استانادا ديلەرلىك ورتالىق اشىلدى

ماشينا جاساۋ مەن تەحنيكا ءوندى­رۋدە جەتەكشى ەلدەردىڭ قاتارىنا قوسىلاتىن جاپونيانىڭ, اسىرەسە, «تويوتا» كومپانياسىنىڭ كولىكتەرى قاي مەم­لەكەتتە دە ۇلكەن سۇرانىسقا يە. كۇنى كەشە استانادا دا «تويوتا سيتي استانا» اتتى ءىرى ديلەرلىك ورتالىق اشىلدى. جاڭا اۆتوسالون ەكسپو-2017 حالىقارالىق كورمە وتەتىن اۋماققا جاقىن اۋداندا ورنالاسقان. نىساننىڭ سالتاناتتى اشىلۋ راسىمىنە «تويوتا موتور ەۆروپا» ورتالىعىنىڭ جەتەكشىسى مەتتيۋ حارريسان قاتىسىپ, ءسوز سويلەدى. «ەلوردالىقتارعا ەسىك اشقان بۇل مەكەمە «اۆتودوم» كومپانيالار تو­بىنىڭ ءبىر بولىگى بولىپ تابىلادى. ال ونىڭ قۇرامىنا الماتى, قوس­تاناي, جانە اقتاۋ قالالارىندا ورىن تەپكەن ديلەرلىك نىساندار كىرە­دى. «تويوتا سيتي استانا» – ور­تا ازياداعى ەڭ ءىرى ديلەرلىك ور­تا­لىق «تويوتا سيتي الماتىمەن» دەڭ­گەيلەس. سوندىقتان بۇدان بىلاي اس­تانا قالاسىنىڭ تۇرعىندارى جاڭا اۆتو­سالوننىڭ ارقاسىندا تەڭدەسى جوق سەگمەنت كوشباسشىسىنىڭ قىزمەت­تەرىن تولىق سپەكترىمەن پايدالانا الادى», دەدى مەتتيۋ حارريسان. ول سالتاناتتى باسقوسۋدىڭ «تويوتا موتور كور­پورەيشن» رەسمي ديستريبيۋ­تورى­نىڭ قامقورلىعىمەن وتكەنىن دە جەتكىزدى. جيىندا «تويوتا موتور قازاقستان» ورتالىعىنىڭ پرەزيدەنتى ەتسۋو حا­شينو مەن «تويوتا سيتي استانا» قۇرىل­تايشىسى سۋحراب ماحمۋدوۆ تا كوپشىلىككە لەبىزدى پىكىرلەرىن ءبىلدىردى. ولاردىڭ ايتۋىنشا, «تويوتا» كومپانياسى قازاقستاندى عانا ەمەس, الەمدى شارپىعان قارجى داعدارىسىنا قاراماستان ەكى ەل اراسىنداعى سەرىك­تەستىك قاتىناستارىن, كولىك بيزنەسىن, قوسالقى بولشەكتەر ساۋداسىن جانە سەرۆيستىك قىزمەت كورسەتۋدى دامىتۋدا ماڭىزدى ءرول اتقارۋدا. مۇنداي ىلكىمدى شارۋالار ءوڭىردىڭ ەكونوميكالىق الەۋەتىنە سەپتىگىن تيگىزۋدە. زەرتتەۋلەر ناتيجەسىنە سۇيەنسەك, سالاعا تيەسىلى وڭىرلىك جالپى ءونىمنىڭ ءوسۋى 10,3 پايىز­دى قۇرايدى. شارا بارىسىندا قاتىسۋشىلار جاپون مادەنيەتىن ايشىقتايتىن كون­تسەرتتىك باعدارلامانى تاماشالادى. اسحات رايقۇل, «ەگەمەن قازاقستان»