قايىرىمدىلىق قاشاندا ادام جانىن مەرەيلەندىرەتىن, ىزگىلىككە باستايتىن قاسيەت. ال, ونىڭ ءوزى مۇقتاج جاندارعا كورسەتىلىپ جاتسا, ءتىپتى عانيبەت. ءىسى وڭعا باسقان قالاداعى «جەرسۋپاۋەر» جشس وسىنداي جاقسىلىققا جول سالىپ كەلەدى. كاسىپورىن 2004 جىلى قىتايدان اتامەكەنىنە ورالعان تەكەلىلىك ەركىن راحىمباەۆقا تىگىن ماشينەسىن سىيلاپ, وتباسىن قۋانتتى. ەركىن جول اپاتىنا ۇشىراپ, ءبىرىنشى توپتاعى مۇگەدەك بولىپ, تاعدىر تالكەگىن باسىنان وتكىزۋدە. بىراق قايسار ازامات قيىندىققا مويىماي كاسىبىمەن شۇعىلدانىپ, زايىبى زىليحا ەكەۋى ءۇش بالا تاربيەلەۋدە.
ەركىن مەن زىليحا ۇلتتىق قولونەردى جاڭعىرتىپ, كوزدىڭ جاۋىن الاتىن تۇسكيىز, تەكەمەت باسىپ, سىرماق, كورپە-جاستىق, كەستە تىگىپ, تۇتىنۋشىلاردىڭ العىسىن الىپ كەلىپتى. ولاردىڭ قولىنان شىققان ءارتۇرلى مونشاقپەن ادەمى زەرلەنگەن سىيلىق زاتتار مەن ءتور كورپە قىز جاساۋىن تولىقتىراتىنىن دا ايتقان ءجون.
ولاردىڭ وسى كاسىپپەن اينالىسقانىنا كوپ جىل بولىپتى. ۇلتتىق ناقىشتاعى زاتتار كوبىنە قول ەڭبەگىمەن جاسالىناتىندىقتان زور توزىمدىلىكتى قاجەت ەتەدى. كاسىپورىن سىيلاعان تىگىن ماشينەسى ەندى جۇمىستى ەداۋىر جەڭىلدەتەتىن بولدى دەيدى ەركىن.
كۇمىسجان بايجان,
الماتى وبلىسى.