"نۇرلى جول" اياسىندا 2020 جىلعا دەيىن 4,5 ملن. شارشى مەتر تۇرعىن ءۇي سالىنادى. بۇل تۋرالى ورتالىق كوممۋنيكاتسيالار قىزمەتىندەگى بريفينگتە ۇلتتىق ەكونوميكا مينيسترلىگىنىڭ قۇرىلىس, تۇرعىن ءۇي-كوممۋنالدىق شارۋاشىلىق ىستەرى جانە جەر رەسۋرستارىن باسقارۋ كوميتەتىنىڭ توراعاسى مارحابات جايىمبەتوۆ مالىمدەدى.
«نۇرلى جول» باعدارلاماسى اياسىندا 2020 جىلعا دەيىن 4,5 ملن. ش.م. تۇرعىن ءۇي سالۋ كوزدەلگەن. ونىڭ ىشىندە 1,7 ملن. جالعا بەرىلەتىن, 2 ملن. كرەديتتىك, 0,8 ملن. ش.م. كوممەرتسيالىق تۇرعىن ءۇي. وسى جوسپاردى ىسكە اسىرۋعا 444 ملرد. تەڭگە مولشەرىندە قاراجات ءبولىندى»,- دەدى ول.
ونىڭ ايتۋىنشا, «قازاقستان يپوتەكالىق كومپانياسى» اق ارقىلى 2015-2016 جىلدارى بولىنگەن 115 ملرد. تەڭگە ەسەبىنەن 535,8 مىڭ شارشى مەتر جالعا بەرىلەتىن تۇرعىن ءۇي سالىنادى. ال «بايتەرەك دەۆەلوپمەنت» اق ارقىلى 324,1 مىڭ شارشى مەتر جالعا بەرىلەتىن تۇرعىن ءۇي (5,4 مىڭ پاتەر) جانە 366,9 مىڭ ش.م كرەديتتىك تۇرعىن ءۇي (5,5 مىڭ پاتەر) قۇرىلىسىنا 2016-2017 جىلدارعا 113 ملرد. تەڭگە ءبولۋ كوزدەلگەن.
«بۇگىنگى كۇنى جالپى اۋماعى 498,3 مىڭ شارشى مەتر بولاتىن 8,3 مىڭ پاتەر سالۋعا 78,9 ملرد. تەڭگە بولاتىن كەلىسىم راسىمدەلدى. بيىلعا جوسپارلاعان 51,4 ملرد. تەڭگەنىڭ 29,8 ملرد. تەڭگەسى يگەرىلدى. جەرگىلىكتى اتقارۋشى ورگاندارى ارقىلى 541,5 مىڭ ش.م. كرەديتتىك باسپانا قۇرىلىسىنا 2016-2017 جىلدارى 67 ملرد. تەڭگە كوزدەلگەن. بۇگىنگى كۇنى اكىمدىكتەرمەن 38,2 ملرد. تەڭگەگە وبليگاتسيالار شىعارىلىپ, ونىڭ 10,3 ملرد. تەڭگەسى يگەرىلدى. قالعان 28,8 ملرد. تەڭگەگە 2017 جىلى وبليگاتسيالار شىعارىلادى», - دەدى م.جايىلىموۆ.
مۇنان بولەك, ونىڭ سوزىنە قاراعاندا, تۇرعىن ءۇي قۇرىلىس جيناق بانكىنىڭ سالىمشىلارىن نەسيەلەۋ ءۇشىن 22 ملرد. تەڭگە باعىتتالاتىن بولادى. «سامۇرىق-قازىنا» اق ارقىلى 498,2 مىڭ ش.م. كوممەرتسيالىق تۇرعىن ءۇيدىڭ قۇرىلىسىنا 2016-2017 جىلدارى جىلجىمايتىن م ۇلىك قورى ارقىلى 97 ملرد.تەڭگە كوزدەلگەن.
«بيىل 83,3 ملرد. تەڭگەگە اۋماعى 312,2 مىڭ شارشى مەتر تۇرعىن ءۇيدىڭ (6,2 مىڭ پاتەر) 9 جوباسىنىڭ قۇرىلىسى جوسپارلاندى. ونىڭ ىشىندە قوردىڭ ۇلەسى 66,1 ملرد. تەڭگە, قۇرىلىس سالۋشىلاردىڭ ءوز ۇلەسى 17,2 ملرد.تەڭگە. 1 قازانداعى مالىمەت بويىنشا 35,7 ملرد. تەڭگە يگەرىلدى»,- دەدى كوميتەت باسشىسى.