Le Parisien باسىلىمىنىڭ تاپسىرىسى بويىنشا فرانتسيانىڭ كەلەسى پرەزيدەنتى لاۋازىمىنان ۇمىتكەرلەر تۋرالى جۇرگىزىلگەن الەۋمەتتىك ساۋالناما ناتيەجەلەرى ەلدە ۇلكەن سەنساتسيا تۋعىزىپ وتىر.
ويتكەنى, وتكەن دەمالىس كۇندەرى جۇرگىزىلگەن ساۋالناما بويىنشا حالىقتىڭ 23 پايىزىنىڭ «ۇلتتىق مايدان» اتتى ۋلتراوڭشىلدار جەتەكشىسى مارينا لە پەنگە داۋىس بەرەتىنى بەلگىلى بولعان. ال قازىرگى پرەزيدەنت نيكوليا ساركوزي 21 پايىز عانا داۋىس جيناعان. ماريا لە پەن ۋلتراوڭشىلداردىڭ نەگىزىن قالاۋشى جان-ماري لە پەننىڭ قىزى بولىپ تابىلادى. ايتا كەتۋ كەرەك, فرانتسيادا كەزەكتى پرەزيدەنت سايلاۋى 2012 جىلدىڭ كوكتەمىندە وتەدى.
تريبۋنال ءوز جۇمىسىن جالعاستىرادى
اقش پرەزيدەنتى گۋانتاناموداعى امەريكالىق اسكەري بازاداعى اسكەري تريبۋنالدىڭ جۇمىسىن قايتا باستاۋ قاجەتتىگىنە قولداۋ بىلدىرگەن.
بۇل تۇرمەدە اقش-قا قارسى تەررورلىق ارەكەتتەر جۇرگىزدى دەپ ايىپتالعانداردىڭ قاماۋدا وتىرعانى بەلگىلى. ب.وبامانىڭ ايتۋىنشا, اسكەري سوت جۇمىسىن باستاۋ جونىندەگى وكىم بەلگىسىز مەرزىمگە سوتتالعاندارعا قاتىستى بولماق. امەريكا ءۇشىن قانشالىقتى قاۋىپ تۋعىزاتىنىن انىقتاۋ ءۇشىن ولاردىڭ ىستەرى اۋىق-اۋىق قارالىپ تۇراتىن بولادى. سونىمەن بىرگە, اقش پرەزيدەنتى اق ءۇيدىڭ تەررورشىلارعا قارسى ءىستى ازاماتتىق سوتتاردىڭ قاراۋى ءۇشىن كۇرەس جۇرگىزە بەرەتىنىن جانە بۇرىنعىسىنشا گۋانتانامونى جاپپاق نيەتى بار ەكەنىن دە جەتكىزگەن.
كايردەگى دىنارالىق قاقتىعىس
ەگيپەتتىڭ استاناسى كايردە مۇسىلماندار مەن حريستيان-كوپتىلاردىڭ اراسىنداعى داۋ-جانجالعا بايلانىستى تۋىنداعان جاپپاي تارتىپسىزدىكتەر ودان ءارى جالعاسۋدا.
2 مىڭعا جۋىق حريستيان-كوپتىلار ءىرى اۆتوماگيسترالدى جاۋىپ تاستاپ, اۆتوماشينەلەرگە تاس لاقتىرعان. تۋىنداعان تارتىپسىزدىكتەر سالدارىنان ءبىر ادام قازا تاۋىپ, وننان استام ادام جاراقات العان كورىنەدى. ەگيپەتتەگى حريستياندار قاۋىمداستىعى ەل حالقىنىڭ 10 پايىزىن نەمەسە 8 ميلليون ادامدى قۇرايدى. ەلدە مۇسىلماندار مەن حريستياندار اراسىنداعى قاتىعىستار ءجيى ورىن الىپ تۇرادى.
جاپونيادا ءىرى جەر سىلكىنىسى بولدى
سارسەنبى كۇنى جاپونيادا 7,2 باللدىق جەر سىلكىنىسى بولىپ, ابىروي بولعاندا, ەشكىم زارداپ شەكپەگەن.
عيماراتتار مەن ينفراقۇرىلىمداردىڭ زاقىمدانۋى دا انىقتالماعان. سول سياقتى اپاتتىڭ نەگىزگى سوققىسىنا ۇشىراعان مياگي پرەفەكتۋراسىنداعى اتوم ەلەكتر ستانساسىنىڭ جۇمىسى دا توقتاعان جوق. دەگەنمەن, ءزىلزالا كولىك قوزعالىسىندا ەداۋىر كىدىرىستەر تۋدىرعان. جاپونيا مەتەورولوگيالىق قىزمەتىنىڭ مالىمەتتەرى بويىنشا, جەر سىلكىنىسىنىڭ وشاعى تىنىق مۇحيتىندا 10 كيلومەتر تەرەڭدىكتە بولعان. تسۋنامي قاتەرىنە بايلانىستى تۇرعىندارعا تەڭىز جاعالاۋىنا جاقىنداۋعا تىيىم سالىنىپ وتىر.