ەنەرگەتيكا ءمينيسترى قانات بوزىمباەۆ ساۋد ارابياسى كورولدىگى ەنەرگەتيكا, ونەركاسىپ جانە مينەرالدى رەسۋرستار ءمينيسترى حاليد ءال-فاليحپەن كەزدەسىپ, ءوزارا ىنتىماقتاستىق ماسەلەلەرىن تالقىلادى.
«ءبىز ساۋد ارابياسى تاراپىن قازاقستاننىڭ مۇناي سالاسىنا ينۆەستيتسيا قۇيۋعا شاقىردىق. سونداي-اق, اتوم باعىتىنداعى ىنتىماقتاستىق ماسەلەسىن قاراستىردىق. قازاقستان ۋران ءوندىرىسى بويىنشا كوشباسشى ەل ەكەنى بەلگىلى. ءبىزدىڭ بۇل سالادا جيناعان تاجىريبەمىز بارشىلىق. ەندى سونى ساۋد ارابياسىنداعى ارىپتەستەرىمىزبەن بولىسۋگە دايىنبىز», – دەدى ق.بوزىمباەۆ كەزدەسۋدەن كەيىن جۋرناليستەرگە.
ءمينيستردىڭ ايتۋىنشا, ەكى جاق كەزدەسۋدە بالامالى ەنەرگيا كوزدەرىن دامىتۋ ماسەلەلەرى بويىنشا ورتاق مامىلەگە كەلگەن. سونىڭ ىشىندە قوس تاراپتىڭ وسى سالاداعى جۇمىستارىن ۇيلەستىرىپ وتىرۋعا ۋاعدالاسقان. «جالپى, ەنەرگەتيكا سالاسىنداعى ىنتىماقتاستىق تۋرالى كەڭ اۋقىمدى قۇجاتقا قول قويۋ مەجەسىنە دە جەتەمىز دەپ ويلايمىن», – دەيدى ق.بوزىمباەۆ.
جولدىباي بازار, "ەگەمەن قازاقستان".