قازاقستان حالقى اسسامبلەياسىنىڭ دەلەگاتسياسى رەسەي فەدەراتسياسىنىڭ ماسكەۋ قالاسىندا رەسمي ساپارمەن بولىپ قايتتى, دەپ حابارلادى قازاقستاننىڭ رەسەيدەگى ەلشىلىگىنىڭ ءباسپاسوز قىزمەتى.
دەلەگاتسيا قۇرامىندا قحا توراعاسىنىڭ ورىنباسارى ە.ل.توعجانوۆ, قازاقستان پارلامەنتى ءماجىلىسى توراعاسىنىڭ ورىنباسارى ۆ.ك.بوجكو, قازاقستان پارلامەنتى ءماجىلىسىنىڭ دەپۋتاتتارى ن.ۆ.جۇمادىلداەۆا, ا.س.مۋرادوۆ, قازاقستان پرەزيدەنتى اكىمشىلىگى قحا حاتشىلىعى مەڭگەرۋشىسىنىڭ ورىنباسارى ل.ا.پروكوپەنكو بار.
ساپار اياسىندا قحا دەلەگاتسياسى رەسەي مەن ەۋرازيا حالىقتارى فورۋمىنىڭ پلەنارلىق وتىرىسىنا قاتىستى.
ەرالى توعجانوۆ ءوز سوزىندە رەسەيلىكتەردى حالىقتار بىرلىگى كۇنىمەن قۇتتىقتادى. «قازاقستان مەن رەسەي – تەك ستراتەگيالىق سەرىكتەستىك, دوستىق بايلانىستا عانا ەمەس, سونداي-اق قاراپايىم ادامدار اراسىنداعى قارىم-قاتىناستارىمەن ەرەكشەلەنەتىن مەملەكەتتەر. بۇگىندە ميلليونداعان قازاق رەسەيدە ءومىر سۇرسە, ميلليونداعان ورىس قازاقستاندا تۇرادى. بۇل قازاقستان مەن رەسەي حالىقتارىنىڭ باۋىرلاستىعى, ءوزارا سەنىمى مەن قۇرمەتىنىڭ بەلگىسى», – دەدى ول.
دەلەگاتسيا مۇشەلەرى رەسەي پرەزيدەنتى اكىمشىلىگىنىڭ باسشىسى, رەسەي پرەزيدەنتى جانىنداعى ۇلتارالىق قاتىناس بويىنشا كەڭەستىڭ جاۋاپتى حاتشىسى م.ماگومەدوۆپەن, مەملەكەتتىك دۋما ۇلتتار جونىندەگى كوميتەتتىڭ توراعاسى ي.گيلمۋتدينوۆپەن, ۇلتتار ءىسى جونىندەگى فەدەرالدى اگەنتتىگىنىڭ مەڭگەرۋشىسى ي.بارينوۆپەن, رەسەي حالىقتارى اسسامبلەياسىنىڭ توراعاسى س.سميرنوۆامەن ەكىجاقتى كەزدەسۋلەر وتكىزدى.
كەزدەسۋلەر بارىسىندا قازاقستان مەن رەسەيدىڭ ءوزارا ىقپالداستىعىنىڭ وزەكتى ماسەلەلەرى, قوعامدىق كەلىسىم مەن بىرلىكتى قامتاماسىز ەتۋدەگى, ازاماتتىق بىرتەكتىلىك پەن بىرلىكتى نىعايتۋداعى تاجىريبە, ىنتىماقتاستىقتىڭ جاڭا قىرلارى, سونداي-اق, ي.بارينوۆ باستاعان 11 قاراشاعا جوسپارلانعان رەسەيلىك دەلەگاتسيانىڭ قازاقستانعا ساپارى تالقىلاندى.