1 مىڭ گا القاپقا جاڭعاق ەگۋ ءۇشىن سەرگەي تەرەششەنكو وبلىس باسشىسىنان جەر سۇرادى, دەپ حابارلايدى abctv.kz.
وڭتۇستىك قازاقستان وبلىسىنىڭ سارىاعاش, قازىعۇرت اۋداندارىندا جالپى اۋماعى 2500 گا-نى قۇرايتىن جاڭعاق باعى اشىلادى.
قازاقستاندا تۇڭعىش رەت سالىنعالى وتىرعان باقتىڭ كوشەتتەرىن ازىرلەۋگە «سارىاعاش جەر سىيى» جشس اتسالىسادى. جۋىردا اتالعان سەرىكتەستىكتە ەلىمىزدىڭ بۇرىنعى پرەمەر-ءمينيسترى سەرگەي تەرەششەنكو باستاعان مولدوۆا, ۋكراينا ەلدەرىنىڭ ءبىر توپ عالىم-اگرونومدارى باس قوسىپ, جاڭعاق داقىلدارىن ءوسىرۋدىڭ تاجىريبەسىن ورتاعا سالدى.
«بۇگىندە ءبىزدىڭ باعىمىزدا ءجۇزىم, بانان, كيۆي, جاڭعاق باۋلارى بار. قوناقتار ءبىزدىڭ باۋلارىمىزدىڭ بولاشاعى زور ەكەنىن ايتىپ وتىر. تاياۋدا شىمكەنتتە وتكەن جيىندا وبلىس اكىمى جانسەيىت تۇيمەباەۆتىڭ جاڭعاق ءوسىرۋدى قولعا الۋ تۋرالى باستاماسىن ەستىدىم. بۇل قۇپتارلىق ءىس. ويتكەنى قازىرگى تاڭدا جاڭعاققا دەگەن ۇلكەن سۇرانىس بار. ەگەر, ءبىز الداعى جىلدارى وڭتۇستىكتە جاڭعاق باۋلارىنىڭ كولەمىن ۇلعايتساق, كول-كوسىر پايداعا كەنەلەمىز», - دەيدى سەرىكتەستىك ديرەكتورى تاناباي شىنتاسوۆ.
وتكەن جىلدىڭ سوڭىندا شىمكەنتتە ۇيىمداستىرىلعان القالى جيىندا وبلىس اكىمى جانسەيىت تۇيمەباەۆ جاڭعاق ءوسىرۋ ءىسىن قولعا الۋ قاجەتتىگىن تىلگە تيەك ەتىپ, وڭتۇستىك ديقاندارىنا جاڭعاق ءوسىرۋدى ۇسىندى. وبلىس اكىمنىڭ ايتۋىنشا, الەمدىك نارىقتاعى جاڭعاقتىڭ 70%-ىن تۇركيا مەملەكەتى وندىرەدى. ال ورمان جاڭعاعىن (فۋندۋك) وندىرۋدە تۇرىكتەر الەم بويىنشا الدارىنا قارا سالدىرمايدى.
«وڭتۇستىكتىڭ توپىراعى وتە قۇنارلى. اۋا-رايى دا, كليماتى دا وتە جايلى, تۇركياعا ۇقساس. سوندىقتان كەلەشەكتە ءبىز جاڭعاق داقىلىن ءوسىرۋدى قولعا العالى وتىرمىز. بۇل داقىلدى وبلىسىمىزدا ءوسىرۋدىڭ تەتىكتەرىن ابدەن زەرتتەپ, زەردەلەپ الۋىمىز قاجەت», - دەيدى جانسەيىت قانسەيىت ۇلى.
ءوڭىر باسشىسىنىڭ ايتۋىنشا, سوڭعى 3 جىلدا وبلىستا ونىمدىلىگى جوعارى ينتەنسيۆتى باۋلاردىڭ كولەمى 2,1 مىڭ گا-عا ارتىپتى. ماسەلەن, ورداباسى اۋدانى «Kazakstan Logistic» جشس 200 گا, سايرام اۋدانى «Dala Fruit» جشس 120 گا, قازىعۇرت اۋدانى «امانگەلدى» جشس 500 گا, ماقتارال اۋدانى «ارسەنال ساد» جشس 100 گا-عا ينتەنسيۆتى باۋ وتىرعىزعان.
وبلىس اكىمىنىڭ جاڭعاق ءوسىرۋ تۋرالى باستاماسىن سەرگەي تەرەششەنكو بىردەن قولدادى. سەبەبى ول جەرگىلىكتى بيلىكتەن سارىاعاش اۋدانىنان 1 مىڭ گا ەگىس القابىن سۇراعان ەكەن.
«قازىرگى تاڭدا جاڭعاققا دەگەن الەمدىك نارىقتاعى سۇرانىستىڭ باسىم كوپشىلىگىن تۇركيا, ۋكراينا, مولدوۆا ەلدەرى وتەپ كەلەدى. وسى جايتتاردى ەسكەرە وتىرىپ, مەن بيىل 1 مىڭ گەكتارعا جاڭعاق ەگۋدى قولعا العالى وتىرمىن. وبلىس باسشىسىنان جەر بەرۋدى ءوتىندىم. ەگەر, سۇرانىسىمدى قاناعاتتاندىرسا, ىسكە كىرىسەمىن», - دەيدى سەرگەي تەرەششەنكو.
ون جىلدان بەرى ءۇيىنىڭ اۋلاسىنا جاڭعاق وسىرۋمەن اينالىسىپ جۇرگەن شىمكەنتتىك باعبان باحتيار تۋتامعالى اتالمىش داقىلدى كۇتىپ-باپتاۋ اسا قيىن ەمەس دەپ وتىر. ونىڭ ايتۋىنشا, 200 جىل ءومىر سۇرەتىن گرەك جاڭعاعىنىڭ بيىكتىگى 25-30, ەنى 1,5-2 مەترگە دەيىن جەتەدى.
«ءبىزدىڭ بازارلارداعى جاڭعاقتاردىڭ باسىم كوپشىلىگى شەتەلدەن اكەلىنەدى. ساپاسى دا ءارتۇرلى. ال, قازاقستاندا جاڭعاقتىڭ ەكى ءتۇرى كەزدەسەدى. ولار: گرەك جاڭعاعى جانە قارا جاڭعاق. ماسەلەن, مەن كوبىنەسە گرەك جاڭعاعىن وسىرەمىن. سەبەبى ونىڭ ءونىمى مول بولادى. بۇل جاڭعاقتىڭ قابىعى قالىڭ جانە جۇقا بولىپ ەكىگە بولىنەدى. جەمىسىن ابدەن ءپىسىپ جەتىلگەندە جينايمىن», - دەيدى باحتيار.
اگروساراپشىلاردىڭ مالىمەتىنە سۇيەنسەك, ەۋروپا ەلدەرىندە قازىردىڭ وزىندە گرەك جاڭعاعىنىڭ تاپشىلىعى 180 مىڭ توننادان اسادى. ەگەر, جوعارىدا اتالعان جوبالار ىسكە اسسا, وڭتۇستىك قازاقستان وبلىسى قازاقستاندا جاڭعاق وندىرۋ مەن ەكسپورتتاۋدا كوشباسىعا اينالۋى بەك مۇمكىن.