كىمنىڭ باسى اۋىرىپ, بالتىرى سىزدامايدى دەيسىز؟ مۇندايدا اتتىڭ باسىن ەمحاناعا قاراي بۇراتىنىڭىز انىق. سول كەزدە الدىڭىزدان ۇزىن-سونار كەزەك شىعا كەلەدى. وسى ساتتە بىرەۋلەردىڭ كيمەلەپ العا شىعىپ, دارىگەردىڭ قابىلداۋىنا كەزەگىن ساقتاماي, كىرىپ كەتۋىنەن ءارتۇرلى تۇسىنىسپەۋشىلىكتەر مەن رەنىشتەر دە تۋىنداپ جاتادى. كەيىنگى كەزدە ورال قالاسىنداعى ەمحانالاردا مۇنداي كورىنىستەر ازايىپ كەلەدى. ياعني, اتالعان مەديتسينالىق مەكەمەلەرگە ەلەكتروندى كەزەك جۇيەسىنىڭ ەنگىزىلۋى تۇرعىندار كوڭىلىن ورنىقتىرا باستاعانداي.
«دەنساۋلىق» مەملەكەتتىك باعدارلاماسى اياسىندا قۇرىلعان قاناتقاقتى جوبانىڭ باستى ماقساتى – كەلەڭسىز كەزەك پەن قولايسىز جاعدايلاردى بولدىرماۋ. بۇل جوبا ەمدەلۋشىلەر اعىمىن رەتتەۋگە باعىتتالعان. جاڭا ءتارتىپ بويىنشا دارىگەردىڭ قابىلداۋىنا كەلۋشىلەر ەلەكتروندى جاشىكتەن تۇبىرتەك الادى. مۇندا كورسەتىلگەن ءنومىر تابلو مەن ەكراندا جارق ەتە قالعان كەزدە, دارىگەردىڭ قابىلداۋىنا كىرۋگە جول اشىلدى دەپ ەسەپتەي بەرىڭىز, دەدى گازەت تىلشىسىنە باتىس قازاقستان وبلىستىق دەنساۋلىق ساقتاۋ باسقارماسىنىڭ باسشىسى قاميدوللا يرمەنوۆ.
وبلىس ورتالىعىنداعى ەمحانالاردا ەڭ ءبىرىنشى تىركەۋ جانە جالپى تاجىريبەلىك دارىگەر بولىمدەرىنە ەلەكتروندى كەزەك ارقىلى كىرۋ جولدارى بەلگىلەنىپتى. سودان سوڭ جاڭا جۇيەنىڭ اۋقىمى مەن لەگى بىرتىندەپ كوبەيە بەرمەك. سونىمەن بىرگە, ەمدەلۋشىلەرگە وركەنيەتتى مەديتسينالىق قىزمەت كورسەتۋدىڭ مۇنداي ومىرشەڭ ۇلگىسى ەمحانالاردىڭ بولىمشەلەرىن دە قامتىماق. ارينە, قاتىپ قالعان ەشتەڭە جوق. وڭىردەگى دەنساۋلىق ساقتاۋ سالاسىنىڭ باسى-قاسىندا جۇرگەندەر قاناتقاقتى جوبانىڭ ءتيىمدى جانە ءتيىمسىز تۇستارىن تارازىعا تارتىپ, سوعان ساي ءار ەمحانانىڭ ەرەكشەلىگى مەن ىڭعايىنا قاراي ەلەكتروندى جاشىكتەر قويۋدى ويلاستىرىپ وتىر ەكەن.
ال تۇتاستاي العاندا, ەمحاناعا قارالۋشىلاردىڭ كەزەگىن ەلەكتروندى ءتۇردە رەتتەۋدىڭ ارتىقشىلىعى مول ەكەنى تالاسسىز. بۇعان قازىردىڭ وزىندە تۇرعىندار دا, جوبانى ىسكە اسىرۋشىلار دا كوزدەرىن ايقىن جەتكىزە باستاعان سەكىلدى. دەگەنمەن, وسى ارادا ءى جانە ءىى توپتاعى مۇگەدەكتەر, اياعى اۋىر انالار جانە ۇلى وتان سوعىسى ارداگەرلەرىنىڭ ءدارىگەردىڭ قابىلداۋىنا كەزەكسىز كىرۋ قۇقى ساقتالىپ قالعانىن دا ايتا كەتكەن ءجون.
ءومىر ءبىر ورنىندا تۇرمايدى. ول ۇنەمى العا جىلجۋ ۇستىندە. سوندىقتان دا وسى ءومىر كوشىنەن قالىپ قويماۋ ءۇشىن ءوڭىردە ەمدەلۋشىلەردى كەزەككە سمارتفون ارقىلى قويۋدىڭ ءموبيلدى باعدارلاماسى دا بەلگىلەنىپتى. بۇل ءتاسىل قولدانىسقا ەلەكتروندى جاشىكتىڭ قىزمەتى تۇبەگەيلى رەتتەلگەن سوڭ ەنگىزىلمەك.
تەمىر قۇسايىن,
«ەگەمەن قازاقستان»
ورال
سۋرەتتە: ەلەكتروندى جاشىكتەن تۇبىرتەك الۋ