ەلىمىزدە جاڭا اۆتوكولىكتەردىڭ ساتىلىمى ارتتى

2025 جىلى جاڭا اۆتوكولىك ساتىلىمى 2024 جىلمەن سالىستىرعاندا 15%-عا ارتقان. بيىل دا ءوسىم جالعاسادى دەگەن بولجام بار. ساراپشىلاردىڭ پىكىرىنشە, نارىق كەمىندە تاعى 5%-عا ۇلعايۋى ىقتيمال. 

قازاقستان اۆتوكولىك وداعىنىڭ مالىمەتىنشە, 2025 جىلدىڭ جەلتوقسانىندا رەسمي ديلەرلەر 28 مىڭعا جۋىق جاڭا جەڭىل جانە كوممەرتسيالىق اۆتوكولىك ساتقان. بۇل 2024 جىلدىڭ سايكەس كەزەڭىمەن سالىستىرعاندا 7,3%-عا كوپ. ال 2025 جىلدىڭ قورىتىندىسى بويىنشا ساتىلىم كولەمى 234 مىڭنان استى. وسىلايشا, قازاقستاندا جاڭا اۆتوكولىك سەگمەنتى قاتارىنان ەكىنشى جىل 200 مىڭ ساتىلىم مەجەسىنەن اسىپ وتىر.

قازىرگى تاڭدا نارىقتا 75-تەن استام اۆتوكولىك برەندى ۇسىنىلعانىمەن, بارلىق ساتىلىمنىڭ 80%-دان استامى ءالى دە العاشقى ون ءىرى كومپانيانىڭ ۇلەسىندە. 

قازاقستاننىڭ اۆتوپاركى جاڭارتۋدى قاجەت ەتەدى

ساراپشىلار ەلدەگى اۆتوپاركتىڭ جاعدايىنا دا باعا بەردى. 2025 جىلعى 1 قازانداعى دەرەككە سايكەس, ەلدەگى اۆتوكولىكتەردىڭ شامامەن جارتىسى 20 جىلدان استام ۋاقىتتان بەرى پايدالانىلىپ كەلەدى. بۇل – نارىق ءۇشىن  سىن-قاتەر.

سونىمەن قاتار, ەلدە جاسى 0-7 جىل ارالىعىنداعى شامامەن 1,5 ميلليونعا جۋىق اۆتوكولىك بار. دەگەنمەن, كولىكتەردىڭ 42%-ى 20 جىلدان استام ۋاقىت بويى قولدانىلىپ ءجۇر. مامانداردىڭ ايتۋىنشا, ءدال وسى سەگمەنتتى جاڭارتۋ قاجەت.

اۆتوكولىك ءوندىرىسىن ۇلعايتۋ جوسپارلانۋدا

قازاقستاندا وتاندىق اۆتوكولىك ءوندىرىسىنىڭ ءوسىمى بايقالادى. 2025 جىلدىڭ قورىتىندىسى بويىنشا ەلدە اۆتوكولىك شىعارۋ كولەمى 18%-عا ارتقان. 

قازىرگى ۋاقىتتا قازاقستاندا ءتورت اۆتوزاۋىت جۇمىس ىستەيدى. وندا قىتايلىق جانە كورەيالىق ماركالاردىڭ كولىكتەرى قۇراستىرىلادى. الايدا ولاردىڭ تەك ەكەۋىندە عانا جەرگىلىكتى وندىرۋشىلەردى تارتىپ, بولشەكتەردى قازاقستان اۋماعىندا شىعارۋ جۇمىستارى قولعا الىنعان.

قازاقستاندا ەلەكتروموبيلدەر قىمباتتاۋى مۇمكىن

سوڭعى ءبىر جىلدا قازاقستانداعى ەلەكتروموبيلدەر سانى ءبىر جارىم ەسەدەن استام ءوستى. قازىر ەل جولدارىندا 22 مىڭعا جۋىق ەلەكتروكار ءجۇر.

الايدا بيىلدان باستاپ ەاەو اياسىندا ەلەكتروموبيلدەردى باج سالىعىنسىز اكەلۋگە ارنالعان كۆوتا قازاقستان ءۇشىن قولدانىلمايدى. بۇعان دەيىن بۇل جەڭىلدىك بەلگىلەنگەن ليميت شەگىندە كولىكتەردى كەدەندىك باجسىز يمپورتتاۋعا مۇمكىندىك بەرەتىن. كۆوتا 2025 جىلدىڭ قازان ايىندا تولىق يگەرىلىپ, 2026 جىلعا ۇزارتىلماعان.

اۆتوكولىك ءنومىرىن پوليتسەي الىپ كەتسە نە ىستەۋ كەرەك؟

ساراپشىلاردىڭ پىكىرىنشە, بۇل نارىققا كەرى اسەر ەتۋى مۇمكىن. ەلەكتروموبيلدەر باعاسى ايتارلىقتاي وسەدى. تاۋەلسىز اۆتوموبيل وداعىنىڭ توراعاسى ەدۋارد ەدوكوۆتىڭ 24.kz-كە بەرگەن اقپاراتىنا سايكەس, ەندى كۆوتاسىز اكەلىنەتىن كولىكتەرگە 16% قوسىلعان قۇن سالىعى سالىنادى. سونىڭ سالدارىنان باعا كەمىندە 16-20%-عا قىمباتتاۋى ىقتيمال. ايتا كەتۋ كەرەك, وتكەن جىلدىڭ وزىندە ەلەكتروموبيلدەر قۇنى 25-30%-عا وسە باستاعان.

 اۆتوكولىك وندىرىسىندە ءوسىم بار