قر اۋىل شارۋاشىلىعى مينيسترلىگى قىرعىز اۋىلشارۋاشىلىق ونىمدەرىنىڭ رەسەي فەدەراتسياسىنا قازاقستان ارقىلى تاسىمالداۋىنا رۇقسات بەردى. بۇل تۋرالى بۇگىن قر اۋىل شارۋاشىعى ۆيتسە-ءمينيسترى گۇلميرا يساەۆا ءمالىم ەتتى.
مۇنداي شەشىمگە 2016 جىلدىڭ 26 جەلتوقسانىندا سانكت-پەتەربۋرگتەگى ەۋرازيالىق ەكونوميكالىق وداقتىڭ جوعارى كەڭەسىنىڭ ەكونوميكالىق كوميسسياسىندا قول جەتكىزىلگەن. وعان سايكەس, قىرعىزستان اۋىل شارۋاشىلىق ونىمدەرىنىڭ 102 تاۋارى ەلىمىز ارقىلى رەسەيگە, ارى قاراي بەلارۋس نارىقتارىنا شىعا الادى. دەگەنمەن قازاق-قىرعىز مەملەكەتتىك شەكاراسى اۋماعىندا سانيتارلىق-ۆەتەرينارلىق باقىلاۋ ساقتالعان.
ۆيتسە-ءمينيستردىڭ سوزىنە قاراعاندا, بۇل شەشىم قىرعىزستاننىڭ كەدەندىك وداققا ەنۋى اياسىنداعى نەگىزگى مىندەتتەمەلەردىڭ ءبىرىن ورىنداۋ ماقساتىندا جاسالىپ وتىر.
"قىرعىزستانمەن اراداعى تاۋاراينالىمىن ارتتىرۋ ماقساتىندا, ۆەتەرينارلىق-سانيتارلىق باقىلاۋدا تۇرعان قىرعىزستاندىق ونىمدەردىڭ قازاقستان اۋماعى ارقىلى رەسەيگە ترانزيتتەلۋىن, سونىمەن قاتار قىرعىزستاننىڭ مال جانە بالىق شارۋاشىلىعى ونىمدەرىن ەلىمىزدىڭ وڭتۇستىك وڭىرلەرىنە جەتكىزىلۋىن قامتاماسىز ەتۋ ۇسىنىلدى", - دەدى گ. يساەۆا.
بۇگىنگى تاڭدا ەاەو مۇشە-مەملەكەتتەرىنىڭ وكىلەتتى ينسپەكتسيالىق ورگاندارىنىڭ بىرلەسكەن قورىتىندىسى بويىنشا قىرعىزدىڭ 15 مەكەمەسى رەسەيلىك نارىققا جانە 8 مەكەمە قازاقستاندىق نارىققا (وڭتۇستىك ايماققا) ۆەتەرينارلىق باقىلاۋعا جاتاتىن بەلگىلى ءبىر تاۋارلاردى جەتكىزۋگە مۇمكىندىك الدى. مىسالى, تەرميكالىق (جىلۋ) وڭدەۋدەن وتكەن ءسۇت ونىمدەرى, دايىن ەت جانە بالىق ونىمدەرى.
ونىمەن قوسا, قر اۋىل شارۋاشىلىعى مينيسترلىگىنىڭ جانە «قازاقستان تەمىر جولى» اق-نىڭ «قىرعىزستان رەسپۋبليكاسىنان رەسەي فەدەراتسياسىنا قازاقستان رەسپۋبليكاسىنىڭ تەرريتورياسى ارقىلى كارانتيندىك فيتوسانيتارلىق باقىلاۋعا جانە ۆەتەرينارلىق-سانيتارلىق باقىلاۋعا جاتاتىن كارانتيندىك ونىمدەردى تەمىر جول كولىگىمەن ترانزيتتەۋ ءتارتىبىن بەكىتۋ تۋرالى» بۇيرىعىنا سايكەس, قازاقستان تەرريتورياسى ارقىلى قىرعىزستاندىق كارانتين ونىمدەرىن رەسەيگە ترانزيتتەۋ 2017 جىلدىڭ 1 قاڭتارىنان باستاپ, تەمىر جول كولىگىمەن قازاق-قىرعىز مەملەكەتتىك شەكاراسى اۋماعىنا كىرگەندە - لۋگوۆوي ەكسپ بەكەتىمەن, رف تەرريتورياسىنا شىققاندا - يلەتسك ەكسپ بەكەتى ارقىلى جۇرگىزىلەدى.