جيىرما بەس جىل ارالىعىندا تاۋەلسىزدىك تۇعىرىن بەرىك ورنىقتىرعان قازاقستان ءبىلىم ساياساتىنا ءاردايىم باسىم باعىت بەرىپ كەلەدى. ەلباسى جىل سايىنعى ءداستۇرلى جولداۋىندا دا ءبىلىم سالاسىنا قاتىستى ناقتى تاپسىرمالار بەرەدى. ويتكەنى ەرتەڭگى كۇننىڭ بۇگىنگىدەن نۇرلى بولۋىنا ىقپال ەتىپ, ادام بالاسىن العا جەتەلەيتىن قۇدىرەتتى كۇش – ءبىلىم. «زاماناۋي الەمدە ەلدىڭ قۋاتى الدىمەن, ازاماتتارىنىڭ بىلىمىمەن ولشەنەدى. تەرەڭ ءبىلىم – تاۋەلسىزدىگىمىزدىڭ تىرەگى, اقىل-وي ازاتتىعىمىزدىڭ الداسپانى», دەگەن مەملەكەت باسشىسىنىڭ ءسوزى ءومىر بويى وزەكتى بولىپ قالا بەرمەك.
1991 جىلى ەلىمىز ەگەمەندىگىن الىپ, بوداندىقتان بوساپ, ازاتتىققا قول جەتكىزىپ, قازاقستان دەگەن اتپەن بۇكىل الەمگە العاش قادام باسقان جىلى مەن دە ەڭبەك جولىمدى باستادىم. حالىق مۇددەسى مەن قوعامنىڭ تالابىنا ساي 25 جىل پەداگوگيكالىق قىزمەت اتقارىپ كەلەمىن. بۇل, ارينە, ناعىز جالىندى جاستىڭ جاسىمەن پارا-پار ۋاقىت. دەگەنمەن, ءوزىمدى ءتۇلەتىپ, ۇلكەن ومىرگە ۇشىرعان №188 ورتا مەكتەپكە باستاۋىش سىنىپ مۇعالىمى بولىپ كىرگەنىم كەشە عانا سياقتى ەدى. ەڭبەك – ادامدى ارقاشان العا جەتەلەيدى. تالماي ىزدەنۋ مەن ۇلكەن ەڭبەكتىڭ ارقاسىندا جالاعاش اۋداندىق ءبىلىم ءبولىمىنىڭ ادىسكەرى, №114, №32 مەكتەپتەرىندە ديرەكتوردىڭ وقۋ ءىسى جونىندەگى ورىنباسارى قىزمەتىن اتقاردىم. 2005 جىلدان بەرى م.مامەتوۆا اتىنداعى گۋمانيتارلىق كوللەدجىندە پەداگوگيكا پانىنەن ساباق بەرەمىن. جوعارى ساناتتى وقىتۋشى, پەداگوگيكا ماگيسترىمىن. ءبىزدىڭ كوللەدج – كاسىپتىك ءبىلىمنىڭ نەگىزىن قالايتىن, ەلىمىزگە قاجەتتى مامانداردى دايارلايتىن بەدەلدى وقۋ ورىندارىنىڭ ءبىرى.
مەنىڭ پايىمداۋىمشا, وقۋشى مەن مۇعالىم ارەكەتتەرىنىڭ ماقساتى مازمۇنى ءوزارا ءۇيلەسىپ, تابىسقا جەتۋ, تۇتاس ءبىر جۇيەگە اينالۋ دەگەندى بىلدىرەدى. بار ماقساتىم – بالالارعا پەداگوگيكادان ساپالى ءبىلىم, جان-جاقتى تاربيە بەرۋ. «ادامعا ەڭ ءبىرىنشى ءبىلىم ەمەس, تاربيە بەرۋ كەرەك. تاربيەسىز بەرىلگەن ءبىلىم – ادامزاتتىڭ قاس جاۋى. ول كەلەشەكتە ونىڭ ومىرىنە اپات اكەلەدى», دەپ ءابۋ ناسىر ءال فارابي ايتقان ناقىل ءسوزدى ءوزىمنىڭ ۇستازدىق جۇمىسىمدا ۇنەمى نازاردا ۇستايمىن. قازىرگى قۇبىلمالى زاماندا تاربيەگە باستى نازاردى وتباسىندا دا, وقۋ ورنىندا دا اۋدارۋ كەرەك. ۇستاز بالانىڭ ەكىنشى اتا-اناسى, بولاشاققا ءجون سىلتەر اقىلشىسى, ونىڭ مەيىرىمگە تولى ءجۇرەگى شاكىرت بويىنداعى تالاي اعاتتىقتى كەشىرە بىلەدى, ءبىلىمى مەن اقىل-ويىنىڭ قۋاتى تالاي تەنتەكتى جۋاسىتىپ, ءتارتىپكە باۋلىپ, ەسەيتىپ, ەر جەتكىزگەن. «قازاق مەكتەپتەرى – قازاقتارعا ءبىلىم بەرۋدىڭ باستى قۇرالى. ءبىزدىڭ بارلىق ءۇمىتىمىز, قازاق حالقىنىڭ كەلەشەگى وسى مەكتەپتەردە. سوندىقتان مەكتەپتەردە جاقسى ءبىلىم بەرىلەتىن بولسىن. عىلىممەن قارۋلانعان, ءار نارسەگە دۇرىس كوزقاراسى بار ادامدار قازاق اراسىندا كوبەيسە, ول بۇكىل حالىققا اسەر ەتە الادى», دەپ كەزىندە ى.التىنسارين ايتقان. مىنە, وسى ايتىلعان ءسوز ءبارىمىزدى ويلانتسا كەرەك.
وقىتۋشى ەڭبەگىنىڭ شىڭى وقۋشىلار جەتىستىگىندە ەكەنى بەلگىلى. وسى جىلدار ارالىعىندا رەسپۋبليكالىق «جاس عالىم» وقۋشىلار مەن ستۋدەنتتەردىڭ عىلىمي جۇمىستارى سايىسىندا شاكىرتىم گۇلزيرا باتىشەۆا «عىلىمعا دەگەن قۇشتارلىعى» باعىتى بويىنشا عىلىمي جوباسىمەن قاتىسىپ, ءىىى ورىنعا يە بولدى. «جاس زەرتتەۋشى» اتتى رەسپۋبليكالىق زياتكەرلىك تۋرنيرىندە سەزىم بيسەنباي «عىلىمعا العاشقى قادام» باعىتى بويىنشا ءىى ورىن السا, «بولاشاق ماماننىڭ كاسىبي قۇزىرەتتىلىگىن قالىپتاستىرۋ» اتتى وبلىستىق عىلىمي جوبا بايقاۋىندا سەرىك نۇرلىبەك جەڭىمپازدار قاتارىنان كورىندى. شاكىرتىنىڭ بۇل سياقتى بيىك بەلەستەن كورىنگەنى – ۇستاز ەڭبەگىنىڭ ەش كەتپەگەنى. شىعارماشىلىق قابىلەت ءار بالانىڭ تابيعاتىندا بار. ءبىزدىڭ مىندەت – وقۋشى بويىنداعى جاسىرىنىپ جاتقان مۇمكىندىكتى اشۋ.
گۇلجاينا ابيەۆا,
م. مامەتوۆا اتىنداعى قىزىلوردا گۋمانيتارلىق كوللەدجىنىڭ پەداگوگيكا ءپانى وقىتۋشىسى