قاراسۋ اۋدانىنىڭ اكىمى امانتاي سەيفۋللين مەن وسى وڭىردەگى جەرگىلىكتى بيزنەس وكىلدەرى ەكى جاقتى مەموراندۋمعا قول قويدى. مۇنداعى ماقسات – الەۋمەتتىك سالانى دامىتۋ ارقىلى اۋداننىڭ, اۋىلداردىڭ كوركەيۋىنە ۇلەس قوسۋ. ەل ءتاۋەلسىزدىگىنىڭ 20 جىلدىعىن لايىقتى دەڭگەيدە اتاپ ءوتۋ ءۇشىن ءار قازاقستاندىقتىڭ اتسالىسقانى ماڭىزدى. مۇنى مەملەكەت باسشىسى ءوزىنىڭ بيىلعى جولداۋىندا دا اتاپ ايتقان بولاتىن. ال اۋىلدى جەرلەردەگى الەۋمەتتىك ماسەلەلەردىڭ شەشىمىن تابۋ ءۇشىن كاسىپكەرلەردىڭ اتسالىسۋى كەرەك-اق. سوندىقتان الەۋمەتتىك جوبالاردى جۇزەگە اسىرۋ ءۇشىن اۋداندا قۇرىلعان قورعا اۋىلشارۋاشىلىق تاۋار وندىرۋشىلەرى, جەرگىلىكتى ورتا جانە شاعىن بيزنەس كاسىپورىندارى 550 ميلليون تەڭگە قاراجات قۇيماق. اۋداندا بۇگىندە كاسىپكەرلەرمەن بارلىعى 195 مەموراندۋمعا قول قويىلدى.
اۋدان اكىمىنىڭ ايتۋىنشا, بيىل بۇل وڭىردە اتقارىلاتىن ءىس شاش ەتەكتەن. جاز ايلارىندا وبلىستىق «تىڭ» سپارتاكياداسىن وتكىزۋ دە اۋدان ءۇشىن ءبىر بەل. ءويتكەنى, اۋداندا زاماناۋي تالاپقا ساي ستاديون دا جوق. اۋىل ادامدارىنىڭ سپورتقا دەگەن ىنتىزارلىعىن ارتتىرۋ جانە وسى ءداستۇرلى سپورت مەرەكەسىن ويداعىداي ءوتكىزۋ ءۇشىن تىڭعىلىقتى دايىندىق اياسىندا باسقا دا جۇمىستار قامتىلادى. ال اۋدانداعى اۋىز سۋ ماسەلەسى دە كۇيىپ تۇر. بۇل ورايدا جەرگىلىكتى بيلىك وكىلدەرى مەن اۋىلشارۋاشىلىق تاۋار وندىرۋشىلەرى كۇش بىرىكتىرە جۇمىس ىستەمەك. ياعني, بيىل بىتەلىپ قالعان وزەكتى تازارتىپ, قالپىنا كەلتىرۋ قولعا الىنباق. قىسقاسى, قوردان بولىنەتىن قاراجات اۋدانداعى الەۋمەتتىك سالانىڭ بارلىعىن قامتىپ, ءتيىمدى جۇمسالاتىن بولادى.
ءوڭىردىڭ گۇلدەنۋى, ادامداردىڭ جاقسى تۇرمىسى ءۇشىن بيزنەس وكىلدەرىنىڭ ەشقايسىسى دا ايانىپ قالاتىن كورىنبەيدى. وسى اۋدانداعى «قاراسۋ» ساۋدا-وندىرىستىك كومپانياسىنىڭ ۇجىمى جەرگىلىكتى الەۋمەتتىك قورعا 200 ميلليون تەڭگە اۋداراتىن بولدى.
ءنازيرا جارىمبەتوۆا,
قوستاناي وبلىسى,
قاراسۋ اۋدانى.