وبلىس ورتالىعىندا دەنساۋلىق ساقتاۋ جانە الەۋمەتتىك دامۋ مينيسترلىگى, «مەملەكەتتىك الەۋمەتتىك ساقتاندىرۋ قورى» اق جانە وڭتۇستىك قازاقستان وبلىسى اكىمدىگىنىڭ ۇيىمداستىرۋىمەن «الەۋمەتتىك ساقتاندىرۋ: انا مەن بالانى قولداۋ» تاقىرىبىندا رەسپۋبليكالىق سەمينار ءوتتى. قازاقستان رەسپۋبليكاسى پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا وكىلدەرى مەن حالىقارالىق ۇيىمداردىڭ ساراپشىلارى, ارناۋلى ورىنداردىڭ ماماندارى قاتىستى. جيىندى دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا جۇرگىزىپ وتىردى.
سەميناردا دەنساۋلىق ساقتاۋ جانە الەۋمەتتىك دامۋ ۆيتسە-ءمينيسترى سۆەتلانا جاقىپوۆا ۇكىمەتتىڭ دەموگرافيالىق دامۋ مەن الەۋمەتتىك ساياسات سالاسىنداعى جۇزەگە اسىرىپ جاتقان شارالارى تۋ كورسەتكىشىن ۇلعايتۋعا, ءولىم-ءجىتىم دەڭگەيىن تومەندەتۋگە, حالىقتىڭ كۇتىلەتىن ءومىر ءسۇرۋ ۇزاقتىعىن ارتتىرۋعا, كوشى-قون كورسەتكىشىن كوتەرۋگە جاعىمدى اسەرىن باياندادى.
سونىمەن بىرگە, سۆەتلانا جاقىپوۆا سوڭعى جىلدارى حالىقتى الەۋمەتتىك قورعاۋ جۇيەسىنىڭ كۇشەيگەنىن, ەلىمىزدىڭ الەۋمەتتىك-ەكونوميكالىق ومىرىندەگى جەتەكشى باعىتتاردىڭ ءبىرى بولعانىن اتاپ ايتتى.
الەمدەگى ەكونوميكالىق تۇراقسىزدىققا قاراماستان, قازاقستاندا مەملەكەتتىڭ ازاماتتار الدىنداعى بارلىق الەۋمەتتىك مىندەتتەمەلەرى ورىندالىپ جاتىر. ۆيتسە-مينيستر 2002 جىلدان باستاپ تۋ كورسەتكىشى ۇلعايعانىن, الىس جانە جاقىن جەردەن تاريحي وتانىنا ورالعان اعايىنداردىڭ ارقاسىندا حالىقتىڭ ءوسىمى ارتقانىن ايتتى. ياعني, بيىل جىل باسىندا حالقىمىزدىڭ سانى 17 ملن 670,9 مىڭ ادامعا جەتكەن. بيىلدان باستاپ قازاقستاندا دەنساۋلىق ساقتاۋ سالاسىن دامىتۋدىڭ 2016-2019 جىلدارعا ارنالعان «دەنساۋلىق» مەملەكەتتىك باعدارلاماسى قابىلداندى. «قازاقستان رەسپۋبليكاسى پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات ءجونىندەگى ۇلتتىق كوميسسيا جانە وزگە دە مۇددەلى ورگانداردىڭ كومەگىمەن قازاقستان رەسپۋبليكاسىنىڭ 2030 جىلعا دەيىنگى وتباسىلىق جانە گەندەرلىك ساياساتىنىڭ تۇجىرىمداماسى جاسالىپ جاتىر», دەپ ايتتى سۆەتلانا جاقىپوۆا.
سەميناردا الەۋمەتتىك سالادا وركەنيەتتى ەلدەردەگى جاقسى تاجىريبەلەر, انا مەن بالانى ساقتاندىرۋ جانە مەكتەپكە دەيىنگى, مەكتەپتەگى ءبىلىم بەرۋ مەن تاربيەلەۋ جايى تالقىلانىپ, ۇسىنىستار ايتىلدى.