مەملەكەت باسشىسى «قازاق ەلى» كينوفيلمىنىڭ كورسەتىلىمىنە باردى دەپ حابارلايدى اقوردانىڭ ءباسپاسوز قىزمەتى. ەلباسىنىڭ ءوزى يدەيا اۆتورى بولىپ سانالاتىن كينوەپوپەيا مادەنيەت جانە سپورت مينيسترلىگىنىڭ تاپسىرىسى بويىنشا شاكەن ايمانوۆ اتىنداعى «قازاقفيلم» اكتسيونەرلىك قوعامىنىڭ كينوستۋدياسىندا تۇسىرىلگەن.
قازاقستاندىق جاڭا تاريحي كينوتۋىندىعا قازاق ادەبيەتىنىڭ كلاسسيگى ءىلياس ەسەنبەرليننىڭ «كوشپەندىلەر» تريلوگياسىنىڭ ءبىرىنشى كىتابى – «الماس قىلىش» رومانى نەگىز بولعان. فيلمدەگى وقيعالار XV عاسىردا ءوربيدى. وعان جانىبەك پەن كەرەي حاندار تۇسىنداعى قازاق مەملەكەتتىلىگىنىڭ قالىپتاسۋى بارىسىنداعى باستى وقيعالار ارقاۋ بولادى.
كوپ سەريالى تەلەجوبا جۇمىسىنا رەسپۋبليكاداعى تانىمال كينوماتوگرافيستەر – قويۋشى رەجيسسەر رۇستەم ابدىراشەۆ, ستسەناريستەر سماعۇل ەلۋباەۆ پەن تيمۋر جاقسىبەكوۆ اتسالىستى. جالپى, بۇل ءفيلمدى ءتۇسىرۋ جۇمىسىنا 500 ادام تارتىلعان.
«قازاق ەلى» تۋىندىسى تاياۋ ارادا جالپىۇلتتىق پروكاتقا شىعارىلادى.