قۇدانىڭ قۇدىرەتى, قاراعاندى وبلىسىنداعى وساكاروۆ اۋدانىنىڭ اۋماعىندا قىس بولسا بوران سوعادى دا تۇرادى. جەرىنىڭ ورنالاسۋ ەرەكشەلىگىنە بايلانىستى ما ەكەن, ايتەۋىر باسقا وڭىردە جاياۋ بۇرقاسىن عانا سىرعىسا, بۇل جەردە ات قۇلاعى كورىنبەيتىن اقتۇتەك بوراننان كوز اشپايسىڭ...
جاڭا جىلدىڭ العاشقى اپتاسىندا دا بوران ءبىر تىنباي سوقتى دا تۇردى. سونىڭ سالدارىنان وساكاروۆكا كەنتىنىڭ ۇستىنەن بارلىق باعىتتاعى ەلدى مەكەندەرگە وتەتىن جولدار تۇگەل جابىلىپ قالدى. ويتكەنى, بوران ءوز الدىنا, كەي جەرلەردەگى قاردىڭ قالىڭدىعى 1,5 مەترگە دەيىن جەتكەن ەدى.
سونداي كۇندەردىڭ ءبىرىندە اۋدان ورتالىعىنان 40 شاقىرىمداي جەردەگى قاراعايلى اۋىلىنان ايى-كۇنى جاقىنداعان ايەلدى اۋىر تولعاق قىسىپ جاتقاندىعى تۋرالى حابار كەلىپ جەتتى. اۋداندىق اۋرۋحاناداعىلار توتەنشە جاعدايلار بولىمشەسىمەن جەدەل بايلانىسىپ, كومەك سۇراۋعا ءماجبۇر بولعان.
دارىگەرلەردى دىتتەگەن جەرىنە جەتكىزۋ ءۇشىن قۇتقارۋشىلار ومبى قاردى ەلەڭ قىلا بەرمەيتىن, بارلىق كەرەك-جاراقپەن جابدىقتالعان زيل-131 كولىگىن جولعا شىعاردى. سونىڭ ارقاسىندا, دالانىڭ سىرەسكەن قارىن بۇزىپ-جارىپ, بوسانا الماي قينالىپ جاتقان اناعا دەر ۋاقىتىندا جەتۋدىڭ مۇمكىندىگى تۋدى.
ءسويتىپ, دارىگەرلەر مەن قۇتقارۋشىلاردىڭ تىزە قوسا قيمىلداعان ەڭبەگى دالاعا كەتپەي, ءدۇنيەگە بالپاناقتاي ۇل ءدىن-امان كەلدى.
قايرات ءابىلدينوۆ,
«ەگەمەن قازاقستان»
قاراعاندى وبلىسى,
وساكاروۆ اۋدانى