شىمكەنت قالاسىندا Digital Qazaqstan 2026 فورۋمى اياسىندا وڭىردەگى ەڭ ءىرى IT ءىس-شارالاردىڭ ءبىرى – Central Asia Programming Championship 2026 حالىقارالىق سپورتتىق باعدارلامالاۋ چەمپيوناتى وتەدى. بۇل دودا ورتالىق ازيانىڭ دارىندى باعدارلاماشىلارىن ءبىر الاڭعا جينايدى, دەپ حابارلايدى Egemen.kz.
اتالعان دوداعا قازاقستان, قىرعىزستان, وزبەكستان, تاجىكستان جانە تۇرىكمەنستان ەلدەرىنەن 20 جاستان اسقان قاتىسۋشىلار قاتىسادى. ونلاين ىرىكتەۋ كەزەڭى 28 اقپاندا وتەدى, ال فينال 2026 جىلعى 27 ناۋرىزدا شىمكەنتتە وفلاين فورماتتا ۇيىمداستىرىلادى.
ايتا كەتەيىك, بيىل فينالدا ارنايى ساراپتامالىق باعدارلاماعا ەرەكشە ءمان بەرىلگەن. قوناقتار قاتارىندا حالىقارالىق تەحنولوگيالىق كومپانيالاردىڭ وكىلدەرى بار. اتاپ ايتقاندا, Meta كومپانياسىنىڭ اعا ازىرلەۋشىسى باقىتجان بايجيكەنوۆ, AGI Lab جانە Khan Group كومپانيالارىنىڭ باس ديرەكتورى جومارت سادىقوۆ, Higgsfield AI كومپانياسىنىڭ VP for Talent داليدا ەركۋليەۆا, Google كومپانياسىنىڭ اعا ازىرلەۋشىسى امان وتەمۇراتوۆ, Booking كومپانياسىنىڭ ازىرلەۋشىسى ناريكبي ماقسۇت جانە TON Core وكىلى الەكساندر كيرسانوۆ قاتىسادى. سالا كوشباسشىلارىنىڭ قاتىسۋىمەن وتەتىن باعدارلاما كاسىبي پىكىر الماسۋعا, تاجىريبە بولىسۋگە جانە جاھاندىق تەحنولوگيالىق كومپانيالارداعى مانساپ مۇمكىندىكتەرىن تالقىلاۋعا جول اشادى.
جالپى جۇلدە قورى – 3 ملن تەڭگە: ءبىرىنشى ورىنعا – 1,5 ملن تەڭگە, ەكىنشى ورىنعا – 1 ملن تەڭگە, ءۇشىنشى ورىنعا – 500 مىڭ تەڭگە بەرىلەدى.
جارىس جەكە فورماتتا وتەدى. بۇل ءار قاتىسۋشىعا حالىقارالىق دەڭگەيدەگى ICPC ستيلىندەگى الگوريتمدىك تاپسىرمالار ارقىلى ءوز ءبىلىمىن, لوگيكالىق جانە تالداۋ قابىلەتىن كورسەتۋگە مۇمكىندىك بەرەدى. فينالعا ءار ەلدەن ۇزدىك ءۇش قاتىسۋشى جولداما الادى. بۇعان قوسا, ۇلتتىق كۆوتاعا ەنبەگەن, بىراق جوعارى ناتيجە كورسەتكەن تاعى 25 قاتىسۋشى فينالعا وتەدى. وسىلايشا شەشۋشى كەزەڭدە ءوڭىردىڭ ەڭ مىقتى باعدارلاماشىلارى باق سىنايدى.
الماتى جاستارى مەن IT قاۋىمداستىق كونستيتۋتسيالىق رەفورمانى قولدايدى
«قازاقستان تسيفرلاندىرۋ مەن جاساندى ينتەللەكتتى دامىتۋعا باسىمدىق بەرىپ وتىرعان كەزەڭدە مۇنداي باستامالاردىڭ ماڭىزى ارتا تۇسەدى. Central Asia Programming Championship جاي عانا جارىس ەمەس, جاڭا ينجەنەرلىك ورتانى قالىپتاستىراتىن, وڭىرلىك ىنتىماقتاستىقتى نىعايتاتىن جانە ورتالىق ازيانىڭ IT-تالانتتارىنىڭ الەۋەتىن اشۋعا مۇمكىندىك بەرەتىن ناقتى الاڭ. ءبىز مىقتى ازىرلەۋشىلەرگە حالىقارالىق ساراپشىلارمەن تىكەلەي بايلانىس ورناتۋعا, جاھاندىق تەحنولوگيالىق جوبالارعا قاتىسۋعا جانە كاسىبي تۇرعىدا وسۋگە جاعداي جاساۋدى ماڭىزدى دەپ سانايمىز», دەپ اتاپ وتتى پرەمەر-ءمينيستردىڭ ورىنباسارى - تسيفرلىق دامۋ جانە جاساندى ينتەللەكت ءمينيسترى جاسلان ماديەۆ.
چەمپيوناتقا قاتىسۋ تەگىن. فيناليستەردىڭ جول شىعىنىنا 100 000 تەڭگەگە دەيىنگى قاراجات جانە تۇرۋ شىعىندارىن ۇيىمداستىرۋشىلار وتەيدى.
ء«بىز ءۇشىن بۇل چەمپيونات تەك جارىس قانا ەمەس, وڭىردەگى مىقتى تەحنولوگيالىق قاۋىمداستىقتى بىرىكتىرەتىن الاڭعا اينالۋى ءتيىس. دارىندى ازىرلەۋشىلەر ءوز مۇمكىندىگىن كورسەتىپ, حالىقارالىق ساراپشىلاردان كەرى بايلانىس الىپ, يندۋستريا وكىلدەرىمەن تىكەلەي بايلانىس ورناتا الادى. Central Asia Programming Championship – ورتالىق ازياداعى جاڭا بۋىن ينجەنەرلەرىن دامىتۋعا قوسىلعان ۇلەس», دەدى Alem.ai Foundation ديرەكتورى ادينا ماگاۆينا.
ۇيىمداستىرۋشىلاردىڭ ايتۋىنشا, چەمپيوناتقا قاتىسۋ تەك اقشالاي جۇلدەمەن شەكتەلمەيدى. قاتىسۋشىلار كۇردەلى الگوريتمدىك تاپسىرمالار ارقىلى ءوز دەڭگەيىن سىناپ, وڭىرلىك جانە حالىقارالىق IT-كومپانيالاردىڭ نازارىن اۋدارا الادى, كاسىبي بايلانىستارىن كەڭەيتىپ, سەرىكتەس كومپانيالاردان جۇمىس ۇسىنىسىن الۋ مۇمكىندىگىنە يە بولادى.
چەمپيوناتتى Alem.ai Foundation, قازاقستاننىڭ سپورتتىق باعدارلامالاۋ فەدەراتسياسى جانە Astana Hub ۇيىمداستىرادى. ءىس-شارا Higgsfield.ai جانە AGI Lab قولداۋىمەن وتەدى.