ءو.جولداسبەكوۆ اتىنداعى ستۋدەنتتەر سارايىندا ماتەماتيكا, فيزيكا جانە ينفورماتيكا پاندەرىنەن ءحIIى حالىقارالىق جاۋتىكوۆ وليمپياداسىنىڭ جابىلۋ سالتاناتى ءوتتى. 12-18 قاڭتار ارالىعىندا ءبىلىم جانە عىلىم مينيسترلىگىنىڭ جانە الماتى قالاسى اكىمدىگىنىڭ قولداۋىمەن وتكەن ءداستۇرلى ءبىلىم دوداسىنا بيىل رەسەي, گرۋزيا, بەلورۋسسيا, بولگاريا, رۋمىنيا, موڭعوليا, وزبەكستان, تۇرىكمەنستان, ازەربايجان سياقتى الەمنىڭ 15 ەلىنەن 401 وقۋشىدان تۇراتىن 62 كوماندا قاتىسقان بولاتىن. بۇل ايگىلى ءبىلىم دوداسىندا قازاقستان اتىنان 144 وقۋشى باعىن سىناپ كوردى.
بيىلعى وليمپيادانىڭ ەرەكشەلىگى – ەلىمىزدىڭ ءار وبلىسىنان قۇراما كوماندالار قاتىستى. «حالىقارالىق دارەجەدەگى مۇنداي وليمپيادالارعا العاش قاتىسىپ وتىرعان بالالالار ءۇشىن بۇل سايىس ۇلكەن تاجىريبە بولدى. جالپى, قازاق بالالارى ەكى نارسەدەن مىقتى ءتۇسىپ جاتادى: بىرەۋى بوكستان, ەكىنشىسى ماتەماتيكادان», – دەپ پروفەسسور اسقار جۇمادىلداەۆ ايتقانداي, ءجاۋتىكوۆ وليمپياداسىندا ەلىمىز تالاي حالىقارالىق وليمپيادالاردا وزگەلەردەن وزا شاۋىپ, الەمدىك دەڭگەيدەگى مىقتى مەكتەپتەرمەن باسەكەگە ءتۇسىپ جۇرگەن رەسپۋبليكالىق فيزيكا-ماتەماتيكا مەكتەبىنە ايرىقشا ءۇمىت ارتقان ەدى. ءۇمىت ۇدەدەن شىققانداي.
ساراپشى مامانداردىڭ ايتۋىنشا, وليمپيادا سۇراقتارى بىلتىرعى جىلمەن سالىستىرعاندا, الدەقايدا كۇردەلى بولدى. سوندىقتان زياتكەرلىك سايىسىندا بابى مەن باعى قاتار جانعان دارىندى بالالار عانا جەڭىسكە جەتە الدى. وليمپيادا قورىتىندىسى بويىنشا, قازاقستانداعى, الىس-جاقىن شەتەلدەگى 7 مامانداندىرىلعان مەكتەپتىڭ قۇراماسى ۇزدىك كوماندالار اتاندى. ونىڭ ىشىندە ماسكەۋدەن كەلگەن №1329 مەكتەپ ەڭ ۇزدىك كوماندا رەتىندە گران-پريگە يە بولدى.
كوماندالىق 1-ورىندى سەربيا استاناسى بەلگرادتان كەلگەن مەكتەپ وقۋشىلارى جەڭىپ السا, 2-ورىندى رەسەيدىڭ سانكت-پەتەربۋرگ قالاسىنىڭ №239 فيزيكا-ماتەماتيكا ليتسەيى مەن چەليابى قالاسىنىڭ №31 ليتسەيى ءبولىستى. 3-ورىنعا جاۋتىكوۆ اتىنداعى رەسپۋبليكالىق مەكتەپ (قازاقستان), تبيليسيدەن كەلگەن ۆ.كوماروۆ اتىنداعى №199 فيزيكا-ماتەماتيكا مەكتەبى (گرۋزيا) جانە ماسكەۋ مەملەكەتتىك ۋنيۆەرسيتەتىنىڭ (رەسەي) مامانداندىرىلعان وقۋ-عىلىمي ورتالىعىنىڭ كومانداسى لايىق دەپ تانىلدى. ۇزدىك كوماندالاردىڭ ءار مۇشەسىنە باعالى سىيلىقتار مەن ارنايى ماراپات قاعازدارى تابىس ەتىلدى.
وليمپيادادا ساراپقا سالىنعان 198 مەدالدان جەكەلەي بىرىنشىلىك بويىنشا 40 التىن, 61 كۇمىس جانە 97 قولا مەدال ۇلەستىرىلدى. قازاقستان كوماندالارى 7 التىن, 18 كۇمىس, 31 قولا, جالپى سانى 56 مەدال جەڭىپ الدى.
جوعارى دەڭگەيدە وتكەن وليمپيادانىڭ جۇلدەگەرلەرى مەن جەڭىمپازدارىنا ءال-فارابي اتىنداعى قازاق ۇلتتىق ۋنيۆەرسيتەتى, قازاق-بريتان تەحنيكالىق ۋنيۆەرسيتەتى جانە اقپاراتتىق تەحنولوگيالاردىڭ حالىقارالىق ۋنيۆەرسيتەتى ارنايى وقۋ گرانتتارىن تابىس ەتتى. سونىمەن قاتار, وليمپيادادا قابىلەت-قارىمىمەن كوزگە تۇسە بىلگەن وقۋشىلارعا ن.قاپپاروۆ اتىنداعى ارنايى سىيلىق تاعايىندالدى. ال بوستاندىق اۋدانىنىڭ اكىمدىگى «ماتەماتيكا ەسەپتەرىن ەرەكشە جولمەن شەشكەنى ءۇشىن» اتالىمىمەن جەكە ماراپاتىن تابىس ەتتى.
العاشقى «مۇشەل جاسىنا» اياق باسقان حالىقارالىق جاۋتىكوۆ وليمپياداسىن وتكىزۋدە ءبىلىم جانە عىلىم مينيسترلىگى, ءال-فارابي اتىنداعى قازۇۋ جانە الماتى قالاسىنىڭ اكىمدىگى ۇلكەن قولداۋ كورسەتكەنىن ايتا كەتۋ كەرەك. بۇكىل الەم مويىنداعان بۇل مەكتەپارالىق وليمپيادانىڭ ماقساتى وقۋشىلار اراسىندا فيزيكا-ماتەماتيكا عىلىمدارىن ناسيحاتتاۋ, حالىقارالىق ءارىپتەستىكتى نىعايتۋ, الەمدەگى ۇزدىك مامانداندىرىلعان مەكتەپتەر اراسىندا دوستىق قارىم-قاتىناس ورناتۋ, وليمپيادالار ۇيىمداستىرۋ, تاجىريبە الماسۋ جانە قازاقستاننىڭ ءبىلىم الەۋەتىن پاش ەتۋ بولىپ تابىلادى.
ميرا بايبەك,
«ەگەمەن قازاقستان»
الماتى