ءازىربايجان باتىس قازاقستان وبلىسىنان ءبىر ميلليون توننا استىق ساتىپ الادى. بۇل تۋرالى قازاقستانداعى ءازىربايجان رەسپۋبليكاسىنىڭ توتەنشە جانە وكىلەتتى ەلشىسى راشاد ماممادوۆ مالىمدەدى, دەپ حابارلايدى egemen.kz BNews.kz-كە سىلتەمە جاساپ.
باتىس قازاقستان وبلىسىنىڭ كاسىپكەرلەر پالاتاسىندا ءازىربايجاننان كەلگەن دەلەگاتسيامەن كەزدەسۋ ءوتتى. دەلەگاتسيانىڭ باستاپ كەلگەن راشاد ماممادوۆ ءازىربايجان مەن بقو اراسىنداعى تاۋار اينالىمى 25%-عا وسكەندىگىن ايتتى.
«ءبىز جىل سايىن قازاقستاننان استىق الامىز. جوسپار بويىنشا 2016 جىلى 1 ملن تونناعا جۋىق الامىز. سونداي-اق, قازاقستانعا ءوز ءونىمىمىزدى ەكسپورتتايمىز دەپ وتىرمىز», – دەدى ر. ماممادوۆ.
باتىس قازاقستاندىق كاسىپكەرلەرگە «اقتاۋ» تەڭىز پورتىندا ورنالاسقان لوگيستيكالىق ورتالىقتىڭ مۇمكىندىكتەرى تۋرالى ايتىلدى. ءازىربايجان قازىر تابيعي رەسۋرستارى مەن پايدالى قازباسى جانە ۇتىمدى ساياساتىنىڭ ارقاسىندا ەكونوميكالىق دامىعان ەلدەردىڭ قاتارىنا كىرەدى. مۇندا ءىرى ينفراقۇرىلىم جوبالارى ىسكە اسىرىلىپ جاتىر. اۋىل شارۋاشىلىعى وندىرۋشىلەرىن تەحنيكامەن قامتاماسىز ەتۋ ءۇشىن اگروپاركتەر قۇرىلعان.
«ءوڭىرىمىزدىڭ اۋىل شارۋاشىلىعى ءونىمىن قايتا وڭدەۋ سالاسىنداعى اگراريا مەن كاسىپورىندار ازىربايجانعا تەك ۇن عانا ەمەس, ماكارون ونىمدەرىن, ەت, قىمىز, شۇبات, ءجۇن مەن تەرى جەتكىزۋگە دايىن. ءازىربايجان كاسىپورىندارىنىڭ 90%-ى يمپورتتىق شيكىزاتتى پايدالانادى», – دەدى بقو اۋىل شارۋاشىلىعى باسقارماسىنىڭ باسشىسى مارات وڭعاربەكوۆ.
كەزدەسۋ سوڭىندا قازاقستاندىق تاراپ جەرگىلىكتى زاۋىتتار مەن ءىرى تاۋار وندىرۋشىلەردىڭ كوممەرتسيالىق ۇسىنىستارىن كورسەتتى. سونداي-اق, ساپار بارىسىندا راشاد ماممادوۆ بقو اكىمى التاي كولگىنوۆپەن ەكونوميكالىق ىنتىماقتاستىق ماسەلەلەرىن تالقىلاۋ ءۇشىن كەزدەستى.