ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە استانا قالاسى قازاقستان حالقى اسسامبلەياسىنىڭ قوعامدىق قۇرىلىمدارى مەن ەلدەگى ەتنومادەني بىرلەستىكتەردىڭ وكىلدەرى «جاس وتان» جاستار قاناتىنىڭ مۇشەلەرىمەن كەزدەستى.
شاراعا پارلامەنت ءماجىلىسىنىڭ دەپۋتاتتارى, قازاقستان حالقى اسسامبلەياسى قوعامدىق كەلىسىم كەڭەستەرىنىڭ ءمۇشەلەرى, جاستار ۇيىمدارىنىڭ جەتەكشىلەرى, ساراپشىلار قاتىستى.
كەزدەسۋ بارىسىندا ەلباسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى قازاقستان حالقىنا جولداۋى, سونداي-اق, مەملەكەت باسشىسىنىڭ كونستيتۋتسيالىق رەفورماسى بويىنشا ۇسىنىستار ازىرلەۋ ماسەلەسى تالقىلاندى.
شاراعا قاتىسۋشىلار ساياسي جۇيەنى جاڭعىرتۋ – بۇل مەملەكەتتىلىكتى نىعايتۋ, بيلىكتىڭ ءۇش تارماعىنىڭ ءوزارا وڭتايلى ءىس-قيمىل جاساۋى جانە ولاردىڭ ارقايسىسىنىڭ جاۋاپكەرشىلىگىن ارتتىرۋ ارقىلى جۇزەگە اساتىن ۇدەرىس ەكەنىن جەتكىزدى. سونىمەن قاتار, ولار مەملەكەتتىك بيلىك جۇيەسىن رەفورمالاۋ ءۇشىن بەس ينستيتۋتتىق رەفورمانى ءىسكە اسىرۋعا قولايلى جاعدايلاردى قامتاماسىز ەتۋگە ءمان بەرۋ قاجەتتىگىنە توقتالدى.
بۇل كۇنگى جيىن اياسىندا ۇكىمەتتىڭ جانە اتقارۋشى بيلىكتىڭ پارلامەنت پەن جەرگىلىكتى وكىلەتتى ورگانداردىڭ الدىندا ەسەپ بەرۋ تەتىگىن كۇشەيتۋ ماسەلەسى قارالىپ, بۇل ءوز كەزەگىندە قازاقستاندى دەموكراتيا جولىندا ودان ءارى سەنىمدى تۇردە ىلگەرىلەتۋ بويىنشا جاسالاتىن وڭ قادام ەكەنى ايتىلدى. سونداي-اق, جالپى, مەملەكەتتىك بيلىك جۇيەسىنە جاسالاتىن رەفورمانىڭ نەگىزىندە قازىرگى زاماننىڭ جاھاندىق جانە وڭىرلىك سىن-قاتەرلەرىنىڭ الدىن الۋ جولدارى قاراستىرىلاتىنىنا نازار اۋدارىلدى.
ءلايلا ەدىلقىزى,
«ەگەمەن قازاقستان»