ساۋد ارابياسىنىڭ Metal corners holding كومپانياسى قازاقستاننىڭ جەر قويناۋىنداعى پوليمەتالل, التىن, كۇمىس جانە مىس كەندەرىنە گەولوگيالىق بارلاۋ جاساۋ ءۇشىن 50 ملن دوللار بولەتىن بولدى. بۇل ۋاعدالاستىققا قاتىستى كەلىسىمگە Metal corners holding كومپانياسى مەن «قازگەولوگيا» ۇلتتىق گەولوگيالىق بارلاۋ كومپانياسى» اق باسشىلارى قول قويدى.
«ءبىز Metal corners holding كومپانياسىمەن ءوزارا كەلىسىم جاسادىق. كەلىسىمگە ساي, قازاقستاننىڭ جەر قويناۋىنان پوليمەتالل, مىس, التىن, كۇمىس سەكىلدى پايدالى كەندەرگە گەولوگيالىق بارلاۋ جاسۋعا مۇمكىندىك تۋادى. كەلىسىمنىڭ قۇنى شامامەن 50 ملن دوللاردى قۇرايدى. الايدا, بۇل – كەلىسىمنىڭ ءبىرىنشى ساتىسى. ەگەر دە بولاشاقتا بۇل باعىتتاعى جۇمىستار ءوز ناتيجەسىن بەرىپ جاتسا, ارابتار ول جەرگە يننوۆاتسيالىق زاۋىتتار مەن فابريكالار سالۋعا دايىن, – دەيدى «قازگەولوگيا» اق باسقارما توراعاسى عالىم نۇرجانوۆ.
ونىڭ ايتۋىنشا, بارلاۋ جۇمىستارىن تولىعىمەن «قازگەولوگيا» كومپانياسى جۇرگىزەدى. ۇكىمەتتىڭ شاعىن قالالاردى دامىتۋ تۋرالى قاۋلىسىنا ساي, كەن ورىندارىن مونوقالالاردىڭ ماڭىنان ىزدەۋ جونىندەگى جوسپار بار. «سونداي قالالاردىڭ جانىندا گەوحيميا جۇمىستارىن, گەوفيزيكا ەسەپتەرىن جۇرگىزىپ, بولاشاعى زور ورىنداردى انىقتادىق. وسىنداي ايماقتارعا ينۆەستور تارتۋعا دايىنبىز», – دەيدى ع.نۇرجانوۆ.
«قازگەولوگيا» باسشىسىنىڭ ايتۋىنشا, Metal corners holding كومپانياسى اراب جەرىندەگى پوليمەتالل, التىن مەن قورعاسىن قورىنا باي جەرلەردىڭ يەسى. بۇل كومپانيا ءوز ەلدەرىنىڭ ىشكى نارىعىن يگەرىپ, سىرتقى نارىققا جول ىزدەپ وتىر. قازاقستاندا يننوۆاتسيالىق جوبالارىن جۇزەگە اسىرۋعا دايىن. ەگەر ولار مونوقالالاردىڭ ماڭىندا زاۋىتتار سالا باستاسا, وڭىرلەردىڭ دامۋىنا ءوز ىقپالىن تيگىزەتىن بولادى.
جولدىباي بازار, "ەگەمەن قازاقستان".