استانا-ششۋچينسك اۆتوجولىنداعى اقىلى جۇيە ارقىلى بيىل 1,2 ملرد. تەڭگە جيناۋ جوسپارلانۋدا. بۇل تۋرالى بۇگىن ۇكىمەت وتىرىسىندا ينۆەستيتسيالار جانە دامۋ ءمينيسترى ج.قاسىمبەك مالىمدەدى.
استانا-ششۋچينسك اۆتوجولىنا اقىلى جۇيە 2013 جىلدان بەرى ەنگىزىلگەن بولاتىن. ورتاشا جىلدىق قارقىندىلىق تاۋلىگىنە 8 مىڭ اۆتوموبيل. اقىلى جۇيە ارقىلى جينالاتىن قارجىنىڭ 30%-ى شاقىرىمىنا 1 تەڭگە تاريفىمەن جەڭىل اۆتوكولىكتەرگە تيەسىلى جانە جۇك كوتەرگىشتىگىنە بايلانىستى ورتاشا تاريفپەن شاقىرىمىنا 15 تەڭگەدەن (5-25 تگ.) 70 % جۇك كولىكتەرىنە تيەسىلى.
ايتقانداي, بۇل قولدانىستاعى اقىلى اۆتوجول ءتاريفى شەت ەلدەردەگى اقىلى اۆتوجولداردىڭ تاريفىمەن سالىستىرعاندا اجەپتاۋىر ارزان ەكەن. مىسالى, رەسەيدە اقىلى جول جەڭىل اۆتوكولىكتەر ءۇشىن ۇلتتىق ۆاليۋتامىزعا شاققاندا 5 تەڭگە, پولشادا 7 تەڭگە, قحر-دا 15 تەڭگە, چەحيادا 33 تەڭگە. جۇك كولىكتەرىنىڭ ءتاريفى ورتاشا ەسەپپەن شاقىرىمىنا 50 تەڭگەدەن.