بۇگىن «قازاتومونەركاسىپ» ۇاك» اق باسقارما توراعاسى اسقار جۇماعاليەۆ ۋران نارىعىن قالپىنا كەلتىرۋدىڭ ۇزاققا سوزىلۋىنا بايلانىستى قازاقستاندا 2017 جىلعا جوسپارلانعان ۋران ءوندىرىسى شامامەن 10%-عا قىسقاراتىنىن مالىمدەدى.
ۇلتتىق كومپانيانىڭ ءباسپاسوز قىزمەتىنىڭ حابارلاۋىنشا, بۇل قىسقارۋ 2017 جىلدىڭ جوسپارلى وندىرىسىندەگى 2 000 توننادان استام ۋراندى (5 ميلليون فۋنتتان استام U3O8) قامتيدى. تۇتاستاي العاندا, ول جالپى الەمدىك ۋران ءوندىرۋدىڭ 3%-نا تەڭ (UxC Consulting 2015 جىلعى دەرەگىنە نەگىزدەلگەن).
قازاقستاندا ۋران ءوندىرۋدى «قازاتومونەركاسىپ» ۇاك» اق-نىڭ ەنشىلەس جانە تاۋەلدى كاسىپورىندارى شەتەلدىك سەرىكتەستەرمەن بىرلەسە جۇرگىزەدى. ءاربىر كەنىش پەن بىرلەسكەن كاسىپورىن ءۇشىن ءوندىرىستىڭ ناقتى كولەمى باسقارۋشى ورگانداردىڭ ءتيىستى شەشىمدەرىمەن انىقتالىپ, بەكىتىلگەن. ءتۇرلى ءوندىرۋشى كاسىپورىندارداعى قىسقاراتىن ءونىم كولەمى ءبىر-بىرىنەن ايىرماشىلىق ەتەدى, الايدا كومپانيالار توبى بويىنشا جيىنتىق كورسەتكىش 10%-دان اسپايدى. مۇنداي شەشىمدەر ۋران نارىعىنىڭ قازىرگى كەزدەگى مولىعۋىنا نەگىزدەلىپ قابىلداندى. سونداي-اق, ءوندىرىس دەڭگەيىنە جاسالعان تۇزەتۋلەر ءار كاسىپورىن ءوزى رەتتەپ وتىراتىن جەر قويناۋىنان پايدالانۋ كەلىسىمىنىڭ ەرەجەلەرىنە دە تولىق سايكەس كەلەدى.
«تالاي جىلداردان بەرى جالعاسىپ كەلە جاتقانداي, يادرولىق ەنەرگەتيكانىڭ بولاشاعىنا سەنىم ارتا تۇسكەنىمەن, جاقىن ارادا ۋران نارىعى تەك مولىعا تۇسەتىنى شىندىق," - دەيدى «قازاتومونەركاسىپ» ۇاك» اق باسقارما توراعاسى اسقار جۇماعاليەۆ.
«قازاتومونەركاسىپ» ۇاك» اق جانە ونىڭ بىرلەسكەن كاسىپورىندارداعى سەرىكتەستەرىنە نارىقتاعى وسىنداي پروبلەمالار جاعدايىندا جاۋاپتى شەشىم قابىلداۋىنا تۋرا كەلدى. قازاقستاندىق ستراتەگيالىق رەسۋرستاردىڭ قازىرگىدەي نارىق مولىققان جاعدايدا ارزان پايدالانىلعانشا, جەر قويناۋىندا تاعى ءبىراز ۋاقىت جاتا تۇرعانى اكتسيونەرلەرىمىز بەن ستەيكحولدەرىمىز ءۇشىن دە جاقسىراق. ۋران بولاشاقتا نارىقتا قولايلى جاعداي تۋىنداعاندا وتكىزىلەتىن بولادى», - دەپ اتاپ كورسەتتى.
«قازاتومونەركاسىپ» ۇاك» اق وسىناۋ قىسقارتۋلاردى ەسەپتەگەننىڭ وزىندە ۋران ءوندىرۋ جونىنەن الەمدىك كوشباسشى بولىپ, بۇكىل الەمدە يادرولىق ەنەگەتيكانىڭ ءوسۋىن قولداۋدى جالعاستىرا بەرەدى. اتالمىش ستراتەگيالىق شەشىم كومپانيانىڭ كليەنتەرى الدىنداعى كەلىسىمشارتتارىن ورىنداۋىنا ەشقانداي اسەر ەتپەيدى.