جەدەل ماقساتتاعى بولىمدەر ىشكى ىستەر ورگاندارىمەن بىرلەسىپ, ەلىمىزدىڭ 19 قالاسىندا قوعامدىق ءتارتىپتى كۇزەتەدى. پاترۋلدىك قىزمەتتى اتقارۋعا كۇن سايىن 5000-نان اسا اسكەري قىزمەتشى جۇمىلدىرىلادى. بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگتە ۇلتتىق ۇلان باس قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى گەنەرال-مايور مۇحامەتقالي ساتوۆ حابارلادى.
ونىڭ ايتۋىنشا, پاترۋلدىك-كۇزەت قىزمەت ناتيجەسىندە قالا كوشەلەرىندەگى زاڭ بۇزۋشىلىقتار وتكەن جىلدارمەن سالىستىرعاندا 38,9 پايىزعا تومەندەدى.
بۇگىنگى تاڭدا ۇلتتىق ۇلان قالا كوشەلەرىندە قۇقىقتىق ءتارتىپتى قاداعالاپ, قىلمىسپەن كۇرەسكە, مەملەكەتتىك ماڭىزداعى نىساندار مەن تۇزەتۋ مەكەمەلەرىن كۇزەتۋگە قوماقتى ۇلەس قوسۋدا.
اسكەري بولىمدەرىمىزبەن ءىىم قاجك تۇزەتۋ مەكەمەلەرىنىڭ سەنىمدى كۇزەتى قامتاماسىز ەتىلگەن. ايداۋىلداۋ بولىمشەلەرىمەن سوتتالعان جانە قاماۋعا الىنعان تۇلعالاردى ايداۋىلداۋ جۇزەگە اسىرىلادى. قازاقستان رەسپۋبليكاسى جوعارعى جانە اسكەري سوتتارىنىڭ وتىرىستارى قامتاماسىز ەتىلەدى. ۇلتتىق ۇلاننىڭ ارنايى اسكەري بولىمدەرىمەن ستراتەگيالىق جانە ەرەكشە ماڭىزداعى مەملەكەتتىك نىساندار كۇزەتكە الىنعان.
داستان كەنجالين, "ەگەمەن قازاقستان".