قازاقستاندا حالىقتىڭ تورتتەن ءبىرى - جاستار. ولار ەلدىڭ ودان ءارى دامۋىنا باعىتتالا الاتىن زور الەۋەت. بۇل تۋرالى بۇگىن قر پرەمەر-ءمينيسترى باقىتجان ساعىنتاەۆ ۇكىمەت وتىرىسى بارىسىندا ايتتى. سونىمەن قاتار پرەمەر-مينيستر مينيسترلىكتەرگە جاستار ساياساتىن ساپالى جۇزەگە اسىرۋدى قامتاماسىز ەتۋ جانە جاستاردى مەملەكەتتىك قولداۋ شارالارى تۋرالى ءتيىمدى اقپاراتتاندىرۋ بويىنشا تاپسىرما بەردى.
ب. ساعىنتاەۆ جاستار ساياساتى دەگەنىمىز مەملەكەت پەن جاستار اراسىنداعى قارىم-قاتىناس قانا ەمەس ەكەنىن اتاپ ءوتتى. بۇل باعىتتاعى جۇمىستاردىڭ ءتيىمدى بولۋى ءۇشىن وعان قوعام دا, بيزنەس تە قىزىعۋشىلىق تانىتۋى ءتيىس. اسىرەسە, ەل ايماقتارىنداعى جاستار ساياساتىنىڭ ساۋاتتى جۇزەگە اسىرىلۋى اسا ماڭىزدى.
Primeminister.kz حابارلاعانداي, وتىرىس بارىسىندا جاستار وكىلدەرى تىڭدالدى. ولاردىڭ ىشىندە «بولاشاق» رەسپۋبليكالىق قوزعالىسىنىڭ توراعاسى مەن «جاستار ءۇنى» جاستار بىرلەستىگىنىڭ توراعاسى داۋرەن بابامۇراتوۆ, ۇلتتىق ۆولونتەرلىك جەلىسىنىڭ ءتورايىمى ۆەرا كيم جانە قازاقستان ستۋدەنتتەر اليانسىنىڭ باسشىسى مەرجان ابىلقاس بولدى.
«جاستار ساياساتىنىڭ باسىمدىقتارىن مەملەكەت باسشىسى جەلتوقسان ايىندا وتكەن جاستار فورۋمىندا بەلگىلەپ بەرگەن بولاتىن. وسىعان بايلانىستى ءدىن ىستەرى جانە ازاماتتىق قوعام مينيسترلىگىنە جاستاردىڭ بەلسەندىلىگىن ىنتالاندىرۋ ءۇشىن جاڭا تەتىكتەر مەن تاسىلدەردى پايدالانا وتىرىپ مەملەكەت باسشىسىنىڭ نۇسقاۋلارىن جۇزەگە اسىرۋدى قامتاماسىز ەتۋدى تاپسىرامىن», - دەدى ب. ساعىنتاەۆ.
سونىمەن قاتار, پرەمەر-مينيستر اقپارات جانە كوممۋنيكاتسيا مينيسترلىگىنە اسىرەسە, جاستار اراسىندا كەڭىنەن تارالعان عالامتور مەن الەۋمەتتىك جەلىلەردە مەملەكەتتىك باعدارلامالاردىڭ جۇزەگە اسىرىلۋى بويىنشا اقپاراتتىق جۇمىستاردى كۇشەيتۋدى تاپسىردى.