە كەڭەس بەرۋ مەن ولاردى باقىلاۋ ەنگىزىلەتىنىن العا تارتتى.
راۋان قايدار,
«ەگەمەن قازاقستان»