ۇشسا قۇستىڭ قاناتى, جۇگىرسە اڭنىڭ اياعى تالاتىن كەڭ-بايتاق قازاقستان وڭىرلەرى ءۇشىن ءوزارا تاجىريبە الماسۋدىڭ, جاقسىنى ۇيرەنۋدىڭ ەش ارتىقشىلىعى جوق. بۇگىنگىدەي جاھاندانۋ ءۇردىسىنىڭ ءولىارا كەزەڭىندە ورتاق ماقسات جولىنداعى كەلەلى ماسەلەلەر اۋىزبىرلىكپەن, ىنتىماقپەن شەشىلىپ, قۋانىشتى قاۋىشۋلار, جارقىن جۇزدەسۋلەر الەۋمەتتىك-ەكونوميكالىق دامۋدىڭ ىشكى مۇمكىندىكتەرى مەن سىرتقى رەزەرۆتەرىن سارالاپ بەرسە, ۇتارىمىز كوپ. «ارالاسپاسا, اعايىن جات» دەگەن. وسى ءتامسىلدى بەرىك ۇستانعان جەر جانناتى جەتىسۋ ءوڭىرىنىڭ دەلەگاتسياسىن الماتى وبلىسىنىڭ اكىمى اماندىق باتالوۆتىڭ باستاپ كەلۋىنىڭ ءبىر سىرى ەلباسى تاپسىرمالارىن جۇزەگە اسىرۋ مۇددەسىنەن تۋىنداعانى انىق. ايماق باسشىسى ەرىك سۇلتانوۆ الاتاۋ بوكتەرىنەن ات باسىن تىرەگەن قۇرمەتتى قوناقتاردى قۇشاق جايا قارسى الىپ, ىسكەرلىك كەزدەسۋدى پەتروپاۆل قالاسىنىڭ ماڭىندا ورنالاسقان «Green Park» دەمالىس ورنىمەن تانىستىرۋدان باستادى. بۇل جەردەن دەمالۋشىلار ەش ۇزىلمەيدى. كوپشىلىكتىڭ ۇسىنىستارى ەسكەرىلىپ, كەلەشەكتە امفيتەاتر اشۋ كوزدەلگەن. ارينە, قاھارلى قىسىنان جايدارى جازى باسىم جەتىسۋ جەرى ءتۋريزمدى وركەندەتۋگە وتە قولايلى ەكەنىن ەسكەرسەك, ءوزارا تاجىريبە الماسۋدىڭ پايداسى زور ەكەنى ايتپاسا دا تۇسىنىكتى. بۇدان كەيىن دەلەگاتسيا مۇشەلەرى ءبىر مىڭنان استام ادام شىنىعاتىن سپورت سارايىندا بولىپ, جەڭىل اتلەتيكالىق مانەج بەن مۇز ايدىنىن, وقۋ-جاتتىعۋ زالدارىن تاماشالادى.
قوس تاراپتىڭ ىسكەرلىك باسقوسۋىندا ەرىك سۇلتانوۆ بيىل ەلىمىزدىڭ ايماقتارىنا 39 ميلليارد تەڭگەنىڭ ونەركاسىپ ونىمدەرى جونەلتىلگەنىن, ونىڭ 3,9 پايىزىن الماتى وبلىسى قۇرايتىنىن, وسى ورايدا ساۋدا-ساتتىق اينالىمىن ۇلعايتۋ ءبىرىنشى مىندەت ەكەنىن جەتكىزدى. ءوز كەزەگىندە ا.باتالوۆ ايماقتىڭ الەۋەتىمەن تانىستىردى. قانت قىزىلشاسىن ءوندىرۋ, الماتى اپورتىن ءوسىرۋ جۇمىسى جاندانىپ كەلەدى. 20 مىڭ گەكتار الما باعىنىڭ ەكى مىڭ گەكتارىنا اپورت وسىرىلەدى. سونداي-اق, جەمىس-جيدەكتىڭ باسقا تۇرلەرىمەن قامتاماسىز ەتە الاتىن الەۋەتى دە مول. الداعى ۋاقىتتا رەسەيمەن تۇيىسەتىن شەكارا تۇسىندا كولىك-لوگيستيكالىق ورتالىق اشىلاتىن بولسا, الماتىلىق كاسىپكەرلەر ءۇشىن دە سىرتقى نارىققا كەڭ جول اشىلارى ءسوزسىز.
قىزىلجار ءوڭىرىنىڭ جەر قويناۋى ءتۇرلى-ءتۇستى مەتالدارعا باي. 286 پايدالى قازبا ورىندارىندا التىن, قالايى, تەمىر, كومىردىڭ مول قورى بار بولسا, الماتى وبلىسى الەمنىڭ 108 ەلىمەن ساۋدا بايلانىسىن ورناتقان. 41 ەلگە ءونىم جەتكىزىلىپ, 83 مەملەكەتتەن يمپورتتىق تاۋار اكەلىنەدى. تەرىسكەيگە 30 الماتىلىق كاسىپورىن ءوز ونىمدەرىن تاسىمالدايدى. كەزدەسۋ بارىسىندا جەرگىلىكتى «ءسۇت ونىمدەرى» جاۋاپكەرشىلىگى شەكتەۋلى سەرىكتەستىگىنىڭ ديرەكتورى روزا سۇلەيمەنوۆا مەن الماتى وبلىسى «جاقسىلىق» شارۋا قوجالىعىنىڭ باسشىسى جاقسىلىق ۇشكەمپىروۆ اتقارىپ وتىرعان جۇمىستارىمەن تانىستىردى.
جيىن اۋىل شارۋاشىلىعى جانە كاسىپكەرلىك سالالار بويىنشا مەموراندۋمدارعا قول قويۋمەن اياقتالدى.
– الماتى وبلىسىنىڭ ىشكى الەۋەتى زور. ەندى جەمىس-جيدەك ونىمدەرىن رەسەيگە تاسىمالدايتىن بولادى. بۇل باعىتتاعى جۇمىسىمىزدىڭ ناتيجەلى بولۋىنا كولىك-لوگيستيكالىق ورتالىقتىڭ قوسار ۇلەسى ولشەۋسىز, – دەدى ە.سۇلتانوۆ باق وكىلدەرىنە بەرگەن سۇحباتىندا. ا.باتالوۆ ءسولتۇستىكتىڭ ساپالى ۇنىنا جانە ماشينا جاساۋ سالاسىنا قىزىعۋشىلىق تانىتىپ وتىرعاندارىن اتاپ كورسەتتى.
– ءبىزدىڭ وڭىردە 2 ميلليون ادام تۇرادى. ولاردى نانمەن تولىققاندى قامتاماسىز ەتۋ ءۇشىن بىرقاتار كەلىسىمدەرگە قول قويىلدى. مۇنىڭ ءبارى تۇرعىنداردىڭ الەۋمەتتىك قورعالۋىن جانە ازىق-ت ۇلىك قاۋىپسىزدىگىن رەتتەيدى, – دەدى ا.باتالوۆ.
ومىر ەسقالي,
«ەگەمەن قازاقستان»
سولتۇستىك قازاقستان وبلىسى