مەكتەپ مەديتسيناسى دەنساۋلىق ساقتاۋ مەكەمەلەرىنىڭ قاراماعىنا وتەدى. بۇل تۋرالى بۇگىن ۇكىمەتتىڭ سەلەكتورلىق رەجىمدەگى وتىرىسىندا قر دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا ءمالىم ەتتى.
"جاستار اراسىندا سالاۋاتتى ءومىر سالتىن قالىپتاستىرۋ ماڭىزدى ماسەلەلەردىڭ قاتارىندا. سوندىقتان جاستار اراسىندا ناشاقورلىقتى, ۆيچ ىندەتىن جانە ءسۋيتسيدتى ازايتۋ بويىنشا شارالار قولعا الىنۋدا. 2016 جىلى العاش تىركەلگەن ازاماتتاردىڭ ىشىندە جاستاردىڭ ۇلەسى 2015 جىلمەن سالىستىرعاندا ۆيچ ىندەتى بويىنشا 1,5 پايىزعا, سۋيتسيدتەن 10,2 پايىزعا كەمىدى. بيىل وسى جۇمىستى ودان ارى جالعاستىرۋ ماقساتىندا, باقىتجان ءابدىر ۇلى (قر پرەمەر-ءمينيسترى ساعىنتاەۆ), ءسىزدىڭ تاپسىرماڭىزعا سايكەس بىرىنشىدەن, مەكتەپ مەديتسيناسىن دەنساۋلىق ساقتاۋ سالاسىنا وتكىزۋدى قاراستىرىپ وتىرمىز», - دەدى مينيستر.
ونىڭ ايتۋىنشا, بيىلعى جىلى مەكتەپتەردەگى 2,7 ملن. وقۋشىلارعا مەديتسينالىق كومەك كورسەتەتىن 6226 مەدپۋنكت جەرگىلىكتى مەديتسينا مەكەمەلەرىنىڭ قۇرامىنا ەنەتىن بولادى.
«بۇگىنگى جاستاردىڭ دەنساۋلىعىن ساقتاۋ ءۇشىن وسىنداي شارالاردى قولدانۋ بولاشاقتا سالاماتتى ەڭبەك رەسۋرستارىن قامتاماسىز ەتۋدىڭ العىشارتى بولماق. ەكىنشىدەن, جەرگىلىكتى مەديتسينا مەكەمەلەرىنە قاراستى جاستارعا ارنالعان 97 دەنساۋلىق ساقتاۋ ورتالىعى تۇگەل تۇگەندەۋەن وتكىزىلىپ, مەديتسينالىق كومەك ستاندارتتارى قايتا قارالماق, - دەدى ول.
دۇيسەنوۆانىڭ سوزىنە قاراعاندا, ۇشىنشىدەن ەرىكتىلەر, ستۋدەنتتىك ۇيىمدار مەن ۇكىمەتتىك ەمەس ۇيىمدار جاستار اراسىندا سالاۋاتتى ءومىر سالتىن قالىپتاستىرۋ جۇمىستارىنا كەڭىنەن تارتىلاتىن بولادى.
«كوتەرىلگەن پروبلەمالاردى ورىنداۋ جانە قاداعالاۋ ماقساتىندا اعىمداعى جىلدىڭ 15 اقپانىنا دەيىن وبلىس استانا, الماتى قالالارىنىڭ اكىمدەرىمەن بىرلەسىپ, وبلىستاردىڭ جۇمىسپەن قامتۋ بويىنشا كەشەندى جوسپارلارىن بەكىتپەكپىز. 20 اقپانعا دەيىن وبلىستار استانا جانە الماتى قالالارىنىڭ اكىمدەرىمەن بىرلەسىپ, اۋىل اكىمدەرىنىڭ جۇمىس ورنىنىڭ اقپاراتتىق جۇيەسىن كەزەڭ-كەزەڭىمەن ەنگىزۋ كەستەسى جاسالىپ, سوعان سايكەس جۇمىس جۇرگىزبەكشى بولىپ وتىرمىز. ازاماتتاردى, سونىڭ ىشىندە جاستاردى جۇمىسپەن قامتۋ جانە جاڭا جۇمىس ورىندارىن اشۋ ماسەلەسى وبلىس, استانا مەن الماتى قالالارى اكىمدەرىنىڭ نەگىزگى ينديكاتورى بولىپ, توقسان سايىن ۇكىمەت وتىرىسىنىڭ قاراۋىنا شىعارۋدى ۇسىنامىز», - دەدى دۇيسەنوۆا.