كەشە پرەزيدەنت جانىنداعى ورتالىق كوممۋنيكاتسيالار قىزمەتىندە «100 ناقتى قادام» ۇلت جوسپارىنىڭ «مەملەكەتتىك كاسىبي اپپارات قۇرۋ» جونىندەگى ءبىرىنشى باعىتىن جۇزەگە اسىرۋ ىسىنە قاتىستى بريفينگ ءوتتى.
بريفينگكە مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى ايگۇل شايىموۆا, وسى قۇرىلىمنىڭ قۇزىرىنداعى مەملەكەتتىك قىزمەت دەپارتامەنتى باستىعىنىڭ مىندەتىن اتقارۋشى جارقىن تىلەۋكەنوۆ, پرەزيدەنت جانىنداعى مەملەكەتتىك باسقارۋ اكادەمياسىنىڭ رەكتورى فاتيما جاقىپوۆا جانە نازارباەۆ ۋنيۆەرسيتەتتىڭ پروفەسسورى كولين نوكس قاتىستى.
ءبىرىنشى كەزەكتە ءسوز العان ايگۇل شايىموۆا ۇلت جوسپارىنىڭ «مەملەكەتتىك كاسىبي اپپارات قۇرۋ» باعىتىنا قاتىستى 15 قادامنىڭ 11-ءى وسى ۋاقىتقا دەيىن جۇزەگە اسىرىلعانىن اتاپ ءوتتى. ونىڭ سوزىنە قاراعاندا, بيىلدان باستاپ ەلىمىزدە مەريتوكراتيا قاعيدالارى مەن اشىق كونكۋرس ارقىلى ىرىكتەۋ نەگىزىندە مەملەكەتتىك قىزمەتتىڭ مانساپتىق مودەلى جۇمىس ىستەي باستاعان. بۇل ءوز كەزەگىندە اۋىستىرۋ ارقىلى كونكۋرستان تىس تاعايىنداۋلاردى 25 ەسە (5300-دەن 226-عا دەيىن) قىسقارتۋعا مۇمكىندىك بەرگەن. ەندى قىزمەتشىلەر جوعارى لاۋازىمدى قىزمەتتەرگە كونكۋرس ارقىلى جانە تومەنگى ساتىدا جۇمىس تاجىريبەسى بولعان جاعدايدا عانا تاعايىندالا الادى. وسى ءتاسىل ارقىلى بيىل 3 مىڭنان استام ادام قىزمەتكە ورنالاسقان. بۇل – بىلتىرعى جىلعى كورسەتكىشپەن سالىستىرعاندا 3 ەسەگە ارتىق.
ودان ءارى سپيكەر جىل باسىنان بەرى مەملەكەتتىك قىزمەتتىڭ باستاپقى ساتىسىندا 5 215 ازامات (ورتالىق مەملەكەتتىك ورگانداردا – 1984, جەرگىلىكتى اتقارۋشى ورگانداردا – 3231) جۇمىسقا كىرىسكەنىن, وسى جىلى مەملەكەتتىك قىزمەتكە ءارتۇرلى سالالاردان ءۇش ساتىلى ىرىكتەۋ جۇيەسىنەن وتكەن 1392 ادام قابىلدانعانىن ءسوز ەتتى.
سونىمەن بىرگە, ا.شايىموۆا ىرىكتەۋ جۇيەسى زاڭنامانى بىلۋگە ارنالعان تەستىلەۋدى, جەكە قاسيەتتەرىن باعالاۋدى جانە كونكۋرس جاريالاعان مەملەكەتتىك ورگاندا اڭگىمەلەسۋدەن ءوتۋدى قامتيتىنىن جەتكىزدى.
بۇعان قوسا, جيىندا بيىل زاڭنامالاردى ءبىلۋ باعىتىنداعى تەستى 38 مىڭعا جۋىق ادام تاپسىرىپ, ولاردىڭ 46 پايىزى وڭ قورىتىندى العانى, بۇل كورسەتكىش وتكەن جىلعا قاراعاندا 12 پايىزعا جوعارى بولعانى ايتىلدى. ال جەكە قاسيەتتەرىن باعالاۋ بويىنشا سىناقتان 20 مىڭ ادام وتكەن. سونداي-اق, كونكۋرس جاريالاعان مەملەكەتتىك ورگانداردا 18,5 مىڭ ادام اڭگىمەلەسۋگە شاقىرىلىپ, ولاردىڭ ىشىندەگى 12 مىڭى سىننان سۇرىنبەگەن.
سپيكەردىڭ ايتۋى بويىنشا, ءبىرىنشى رەت تۇسكەن جانە ىرىكتەۋدەن ءساتتى وتكەن ادامدار ءۇشىن تالىمگەردىڭ بەكىتىلۋىمەن جانە بەيىمدەلۋ جوسپارىنىڭ قۇرىلۋىمەن 3 اي سىناق مەرزىمى بەلگىلەنگەن. وسى جىلى مۇنداي سىناقتان 2 273 ادام وتكەن كورىنەدى.
بۇلاردان بولەك, ا.شايىموۆا وسى جىلى ءبىرىنشى رەت «ب» كورپۋسىنىڭ قىزمەتشىلەرىنە ارالىق باعالاۋ وتكىزىلگەنىن جەتكىزدى. ونىڭ ايتۋىنشا, بۇل ارالىق باعالاۋعا 64,5 مىڭ مەملەكەتتىك قىزمەتشى قاتىسقان. مۇنىڭ قورىتىندىسى بويىنشا ولاردىڭ 10,8 پايىزى «وتە جاقسى», 63,2 پايىزى «ءتيىمدى», 26 پايىزى «قاناعاتتانارلىق», 0,01 پايىزى «قاناعاتتانارلىقسىز» دەگەن باعا العان. ال «ا» كورپۋسىنىڭ قىزمەتشىلەرىن باعالاۋ الداعى جەلتوقساندا وتپەك. جالپى, مۇنداي باعالاۋلار مەملەكەتتىك قىزمەتشىلەردى ماتەريالدىق تۇرعىدا ىنتالاندىرۋعا تىكەلەي اسەر ەتەدى دەپ جوسپارلانعان.
بريفينگتە ءسوز سويلەگەن جارقىن تىلەۋكەنوۆ, فاتيما جاقىپوۆا جانە كولين نوكس ءوز كەزەكتەرىندە ەلباسى نۇرسۇلتان نازارباەۆ ۇسىنعان «100 ناقتى قادام» ۇلت جوسپارىنىڭ ماڭىزدىلىعى, ونىڭ مەملەكەتىمىزدى دامىتۋداعى ءرولى جونىندە اڭگىمە ءوربىتتى.
جولدىباي بازار,
«ەگەمەن قازاقستان»