«قازاقستاندىق ۆاگون جاساۋ زاۋىتى» جەكەشەلەندىرۋدىڭ ەكىنشى كەزەڭى شەڭبەرىندە 1,8 ملرد تەڭگەگە ساتىلدى, دەپ حابارلايدى ەلەكتروندى ساۋدا الاڭىنا سىلتەمە جاساعان abctv.kz.
ساۋداعا كاسىپورىن ۇلەسىنىڭ 78,4%-ى قويىلعان بولاتىن. ساۋدا باعانى تومەندەتۋ ءادىسى بويىنشا جۇرگىزىلدى. ساتۋشى – «قازاقستان تەمىر جولى» (قتج). باستاپقى باعاسى 2,9 ملرد تەڭگە بولعان لوتتىڭ قۇنى 1,8 ملرد تەڭگەگە تومەندەدى.
ALB Company باعالاۋشى كومپانياسىنىڭ مالىمەتى بويىنشا, 2016 جىلدىڭ 1 ساۋىرىندەگى جاعداي بويىنشا كاسىپورىننىڭ باعالانعان قۇنى 1,5 ملرد تەڭگە بولعان ەدى.
«قازاقستاننىڭ ۆاگون جاساۋ زاۋىتى» پاۆلودار وبلىسىنداعى اقسۋ قالاسىندا ورىن تەپكەن. وندا 481 ادام ەڭبەك ەتەدى. كومپانيا 2008 جىلى «تامان» ۆاگون جوندەۋ دەپوسىنىڭ نەگىزىندە قۇرىلدى. كاسىپورىن قتج-نى جۇك ۆاگوندارىمەن قامتاماسىز ەتەدى.