33 جاستاعى ۆەنەرا ۆەليكانوۆا ءبىرىنشى سىنىپتا وقيتىن ۇلىمەن قاس قارايماي تۇرىپ كۇرە جولعا جەتىپ الۋدى ويلايدى. الايدا, ناگورنوە ەلدى مەكەنىنەن تراسساعا دەيىنگى اراقاشىقتىق الىس بولماعانىمەن, دولى جەل ىشقىنا سوعىپ, اينالانى اقتۇتەك بورانعا اينالدىرىپ جىبەرەدى. نەگىزگى باعداردان اداسقان انالى-بالالى ەكەۋ بەتى اۋعان جاققا ءجۇرە بەرەدى. ءالدەرى قۇرىپ, قاتتى شارشايدى. قىسىلشاڭ شاقتا ۆەنەرانىڭ ەسىنە قالتاسىندا ۇيالى تەلەفونى بارى ءتۇسەدى. «112» ءنومىرى ارقىلى ءتيىستى ورىندارمەن حابارلاسىپ, مۇشكىل جاعدايلارىن باياندايدى. بىراق قاي ءتوڭىرەكتە تۇرعاندارىن ايتا المايدى.
تايىنشا اۋداندىق ىشكى ىستەر ءبولىمىنىڭ باسشىسى پەتر مارتىنيۋك باستاعان جەكە قۇرام ءىز كەسۋ شارالارىنا جۇمىلا كىرىسىپ, ولارعا جەرگىلىكتى بيلىك ورگاندارىنىڭ وكىلدەرى, تۇرعىندار دا قوسىلادى. تۇنگى وندار شاماسىندا ەرىكتىلەردىڭ ءبىرى ۆياچەسلاۆ كوندراتيۋك پەن دميتري بيزيكوۆ بالاسىن قۇشاعىنا قىسىپ, ەس-ءتۇسسىز جاتقان ۆەنەرا ۆەليكانوۆانى كەزىكتىرەدى.
سۋىققا ابدەن ۇرىنىپ, ۇسىككە شالدىعۋدىڭ از-اق الدىندا قالعان ولار دەرەۋ اۋداندىق اۋرۋحاناعا جەتكىزىلىپ, جاتقىزىلادى.
– ۇلىم جانساقتاۋ بولىمىنەن جالپى پالاتاعا اۋىستىرىلدى. ءولىم مەن ءومىر اراسىندا جانتالاسقان ءبىزدى قۇتقارۋعا اتسالىسقان ادامدارعا العىسىم شەكسىز. توتەنشە جاعدايلار ءجونىندەگى قىزمەتتىڭ جولعا شىقپاۋ جونىندەگى ەسكەرتۋىنە قۇلاق اسپاۋدىڭ سالدارى نەگە ۇرىندىرارىن بىلەتىن بولدىق,–دەيدى ۆ.ۆەليكانوۆا كوزىنە جاس الىپ.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى,
تايىنشا اۋدانى