نەمەسە سۋرەتتەگى التاۋ تۋرالى ءسوز
ەكى مارتە سوتسياليستىك ەڭبەك ەرى جازىلبەك قۋانىشباەۆتىڭ, «مالشىلاردىڭ مارشالى» اتانعان جاز-اتامىزدىڭ اينالاسىندا ءاردايىم جارقىن ءجۇزدى, جايدارى مىنەزدى ادامدار از بولمايتىن.
وتكەن عاسىردىڭ جەتپىسىنشى جىلدارىنىڭ باس كەزىندە ءتۇسىرىلگەن مىنا سۋرەتتەگى جازەكەڭدى ورتاعا الىپ وتىرعان ازاماتتار تۋرالى ايتسام دەيمىن.
جازەكەڭمەن يىقتاسا سول جاقتا وتىرعان مويىنقۇم اۋدانىن شيرەك عاسىردان اسا باسقارعان, وسى ءوڭىردىڭ وركەندەپ وسۋىنە ولشەۋسىز ورنەك سالعان, كەرەمەت ەڭبەگىمەن ەل قۇرمەتىن يەلەنگەن, مايدانگەر ايتباي نازاربەكوۆ.
ال ەندى سول جاق شەتتەگى سوۆەت عالياقپاروۆ كەزىندە جاڭا اۋداننىڭ قاز تۇرىپ, قادام باسۋىنا ۇلەسىن قوسقان, اۋداندىق كەڭەس اتقارۋ كوميتەتىنىڭ ءتوراعاسى بولعان.
وڭ جاقتاعى ەرمەك ساۋرانباەۆ. اۋداندىق پارتيا كوميتەتىنىڭ ەكىنشى حاتشىسى قىزمەتىندە ەرمەك اعامىز دا شالعايدا جاتقان مويىنقۇمنىڭ مويىن بوساتپايتىن شالىمدى شارۋاسىنىڭ ىلگەرىلەۋى ءۇشىن ىركىلمەي جۇمىس ىستەگەن. كەيىننەن قازاقستان كومپارتياسى ورتالىق كوميتەتىندە جاۋاپتى قىزمەت اتقاردى, مەركە اۋپارتكومىنىڭ ءبىرىنشى حاتشىسى بولدى.
جوعارىدا تۇرعانداردىڭ سول جاقتاعىسى قاراتاي ادامباەۆ. بۇل كىسى دە جاڭا اۋداننىڭ شاڭىراعىن كوتەرىسىپ, ۋىعىن شانشىسقان. «مويىنقۇم» سوۆحوزىندا ديرەكتور بولعان, اۋداننىڭ اۋىل شارۋاشىلىعى باسقارماسىن بايىپتى باسقارعان. ايتقانداي, قاراكەڭ قازاقتىڭ بەلگىلى ادەبيەت زەرتتەۋشىسى بالتاباي ادامباەۆتىڭ تۋعان ءىنىسى.
وڭ جاقتا تۇرعان سۋرەتتەگىلەردىڭ ەڭ جاسى, الىستاعى اۋداننىڭ ابىرويىن ارتتىرعان ارداقتى ازاماتتىڭ ءبىرى – شوتاي تايباعاروۆ. ول سوناۋ كەڭەس وكىمەتى كەزىندە قويدى جەدەل قىرقۋدان الدىنا جان سالماعان ەدى. ەكى دۇركىن كسرو-نىڭ چەمپيونى اتاندى, سول تۇستاعى ەكونوميكالىق ءوزارا كومەك كەڭەسىنە (سەۆ) مۇشە ەلدەردىڭ ءابسوليۋتتى چەمپيونى.
...بۇگىندە بۇل كىسىلەر تۇگەلدەي باقيلىق بولعان. ءيا, ءبارى دە كەتەدى, ءبارى دە وتەدى... بىراق, دانا دا دارا حالقىمىز انىق ايتقانداي, «جاقسىنىڭ اتى ولمەيدى, عالىمنىڭ حاتى ولمەيدى». مىنا سۋرەتتە بەينەلەنگەن اسىل ازاماتتاردىڭ دا ارتىندا ەلىنىڭ ەرەكشە ەسىندە, حالقىنىڭ جادىندا جاتتالىپ قالاتىنداي جاقسى ءىزى, جارقىن ءىسى بار!
بەرىكباي قادىقوۆ,
جۋرناليست
الماتى