«EXPO-2017» حالىقارالىق كورمەسىن وتكىزۋ كەزەڭىندە 1,5 مىڭعا جۋىق اسكەري قىزمەتشى قوعامدىق ءتارتىپتى قامتاماسىز ەتەدى. ورتالىق كوممۋنيكاتسيالار الاڭىندا وتكەن ءباسپاسوز ءماسليحاتىندا ۇلتتىق ۇلان باس قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى گەنەرال-مايور مۇحامەتقالي ساتوۆ وسىلاي دەپ مالىمدەدى.
ايتا كەتەيىك, بريفينگ ۇلتتىق ۇلانىنىڭ قوعامدىق ءتارتىپ كۇزەتى مەن مەملەكەت قاۋىپسىزدىگىن قورعاۋداعى قىزمەتى تاقىرىبى اياسىندا وربىگەن بولاتىن.
ۇلتتىق ۇلاننىڭ جەدەل ماقساتتاعى بولىمدەرى ىشكى ىستەر ورگاندارىمەن بىرلەسىپ, ەلىمىزدىڭ 19 قالاسىندا قوعامدىق ءتارتىپتى كۇزەتۋگە كۇن سايىن 5000-نان اسا اسكەريلەردى جۇمىلدىرادى. «ەكسپو-2017 حالىقارالىق كورمەسىنىڭ قارساڭىندا ەلوردامىزدا جەدەل ماقساتتاعى جەكە قۇراما جاساقتالدى. ولار قوعامدىق ءتارتىپ پەن قاۋىپسىزدىك كۇزەتىن قامتاماسىز ەتەتىن بولادى جانە كورمە وتكىزۋ كەزەڭىندە قىزمەتكە تۇسەتىن اسكەري قىزمەتشىلەر سانى 1,5 مىڭعا جۋىقتايدى. ال 28-ءشى دۇنيەجۇزىلىك قىسقى ۋنيۆەرسيادانى وتكىزۋ كەزىندە قۇقىقتىق ءتارتىپتى قامتاماسىز ەتۋگە جوعارىدا اتالعان قۇرامنان 1200 اسكەري قىزمەتشى قاتىستىرىلماق», – دەدى گەنەرال-مايور مۇحامەتقالي قۇسايىن ۇلى.