ۇلتتىق بانككە ارنايى ۆاليۋتالىق رەجيمدى ەنگىزۋ مىندەتى بەرىلۋى مۇمكىن

قر ادىلەت مينيسترلىگى قازاقستاندا ارنايى ۆاليۋتالىق رەجيمدى ەنگىزۋ مىندەتىن ۇلتتىق بانككە بەرۋدى ۇسىنىپ وتىر, دەپ حابارلايدى قازاقپارات. «قازىرگى كەزدە اتالعان رەجيم ۇكىمەت اكتىسىمەن ەنگىزىلەدى. بۇل ماسەلە پرەزيدەنت دەڭگەيىنە دەيىن شىعارىلادى. الايدا ول ناقتى سالاعا بايلانىستى بولعاننان كەيىن تازا ۇلتتىق بانكتىڭ قۇزىرەتىنە بەرىلۋى كەرەك. ءبىز ارنايى ۆاليۋتالىق رەجيمدى ەنگىزۋدى ۇلتتىق بانككە بەرۋدى ۇسىنىپ وتىرمىز. الايدا بانك الدىمەن ۇكىمەتپەن كەڭەسىپ الۋى شارت. سەبەبى ارنايى ۆاليۋتالىق رەجيم تىكەلەي ەكونوميكاعا اسەر ەتىپ وتىر», - دەيدى ادىلەت ۆيتسە-ءمينيسترى زاۋرەش بايمولدينا. ونىڭ ايتۋىنشا, ازىرشە ۇلتتىق بانك اتالعان مىندەتتى ءوز موينىنا الۋعا كەلىسپەي وتىر. ايتا كەتەيىك, بۇگىن ادىلەت مينيسترلىگىندە بيلىك تارماقتارى اراسىندا وكىلەتتىلىكتەردى قايتا ءبولۋ ماسەلەلەرىن تالقىلاۋعا ارنالعان قوعامدىق تىڭداۋلار وتكەن بولاتىن. ۆيتسە-مينيستر زاۋرەش بايمولدينانىڭ ايتۋىنشا, ناۋرىزدىڭ 15-سىنە دەيىن اتالعان ەكى زاڭ جوباسىن پارلامەنتتىڭ قاراۋىنا ەنگىزۋ كوزدەلىپ وتىر.  قۇجاتتاردىڭ تولىق اتاۋى - "قر كەيبىر زاڭنامالىق اكتىلەرىنە مەملەكەتتىك بيلىكتىڭ تارماقتارى اراسىندا وكىلەتتىلىكتەردى قايتا ءبولۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ جوباسىنىڭ تۇجىرىمداماسى جانە "قر كەيبىر كونستيتۋتسيالىق زاڭدارىنا مەملەكەتتىك بيلىكتىڭ تارماقتارى اراسىندا وكىلەتتىلىكتەردى قايتا ءبولۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ جوباسىنىڭ تۇجىرىمداماسى. اتالعان ەكى قۇجاتتى دا ادىلەت مينيسترلىگى ازىرلەپ وتىر. بۇعان دەيىن وتكەن زاڭ جوبالاۋ قىزمەتى ماسەلەلەرى جونىندەگى ۆەدومستۆوارالىق كوميسسيانىڭ كەزەكتى وتىرىسىندا بايمولدينا حانىم بيلىك وكىلەتتىلىكتەرىن قايتا بولگەننەن كەيىن ۇكىمەت مۇشەلەرىنىڭ جاۋاپكەرشىلىگى قالايشا وزگەرەتىنى جايىندا ايتىپ بەرگەن.