«نۇر وتان» پارتياسى جانىنداعى سىبايلاس جەمقورلىققا قارسى ءىس-قيمىل جونىندەگى رەسپۋبليكالىق قوعامدىق كەڭەستىڭ كەزەكتى وتىرىسى ءوتىپ, وندا سالىق جانە كەدەندىك اكىمشىلەندىرۋ سالاسىندا كورسەتىلىپ جاتقان مەملەكەتتىك قىزمەتتەردىڭ قولجەتىمدىلىگى مەن ساپاسى تالقى تارازىسىنا ءتۇستى.
وسىدان ءبىراز ۋاقىت بۇرىن قۇرىلعان ارنايى جۇمىس توبى ماڭعىستاۋ, الماتى, شىعىس قازاقستان جانە وڭتۇستىك قازاقستان وبلىستارىندا جۇمىس ساپارىمەن بولىپ قايتىپتى. توپ «تاجەن», «مورپورت اقتاۋ», «قالجات», «باقتى», «جىبەك جولى», «قاپلانبەك» سىندى كەدەن بەكەتتەرىنىڭ قىزمەتىمەن تانىسىپ, كەدەندىك ءراسىمدەۋدەن ءوتىپ جاتقان جەكە تۇلعالارمەن دە تىلدەسكەن. سونىمەن قاتار, وسى ءوڭىرلەردەگى كاسىپكەرلەر پالاتاسىنىڭ الاڭدارىندا دوڭگەلەك ۇستەل وتىرىستارى ۇيىمداستىرىلىپ, سالىق جانە كەدەندىك اكىمشىلەندىرۋ سالاسىنداعى وزەكتى ماسەلەلەر كۇن تارتىبىنە قويىلعان.
سونداي-اق, جۇمىس توبى اقتاۋ, وسكەمەن, شىمكەنت قالالارى مەن اباي, ءال-فارابي, ەڭبەكشى جانە قاراتاۋ اۋداندارىنىڭ مەملەكەتتىك كىرىستەر باسقارماسىنىڭ اقپاراتتاردى وڭدەۋ جانە قابىلداۋ ورتالىقتارىنىڭ جۇمىسىمەن تانىسقان.
«نۇر وتان» پارتياسىنىڭ باس كەڭسەسىندە وتكەن قوعامدىق كەڭەس وتىرىسىندا ساپار اياسىندا جيناقتالعان ماتەريالدار قورىتىلىپ, كوپشىلىككە جاريا ەتىلدى. ارنايى بايانداما جاساعان پارلامەنت ءماجىلىسىنىڭ دەپۋتاتى ءارى كەڭەس مۇشەسى ومارحان وكسىكباەۆ سالىق جانە كەدەن قىزمەتىندە كۇرمەۋى شەشىلمەگەن ءبىرقاتار ماسەلەلەر بار ەكەنىن اتاپ ءوتىپ, مەملەكەتتىك كىرىس ورگاندارىنىڭ وكىلدەرىنە جۇمىس توبىنىڭ ۇسىنىستارى مەن ەسكەرتۋلەرىن جەتكىزدى.
«مەملەكەتتىك كىرىس ورگاندارى ەل ازاماتتارى مەن كاسىپكەرلەرگە 52 مەملەكەتتىك قىزمەت ءتۇرىن كورسەتسە, ونىڭ 32-ءسى – سالىق, 20-سى كەدەن سالاسىنا قاتىستى. بۇلاردىڭ اراسىندا ساپاسى سىن كوتەرمەيتىن جانە سىبايلاس جەمقورلىققا تۇرتكى بولاتىن مەملەكەتتىك قىزمەت تۇرلەرى دە جوق ەمەس. ولاردى جەتىلدىرۋمەن قاتار, قايتا جاڭعىرتۋ كەرەك», – دەدى بايانداماشى ءوزىنىڭ سوزىندە.
بۇگىنگى تاڭدا مەملەكەتتىك كىرىس بويىنشا قالالىق, اۋداندىق 219 باسقارما قىزمەت ەتسە, ونىڭ 42-سىندە ادامداردىڭ كەزەگىن ەلەكتروندى باسقارۋ جۇيەسى ەنگىزىلگەن. الايدا, قالعان 177 باسقارمادا مۇنداي جۇيە مۇلدەم جوق. سوندىقتان دا سالىق تولەۋشىلەر مەملەكەتتىك قىزمەتتى ۇزىن-سونار كەزەككە تۇرىپ الۋعا ءماجبۇر. وسىنىڭ سالدارىنان توقساندىق ەسەپ تاپسىرار تۇستا بۇل جەرلەردە ۋ-شۋ كوبەيىپ, ادامداردىڭ بەرەكەسى قاشادى.
مەملەكەتتىك كىرىستەر كوميتەتىنىڭ ءتوراعاسى داۋلەت ەرعوجين مەملەكەتتىك كىرىستەر ورگاندارى كورسەتەتىن مەملەكەتتىك قىزمەتتەردىڭ ساپاسى مەن قولجەتىمدىلىگىن ارتتىرۋ باعىتىندا اتقارىلىپ جاتقان جۇمىستارعا توقتالدى. سونداي-اق, ءوز كەزەگىندە ءسوز العان مەملەكەتتىك قىزمەت جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى اليك شپەكباەۆ قارجى مينيسترلىگى «سىبايلاس جەمقورلىق» ەڭ كوپ كورىنىس بەرەتىن مەملەكەتتىك ورگانداردىڭ قاتارىندا ەكەنىن اتاپ ءوتتى. ونىڭ ايتۋىنشا, بۇل وتكەن جىلمەن سالىستىرعاندا جەمقورلىق كورسەتكىشى 2,7 ەسەگە تومەندەگەنىنە قاراماستان, انىقتالعان فاكتىلەر وسىلاي دەۋگە نەگىز بولاتىن كورىنەدى.
وسىلايشا, ساپانى جاقسارتۋ ماقساتىندا سىن كوپ ايتىلعان وتىرىس قورىتىندىسى بويىنشا سالىقتىق جانە كەدەندىك اكىمشىلىك قىزمەتتەردى جەتىلدىرۋ بويىنشا ناقتى ۇسىنىستار ايتىلدى.
نۇرلىبەك دوسىباي,
«ەگەمەن قازاقستان»