امەريكالىق بوكسشى كىشى فلويد مەيۆەزەردىڭ اعاسى دجەفف مەيۆەزەر قازاقستاندىق گەننادي گولوۆكين ۇلى سپورتشىلاردىڭ ءبىرى بولۋى ءۇشىن سالماعىن ارتتىرۋى ءتيىس دەگەن پىكىر ءبىلدىردى. بۇل تۋرالى vesti.kz حابارلادى.
«گولوۆكيننىڭ كۇشىنە ازداپ تامساناتىنىم راس. جەكپە-جەكتەرىن دە نازاردان تىس قالدىرماي كورىپ جۇرەمىن. بۇگىندە ورتا ديۆيزيوندا الدىنا جان سالمايتىن ۇزدىك بوكسشىعا اينالدى. دەگەنمەن, وتكەنگە كوز جۇگىرتەر بولساق, كىل مىقتىلار ءبىر سالماقتا توقتاپ قالماعان. كوبىسى ەڭ تومەنگى دارەجەدەن باستاپ, كەزەڭ-كەزەڭىمەن كوتەرىلىپ وتىرعان. ال ونداي سىناقتان وتپەگەن ادام وزىنە قولايلى جەردەن قوزعالعىسى كەلمەيدى دەگەندى بىلدىرەدى. دجەيكوبسقا قارسى تارتىستى جەكپە-جەك كۇتىپ تۇر. مەنىڭشە, دەننيدىڭ مۇمكىندىگى كوپ», – دەدى مەيۆەزەردىڭ اعاسى.
«گولوۆكين شىن مانىندە قانداي مىقتى بوكسشىلارمەن كەزدەستى؟ مەن تەك ۇشەۋىن عانا ايتار ەدىم. ونىڭ بارىندە نوكاۋتپەن جەڭە المادى. سوندىقتان ۇزدىكتەردىڭ قاتارىنا ەنۋ ءۇشىن سالماق دارەجەسىن ارتتىرعانى ابزال. بىراق قازىرگى ارەكەتىنە قاراپ, مۇنداي قادامعا دايىن دەپ ويلامايمىن», – دەدى دجەفف مەيۆەزەر.
بۇعان دەيىن ول مەكسيكالىق ساۋل «كانەلو» الۆارەسپەن تەك اقشا ءۇشىن جەكپە-جەك وتكىزگىسى كەلەدى دەگەن پىكىرىن بىلدىرگەن.
ايتا كەتەيىك, قازاقستاندىق بىلعارى قولعاپ شەبەرىنىڭ جاتتىقتىرۋشىسى ابەل سانچەس شاكىرتىنىڭ الداعى ۋاقىتتا 175 فۋنتقا دەيىن كوتەرىلۋى مۇمكىندىگىن مالىمدەگەن بولاتىن.