2012 جىلدان باستاپ جاستار ساياساتى جانە جاستاردىڭ رەسۋرستىق ورتالىعى ماسەلەلەرى جونىندەگى باسقارمالار جۇمىس ىستەيدى. بۇل تۋرالى كەزەكتى ۇكىمەت وتىرىسىندا قر ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ مالىمدەدى.
جاستار ساياساتى سالاسىندا جۇرگىزىلىپ جاتقان جۇمىستار قازاقستانعا 183 ەل باعالانعان Global Youth Development Index 2016 - جاھاندىق جاستاردى دامىتۋ يندەكسىندە 61 پوزيتسيانى يەلەنۋگە مۇمكىندىك بەردى.
سونىمەن قاتار, ساراپتامالىق باعالاۋلار مەن ۇسىنىستاردى ەسكەرە وتىرىپ, ءارى قارايعى جۇمىستى بەس نەگىزگى باعىت بويىنشا ۇيىمداستىرۋ جوسپارلانعان.
ءبىرىنشىسى. اۋىل جانە قالا جاستارىنىڭ اراسىنداعى مۇمكىندىكتەردىڭ ايىرماشىلىعىن تومەندەتۋ, جاستاردى الەۋمەتتەندىرۋ, ولاردىڭ بوس ۋاقىتىن ۇيىمداستىرۋ بويىنشا جۇمىستاردى جالعاستىرۋ. وسىعان بايلانىستى جالپىۇلتتىق جاستار قوزعالىسى جوباسىن ازىرلەۋ ۇسىنىلادى, ونىڭ نەگىزگى باعىتتارى: ۆولونتەرلىكتى, سپورتتىق جانە شىعارماشىلىق جەتىستىكتەردى, ەڭبەك داعدىلارىن دامىتۋ.
سونىمەن قاتار كوشەلەردەگى قاراپايىم سپورتتىق جاراقتار جەلىسىن (ۆوركاۋتتار), اۋلا كلۋبتارى مەن جاستاردى جاپپاي سپورتقا جانە شىعارماشىلىققا تارتۋدىڭ باسقا دا از شىعىندى تۇرلەرىن ارتتىرۋ قاجەت. مۇندايدا مەملەكەتتىك-جەكەشەلىك ارىپتەستىك تەتىكتەرىن بەلسەنە پايدالانعان ءجون.
ەكىنشى باعىت – «الەۋمەتتىك ليفتىلەردى» دامىتۋ. اتاپ ايتقاندا, جاستاردى بەلسەنە تارتۋمەن اسكەري قىزمەتتىڭ ابىرويىن ارتتىرۋ بويىنشا جۇمىستار اتقارۋ قاجەت. «الەۋمەتتىك موبيلدىلىكتى» ارتتىرۋدىڭ باسقا تەتىگى – شىعارماشىلىق بىرلەستىكتەر مەن وداقتار, ولار ناعىز دارىنداردى انىقتاپ, ولاردىڭ ءوسىپ-جەتىلۋىنە ىقپال ەتۋى ءتيىس.
سونىمەن قاتار, «دارىن» مەملەكەتتىك جاستار سىيلىعىن جىل سايىنعى نەگىزدە بەرۋ ماسەلەسىن پىسىقتاۋ ۇسىنىلادى. سوعان بايلانىستى, وڭىرلەردە اقپاراتتىق ناسيحاتتاۋ جۇمىستارىن اۋقىمدى تۇردە جۇرگىزىپ, جاستارعا وزدەرىن جانە ءوز دارىندارىن كورسەتۋگە كومەك بەرۋ كەرەك, دەپ حابارلادى پرەمەر-ءمينيستردىڭ رەسمي سايتى.
ءۇشىنشى باعىت – جاس وتباسىلارعا قولداۋ كورسەتۋ اياسىندا – كوكتەمنىڭ ءبىر كۇنىندە ەلىمىزدىڭ بارلىق مەكتەپتەرىندە ءبىر ۋاقىتتا, اتا-انالارعا ارناپ, تاجىريبەلى پسيحولوگتار مەن وزگە سالا ماماندارىنىڭ شاقىرىلۋىمەن «وتباسى ساعاتى» اتتى جالپىۇلتتىق اكتسيا وتكىزۋ ۇسىنىلادى.
جۇرگىزىلىپ جاتقان جۇمىستىڭ ءتورتىنشى باعىتى - جاستارمەن جۇمىس ىستەيتىن مەملەكەتتىك اپپاراتتىڭ كادر الەۋەتىن ارتتىرۋ. وسى ورايدا, جاڭا مىندەتتەردى ەسەپكە العاندا, جاستاردىڭ رەسۋرستىق ورتالىقتارىندا ادىستەمەلىك بازا جاڭارتىلاتىن بولادى. بۇدان وزگە, «جاستار» عىلىمي-زەرتتەۋ ورتالىعى جاستارمەن جۇمىس ىستەيتىن ماماندارعا ارنالعان وقىتۋ سەمينار-ترەنينگتەرىن وتكىزۋدى جالعاستىرادى.
جۇرگىزىلىپ جاتقان جۇمىستىڭ سوڭعى باعىتى – ۆەدومستۆوارالىق ۇيلەستىرۋدى كۇشەيتۋ. سوعان بايلانىستى بيىلعى جىلدىڭ ءبىرىنشى توقسانىندا پرەزيدەنت جانىنداعى جاستار ساياساتى كەڭەسىنىڭ وتىرىسىن وتكىزۋ ۇسىنىلادى. بۇدان وزگە, بارلىق مەملەكەتتىك ورگاندارعا جاستار ۇيىمدارىن دامىتۋ جونىندەگى ۇيلەستىرۋ كەڭەسىنىڭ جۇمىسىنا بەلسەندى تۇردە قاتىسۋ ۇسىنىلادى. سونداي-اق, جاستاردى تولعاندىراتىن وزەكتى ماسەلەلەردى قاراستىرىپ, شەشىمىن تاباتىن, وڭىرلىك جاستار ىستەرى جونىندەگى كەڭەستەردىڭ جۇمىسىن جانداندىرۋ كەرەك جانە ۇكىمەت وتىرىستارىندا جاستارمەن جۇمىس جونىندەگى جوبالاردىڭ ىسكە اسىرىلۋ بارىسى تۋرالى ەسەپتى جۇيەلى تۇردە تىڭداپ وتىرۋ قاجەت.