بەينەلەۋ ونەرىن ءتۇسىنۋدىڭ ءبىر ەرەكشەلىگى – بوياۋ ارقىلى ۇعىسۋدا. بوياۋ «تىلىنە» ەشقانداي اۋدارماشىنىڭ كەرەگى جوقتىعىندا. «مادەنيەت ارقىلى ۇنقاتىسۋ» حالىقارالىق جوباسىنىڭ اياسىندا وتكىزىلگەن شۆەد سۋرەتشىسى تۋۆە كرابونىڭ جەكە كورمەسى سەمەي يادرولىق سىناق پوليگونىنىڭ جابىلۋىنىڭ 25 جىلدىعىنا ارنالدى.
تۋۆە كرابو «تۇزەلمەيتىن قاتەلىك: العاشقى جارىلىس» اتتى كورمەسىنە يادرولىق قارۋدان زارداپ شەككەن ورىنداردى بەينەلەيتىن جۇمىستارىن قويدى. دۇنيە جۇزىندە پيعىلى بۇزىق, نيەتى قاراۋ ادامداردىڭ كەسىرىنەن كۇن سايىن تەحنوگەندى اپاتتاردىڭ ورىن الاتىنى نازىك جاندى سۋرەتشىنى قاتتى تولعاندىرعان سىڭايلى. شۆەد سۋرەتشىسىنىڭ تۇڭعىش پرەزيدەنت مۋزەيىندە اشىلعان كورمەسى سولايشا بارلىق ز ۇلىمدىقتاردىڭ ارتىندا جەكەلەگەن ادامدار نە قاتال رەجىم تۇرادى دەگەن ويدى ايعاقتاپ تۇردى.
كورمەنى شۆەتسيانىڭ قازاقستانداعى ەلشىسى حريستيان كاميلل اشتى. ول ءوز سوزىندە شۆەتسيا ۇزاق جىلدار بويى قارۋسىزدانۋ سالاسىنداعى بەلسەندى ءىس-قيمىلدارعا ءوز تاراپىنان كۇش سالىپ كەلە جاتقانىن, قازاقستاننىڭ يادرولىق قارۋسىزدانۋعا باعىتتالعان باستامالارىن جوعارى باعالايتىنىن جەتكىزدى. «بيىلعى جىلى شۆەتسيا جانە قازاقستان مەملەكەتتەرى 2017-2018 جىلدارعا بىرىككەن ۇلتتار ۇيىمىنىڭ قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلاندى. قازاقستانمەن بىرگە ءبىز دە بۇۇ-نىڭ قاۋىپسىزدىك كەڭەسىندە قارۋسىزدانۋ جانە قارۋدى تاراتپاۋ باستامالارىن قولدايمىز. استانادا وسى بىرەگەي كورمەنى ۇسىنۋ ارقىلى يادرولىق قارۋدىڭ جانە يادرولىق سىناقتاردىڭ زارداپتارى جايلى اقپارات بەرۋ جۇمىسىن جۇرگىزەمىز دەگەن ءۇمىتتەمىز», – دەدى ەلشى.
ال كورمە بارىسىندا سۋرەتشىنىڭ ءوزى ماتىنمەن جەتكىزۋ ءمۇمكىن ەمەس نارسەنى اكۆارەلمەن, بوياۋمەن ايتۋعا بارىنشا كۇش سالاتىنىن اڭگىمەلەدى. «مەنىڭ ونەرىم كينو سياقتى. وندا دراما, كوڭىل كۇي, سەزىم, جارىق پەن تۇنەك بار. كوبىنە ءوز وبرازدارىمدى ينتەرنەت جەلىسىنەن الامىن. ولاردىڭ باسىم بولىگى – ادامزات تراگەدياسى مەن ەكولوگيالىق زارداپ شەككەن جەرلەر. قازىرگى قوعامداعى اپاتتى وقيعالار اعىمى ادامزاتتى مەيىرىمسىز ەتە مە دەپ قورقامىن», – دەدى ول.
تۋۆە كرابو كينو, پروزا, بەينەلەۋ ونەرى ءتارىزدى ونەردىڭ ءتۇرلى سالاسىن مەڭگەرگەن جان. ءبىر باسىنا ونەردىڭ بىرنەشە ءتۇرىن توعىستىرعان تۋۆە ادامزاتقا قاسىرەت اكەلەتىن قۇبىلىستار مەن وقيعالاردى بولدىرماۋ ءۇشىن ونەرى ارقىلى ادامدارعا جاناشىرلىق, تۇسىنىستىك سەزىمدەرىن سىيلاعىسى كەلەدى.
ايگۇل سەيىلوۆا,
«ەگەمەن قازاقستان»
سۋرەتتى تۇسىرگەن
ەرلان وماروۆ,
«ەگەمەن قازاقستان»