شقو-دا ءۇش تىلدىلىكتى دامىتۋ جونىندەگى 2016-2019 جىلدارعا ارنالعان كەشەندى جوسپار اياسىندا مەكتەپتەردە تىلدەردى وقىتۋ ءۇشىن ساعات سانى كوبەيتىلدى, بىرىڭعاي وقۋلىقتار الىنىپ, ءۇش ءتىلدى ءبىلىم بەرۋدى ەنگىزۋ ءۇشىن باسقا دا جۇيەلى شارالار قابىلداندى, دەپ حابارلادى وبلىس اكىمدىگى.
مىسالى, شقو اكىمدىگىنىڭ 2016 جىلعى 8 شىلدەدەگى قاۋلىسىنا سايكەس, وتكەن جىلدىڭ 1 قىركۇيەگىنەن باستاپ بارلىق ءبىلىم بەرۋ ۇيىمدارىندا قازاق, ورىس جانە اعىلشىن تىلدەرىن وقىتۋعا وقۋ جوسپارى بولىگىنەن ساعات سانى كوبەيتىلگەن.
سونداي-اق جاڭا جىلدىڭ باسىنان بەرى قازاق تىلىندە وقىتىلمايتىن مەكتەپتەر ءۇشىن سويلەۋ قىزمەتىنىڭ ءتورت ءتۇرى بويىنشا دەڭگەيلىك دايارلىق باعدارلامالارىنا سايكەس پروفەسسور ف. ورازباەۆا ازىرلەگەن قازاق ءتىلى وقۋلىقتارى الىنعان. وبلىستىڭ بارلىق ءبىلىم بەرۋ ۇيىمدارى «Cambridge University Press» باسپاسىنىڭ اعىلشىن ءتىلى وقۋلىقتارىمەن قامتاماسىز ەتىلگەن. ماسكەۋ مەملەكەتتىك پەداگوگيكالىق ۋنيۆەرسيتەتىمەن ورىس تىلىندە وقىتىلمايتىن مەكتەپتەر ءۇشىن ورىس ءتىلى وقۋلىقتارىن دايىنداۋ تۋرالى مەموراندۋم جاسالعان. بۇگىنگى تاڭدا ورىس ءتىلىنىڭ مۇعالىمدەرى ورىس تىلىنە دەڭگەي بويىنشا وقىتۋ جونىندەگى وقۋ-ادىستەمەلىك كەشەنىنىڭ ەلەكتروندى نۇسقالارىمەن قامتاماسىز ەتىلگەن.
سونداي-اق جوسپار اياسىندا تىلدەردى وقىتۋ كەزىندە سىنىپتار 10-12 وقۋشىدان اسپايتىن كىشى توپتارعا بولىنەدى. مۇعالىمدەر ءۇشىن وقىتۋ كۋرستارىن ۇيىمداستىرۋمەن قاتار سارالانعان ماتەريالدىق كوتەرمەلەۋ كوزدەلگەن.
2017 جىلدان باستاپ كەشەندى جوسپاردى ىسكە اسىرۋدىڭ ەكىنشى كەزەڭى باستالادى, ول وقىتۋ كۋرستارىن جالعاستىرۋ, اعىلشىن ءتىلىنىڭ ۇزدىك مۇعالىمدەرى اراسىنان جاتتىقتىرۋشىلاردى دايارلاۋ, سويلەۋ قىزمەتىنىڭ ءتورت ءتۇرى بويىنشا وقۋشىلاردىڭ تىلدىك كوممۋنيكاتيۆتىك بىلىكتىلىكتەرىنە دياگنوستيكا جۇرگىزۋ, وقۋشىلارعا ءۇش تىلدە قوسىمشا ءبىلىم بەرۋ باعدارلامالارىن ازىرلەۋ جانە ءپان مۇعالىمدەرىن كاسىپتىك اعىلشىن ءتىلىن جانە پاندەردى ىقپالداستىرىلعان وقىتۋ ادىستەمەسىن وقىتۋ سياقتى شارالاردى كوزدەيدى.