اقتوبەنىڭ شاعىن مۇناي وڭدەۋ زاۋىتتارى مۇنايدى ەكسپورتتىق باعامەن ساتىپ الۋعا دايىن. بۇل تۋرالى بۇگىن ۇكىمەتتىڭ سەلەكتورلىق رەجىمدەگى وتىرىسىندا اقتوبە وبلىسىنىڭ اكىمى بەردىبەك ساپارباەۆ ءمالىم ەتتى.
«ءبىزدىڭ وبلىستىڭ اۋماعىندا 5 شاعىن مۇناي وڭدەۋ زاۋىتى بار. جىلدىق مۇناي وڭدەۋ قۋاتى 675 مىڭ توننانى قۇرايدى. وكىنىشكە وراي بۇگىنگى كۇنى ولاردىڭ جۇكتەلىمى 4-15 پايىزعا عانا تەڭ. سىزدەن ەنەرگەتيكا مينيسترلىگىنە بىزبەن جانە باسقا دا مۇددەلى مەملەكەتتىك ورگاندارمەن بىرگە بۇل ماسەلەنى قاراستىرۋدى تاپسىرۋىڭىزدى سۇرايمىز. ەگەر بۇل زاۋىتتار تولىق قۋاتىندا جۇمىس ىستەيتىن بولسا, وندا ءبىز ءوزىمىزدى جانار-جاعارمايمەن تولىق قامتاماسىز ەتەتىن ەدىك. بىزگە جانار-جاعارماي ساتىپ الۋعا جىلىنا 200 مىڭ توننا كۆوتا بەرىلەدى. ال ءبىزدىڭ قاجەتتىلىگىمىز 280 مىڭ توننا. ايىرماسىن رەسەيلىكتەردەن ساتىپ الامىز. ەكىنشىدەن كەمىندە 700 جاڭا جۇمىس ورنى اشىلار ەدى. 1,7 ملرد. تەڭگە كولەمىندە قوسىمشا سالىق تۇسەدى», - دەدى ساپارباەۆ ۇكىمەت باسشىسى باقىتجان ساعىنتاەۆقا قاراتا.
ونىڭ ايتۋىنشا, اقتوبەلىك مۇناي وڭدەۋ زاۋىتتارى مۇنايدى ەكسپورتقا شىعارىلاتىن باعامەن ساتىپ الۋعا دا دايىن.
وسى رەتتە پرەمەر-مينيستر ەنەرگەتيكا ۆيتسە-ءمينيسترى ماعزۇم مىرزاعاليەۆتەن تۇسىنىك بەرۋدى سۇرادى.
«ىشكى نارىققا مۇناي جەتكىزۋگە قاتىستى ايتار بولسام, بۇگىنگى كۇنى ءۇش زاۋىتىمىزدى ونىممەن قامتاماسىز ەتۋدە پروبلەماعا دۋشار بولىپ وتىرمىز. ەشكىم دە ءوز ەركىمەن زاۋىتتارعا بارعىسى كەلمەيدى. سوعان سايكەس ىشكى باعامەن كۆوتا بويىنشا جەتكىزەتىن بولساق, ءبىزدىڭ جەر قويناۋىن پايدالانۋشىلار نارازىلىق تانىتادى. وكىنىشكە وراي ءبىز بۇل جاعدايدى شەشە المايمىز. ەگەردە بەردىبەك ماشبەك ۇلى كوتەرىپ وتىرعانداي مۇنايدى ەكسپورتتىق باعامەن جەتكىزۋگە كەلسەك, ءبىز ونىمەن جەر قويناۋىن پايدالانۋشىلارمەن بىرگە اينالىسۋعا دايىنبىز», - دەدى ۆيتسە-مينيستر.
وسى ورايدا پرەمەر-مينيستر ەنەرگەتيكا مينيسترلىگىنىڭ اقتوبە وبلىسىنىڭ اكىمدىگىمەن بىرلەسىپ, بۇل ماسەلەنى قاراستىرۋدى تاپسىردى.