بۇگىندە ىشكى ىستەر مينيسترلىگىنە قاراستى ۇلتتىق ۇلاننىڭ ەلدەگى تىنىشتىقتىڭ ساقتالۋىنا قوسىپ كەلە جاتقان ۇلەسى زور. ىشكى اسكەردىڭ زاڭدى مۇراگەرى بولىپ تابىلاتىن قۇقىقتىق ءتارتىپ اسكەرىنىڭ قۇرىلعانىنا كۇنى كەشە شيرەك عاسىر تولدى. تاۋەلسىزدىكپەن تۇيدەي قۇرداس كۇشتىك قۇرىلىمنىڭ اتاۋلى كۇنىنە وراي ەلوردا تورىندە سالتاناتتى شارا ۇيىمداستىرىلدى.
قازاقستاندا تۇڭعىش رەت قۇقىقتىق ءتارتىپ اسكەرىنىڭ قۇرىلۋى كەزەڭىندە تالماي ەڭبەك ەتكەن ارداگەر ازاماتتار مەن ۇلتتىق ۇلاننىڭ جەكە قۇرامى قاتىسقان سالتاناتتى جيىندا لايىقتىلارعا سىي-قۇرمەت كورسەتىلىپ, ۇزدىك ماماندار ماراپاتتالدى.
الدىمەن ۇلتتىق ۇلاننىڭ جيىرما بەس جىلدىق ەڭبەگىن ەكشەپ, ارنايى بايانداما جاساعان ۇلتتىق ۇلان باس قولباسشىسىنىڭ ورىنباسارى, گەنەرال-مايور مۇحامەتقالي ساتوۆ الداعى ناقتى جوسپارلار مەن الار اسۋلاردى ءسوز ەتتى. سودان سوڭ, مەملەكەتىمىزدىڭ ىشكى تىنىشتىعىن قامتاماسىز ەتەتىن بۇگىنگى ۇلتتىق ۇلاننىڭ قالىپتاسۋىنىڭ باسىندا تۇرعان گەنەرالدار مەن ارداگەر وفيتسەرلەر دە تاۋەلسىزدىكتىڭ ەلەڭ-الاڭىندا اسكەر قۇرۋدىڭ قيىن شاقتارىن ءبىر ءسات ەسكە الدى. اتاپ ايتقاندا, ۇزاق جىلدار بويى ىشكى اسكەرلەر قولباسشىسى بولعان قۇرمەتتى ارداگەر, گەنەرال-پولكوۆنيك قايىربەك سۇلەيمەنوۆ پەن گەنەرال-لەيتەنانت بولات جاناساەۆ قازاقستاننىڭ ىشكى ىستەر ورگاندارى مەن ۇلتتىق ۇلان ارداگەرلەرى كەڭەسىنىڭ توراعاسى ميليتسيا گەنەرال-مايورى ومىرزاق بولسامبەكوۆ جانە ۇلتتىق ۇلان ارداگەرلەر كەڭەسىنىڭ توراعاسى گەنەرال-مايور قالياقپار توقىشەۆ سىندى سالاعا ەڭبەگى سىڭگەن ارداگەرلەر مىنبەرگە شىعىپ, جيىنعا قاتىسۋشىلارعا ءسوز ارنادى.
سونداي-اق, ۇلتتىق ۇلان ءان-بي انسامبلىنىڭ سۇيەمەلدەۋىمەن وتكەن جيىندا ۇلتتىق ۇلاننىڭ باس قولباسشىسى گەنەرال-لەيتەنات رۋسلان جاقسىلىقوۆ بىرقاتار ازاماتتاردى ماراپاتتادى. ولاردىڭ قاتارىندا مەرزىمىنەن بۇرىن شەن العاندار مەن قىزمەتتىك پاتەر كىلتىنە يە بولعاندار دا بولدى. قۋانىش يەلەرىن قۇتتىقتاعان سوزىندە رۋسلان فاتيح ۇلى جاقىن كۇندەرى الماتىدا شىمىلدىعىن اشاتىن XXVIII بۇكىلالەمدىك قىسقى ۋنيۆەرسيادا كەزىندە قۇقىقتىق ءتارتىپتى قىراعى قامتاماسىز ەتۋ ءۇشىن الماتى گارنيزونى جەكە قۇرامىنان 1200-دەن اسا اسكەري قىزمەتشى جۇمىلدىرىلاتىندىعىن تىلگە تيەك ەتتى. سونىمەن قاتار, ەلوردا تورىندە وتەتىن حالىقارالىق ەكسپو-2017 كورمەسىنىڭ قاۋىپسىزدىگىن قامتاماسىز ەتۋگە دە ۇلاندىقتاردىڭ بەلسەندى قاتىساتىندىعىن جەتكىزدى.
نۇرلىبەك دوسىباي,
«ەگەمەن قازاقستان»
استانا