اتىراۋ وبلىسىندا جاستارعا ارنالىپ بارلىعى 220 پاتەر بولاتىن ۇيلەر سالىنىپ جاتىر. ولاردىڭ 120 پاتەرى بيىلعى ناۋرىزدا اياقتالادى دەپ جوسپارلانعان, ال قالعان 100 پاتەرلى ءۇيدىڭ قۇرىلىسى ەندى باستالدى. ۇيلەر جاس وتباسىلارعا ارنالعان "جاس وتاۋ" باعدارلاماسى بويىنشا تۇرعىزىلىپ جاتىر. بۇل تۋرالى اتىراۋ وبلىسىنىڭ اكىمى نۇرلان نوعاەۆ اكىمدىكتە وتكەن كەزەكتى جينالىستا ايتتى, دەپ حابارلادى اتىراۋ وبلىسى اكىمدىگىنىڭ ءباسپاسوز قىزمەتى.
دەگەنمەن, ايماق باسشىسى بۇل پاتەرلەردىڭ ازدىق ەتەتىنىن, جاستارعا دەگەن قولداۋدى بارىنشا ۇدەتۋ قاجەت ەكەنىن جەتكىزدى.
ء"ۇي الىپ, ءۇي بولۋعا مۇقتاج ادامدار كوپ. ولاردىڭ بارىنە قولداۋ كورسەتىپ جاتىرمىز. سولاردىڭ ىشىندە جاستارعا دا ارنايى كوڭىل ءبولۋىمىز كەرەك. سەبەبى, جاستار - قوعامنىڭ لوكوموتيۆى. بيىل 120 وتباسى ءۇيلى بولادى. بۇل ەڭ الدىمەن ولاردىڭ بولاشاق ۇرپاعىنا دەگەن قامقورلىق", - دەدى نوعاەۆ.
ونىڭ ايتۋىنشا, قازىر بۇل جوبانى ىسكە اسىرۋعا شىعىس قازاقستان وبلىسى مەن الماتى قالاسى نيەت ءبىلدىرىپ وتىر ەكەن. وبلىس اكىمى جاستاردى بىرەۋدەن كومەك كۇتپەي, ايانباي ەڭبەك ەتە بىلۋگە شاقىردى.
"سىزدەردە ءبىزدىڭ ويىمىزعا كەلە بەرمەيتىن يدەيالار وتە كوپ. ويلارىڭ تىڭ. قازىرگى تەحنولوگيالاردىڭ كوپشىلىگىن سىزدەر سەكىلدى جاستار ويلاپ شىعارعان. بويلارىنداعى پوتەنتسيالدى پايدالانىپ, وزدەرىڭ جارىپ شىعۋلارىڭ كەرەك", - دەدى ايماق باسشىسى.
ايتا كەتەلىك,بىلتىر اتىراۋدا "ديپلوممەن اۋىلعا" بويىنشا 41 جاس مامان بيۋدجەتتىك نەسيە الىپ, 113-ءى كوتەرمە جاردەماقى العان. سونىمەن قاتار, 298 ادام تۇراقتى جۇمىسقا ورنالاستى. 27 جاس كاسىپكەردىڭ العان نەسيەلەرى سۋبسيديالانىپ, 23 كاسىپكەردىڭ نەسيەسى كەپىلدەندىرىلدى. بيىل اتىراۋ قالاسىندا "جاستار سارايىنىڭ" قۇرىلىسى جوسپارلانىپ وتىر.