قوستانايدا جەردى, اۋانى تازا ۇستاۋدى ماقسات تۇتقان «جاسىل مىندەتتىڭ» قولعا الىنعانى كوپشىلىكتى قۋانتىپ وتىر. وبلىس ورتالىعىنداعى «مارت» ساۋدا-كوڭىل كوتەرۋ ورتالىعىنا ورنالاسقان «تەحنودوم» ساۋدا ۇيىنە قىزعىلت سارى ءتۇستى ءۇش كونتەينەر-جاشىك قويىلدى. وعان تۇرعىندار ىستەن شىققان باتارەيالار مەن ەسكىرگەن ەلەكتر قۇرالداردى, جابدىقتاردى اكەلىپ تاستايدى.
– ەلىمىزدە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە «جاسىل ەكونوميكاعا» كوشۋى ءماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ قابىلدانعان بولاتىن. بۇل زاڭ شىرىمەيتىن قاتتى قالدىقتاردى باسقارۋ, اۋانىڭ لاستانۋىن, قورشاعان ورتانى جاقسارتاتىن جانە ءومىردىڭ ەكولوگيالىق ساپاسىن ارتتىراتىن ينستيتۋتتىق تەتىككە كوشۋ شارالارى سەكىلدى كوپتەگەن جۇمىستاردى قامتيدى. وسىعان سايكەس, بار وڭىردە قاتتى قالدىقتاردى ارنايى جيناۋ جۇمىستارى باستالىپ كەتتى. ىستەن شىققان ەلەكترلىك قۇرالدار مەن ءتۇرلى باتارەيالاردى جيناۋ اكتسياسىن ۇيىمداستىرۋ تۋرالى ەنەرگەتيكا مينيسترلىگىنىڭ باستاماسىن قولداعان «تەحنودوم» ءىرى ساۋدا ورتالىعى «تابيعاتتى سۇيەمىز, قازاقستاندى سۇيەمىز!» جوباسىمەن ىسكە كىرىستى. ولار ەلىمىزدەگى الماتى مەن استانادان باستاپ, 26 قالادا 126 كونتەينەر قويعان ەدى. مىنە, جاقسى ءىس قوستانايعا دا جەتتى, – دەيدى وبلىستىق ەكولوگيا دەپارتامەنتىنىڭ مەملەكەتتىك ەكولوگيالىق ينسپەكتورى سەرگەي مۇقاشەۆ.
«تەحنودوم» ساۋدا ورتالىعى قىزمەتكەرلەرىنىڭ ايتۋىنشا, كونتەينەرلەر ىستەن شىققان باتارەيالار مەن ەسكى ەلەكتر قۇرالدارىنا تولعاننان كەيىن, ولاردى قايتا وڭدەۋ ءۇشىن زاۋىتتارعا جىبەرەدى. وكىنىشكە قاراي, قوستانايدا ءالى مۇنداي قالدىقتاردى وڭدەيتىن زاۋىت جوق.
– تۇرعىندار قازىر ساۋاتتى, ەلەكتر باتارەيالارىنىڭ تابيعاتقا قاۋىپتى ەكەنىن ءتۇسىنۋى ءتيىس. وندا اسا ۋلى حيميالىق ەلەمەنتتەر, سىناپ, اۋىر مەتالدار بار. ءبىر باتارەيا 20 شارشى مەتر توپىراقتى ۋلايدى, – دەيدى سەرگەي مۇقاشەۆ.
سوڭعى كەزدەردە قوستاناي كوشەلەرىندەگى, شاعىن اۋداندارداعى قاتتى قالدىق تاستايتىن ورىنداردا پوليەتيلەن قۇتىلارعا, قولدانىستان شىققان لامپالارعا, شىنىلارعا ارنالعان كونتەينەرلەر پايدا بولدى. مۇنىڭ بارلىعى «جاسىل ەكونوميكاعا» عانا ەمەس, «جاسىل الەمگە» باستايتىن جول بولىپ تابىلادى.
ءنازيرا جارىمبەتوۆا,
«ەگەمەن قازاقستان»
قوستاناي